ជាតិ
ជនជាតិជប៉ុនហៅផ្លែល្ពៅថា «កាំបូចា» គឺមានន័យថា «កម្ពុជា» សកម្មភាពកម្មករលើកដាក់ផ្លែល្ពៅ ចេញពីទូកចូលទៅក្នុងស្តង់បោះដុំ នៅឆ្នុកទ្រូ។ ល្ពៅទាំងនេះ ត្រូវបានដាំដុះដោយប្រជានេសាទ នៅតាមបណ្តាកោះនានា ក្នុងបឹងទន្លេសាប។ រូបភាព៖ ឈុត ឈាណា អច្ឆរិយភាពនៃទន្លេមេគង្គ។
× រៀងរាល់ឆ្នាំ បន្ទាប់ពីទឹកចាប់ផ្តើមស្រកនៅក្នុងខែធ្នូ ប្រជានេសាទដែលរស់នៅក្នុងឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង និងឃុំផាត់សណ្តាយ ស្រុកកំពង់ស្វាយ ខេត្តកំពង់ធំ ដែលមានព្រំប្រទល់ជាប់គ្នា បានដាំដុះដំណាំល្ពៅរាប់សិបហិកតា នៅតាមបណ្តាកោះនានា ក្នុងបឹងទន្លសាប។ ប៉ុន្តែ ល្ពៅទាំងនេះ ហាក់ពុំសូវពេញនិយមក្នុងចំណោមប្រជាជនកម្ពុជា បើប្រៀបធៀបនឹងប្រទេសជិតខាង។
ល្ពៅ គឺជាបន្លែដ៏សាមញ្ញមួយប្រភេទ ដែលមានទំនាក់ទំនងគួរឱ្យភ្ញាក់ផ្អើល ជាមួយប្រទេសកម្ពុជា។ ល្ពៅ គឺឈ្មោះវល្លិដំណាំវារលើដី មានស្លឹកពណ៌បៃតង ផ្កាពណ៌លឿងស្រល់។ ត្រួយខ្ចីៗ និងផ្ការបស់វា គេអាចធ្វើជាបន្លែបាន។ ផ្លែល្ពៅ មានរាងធំសំប៉ែត សម្បកក្រាស់ សាច់ពណ៌លឿងមានរសជាតិផ្អែមតិចៗ និងមានគ្រាប់នៅខាងក្នុង។ គេអាចយកផ្លែល្ពៅធ្វើជាបន្លែ និងច្នៃជាបង្អែមក៏បាន។ គ្រាប់ល្ពៅទុំហាលស្ងួត គេអាចយកវាទៅប្រឡាក់អំបិលរួចលីង សម្រាប់ធ្វើជាអាហារសម្រន់ដូចគ្រាប់ឪឡឹកបានផងដែរ។
ផ្លែល្ពៅ សម្បូរទៅដោយ បេតាការ៉ូទីន (beta carotene) ជាតិដែក (iron) វីតាមីនសេ (vitamin C) ប៉ូតាស្យូម (potassium) កាល់ស្យូម (calcium) អាស៊ីតហ្វូលីក (folic acid) និងវីតាមីនបេ (vitamin B) ដែលល្អសម្រាប់សុខភាពមនុស្ស។
ដំណាំល្ពៅ ក៏មានរឿងរ៉ាវគួរឲ្យចាប់អារម្មណ៍មួយ ដែលប្រជាជនកម្ពុជា ភាគច្រើនពុំបានដឹង។ កាលពីជាង ៤៧០ឆ្នាំមុន មានអ្នកបើកទូកក្តោងជនជាតិព័រទុយហ្កាល់មួយក្រុម បានចូលមកក្នុងប្រទេសកម្ពុជា។ ក្រោយពីចាកចេញពីប្រទេសកម្ពុជា ពួកគេក៏បាននាំទៅជាមួយនូវពូជផ្លែល្ពៅកម្ពុជាទៅជាមួយផងដែរ ក្នុងដំណើរឆ្ពោះទៅកាន់ប្រទេសជប៉ុន ហើយពួកគេក៏ដាំដុះដំណាំល្ពៅនៅទីនោះ ដោយដាក់ឈ្មោះថា Camboja abóbora។ នេះបើយោងតាមការផ្សាយរបស់ The Japan Times។
ក្រោយមក ផ្លែល្ពៅកាំបូចា «កម្ពុជា» ត្រូវបានជនជាតិជប៉ុន ហៅឈ្មោះកាត់ខ្លីត្រឹម «កាំបូចាៗ» នោះមានន័យថា «កម្ពុជា»។ ជនជាតិជប៉ុន ចូលចិត្តពិសាផ្លែល្ពៅណាស់ ដែលជាទូទៅ គេឃើញ ពួកគេប្រើប្រាស់វា សម្រាប់ធ្វើជាគ្រឿងផ្សំក្នុងម្ហូបអាហារ និងសម្រាប់ធ្វើស៊ុបផងដែរ។ ផ្ទុយទៅវិញ ល្ពៅ «កាំបូចា» ហាក់ពុំសូវពេញនិយម ក្នុងចំណោមប្រជាជនខ្មែរទៅវិញ។ ដើម្បីស្វែងយល់បន្ថែមអំពីបន្លែល្ពៅដ៏ពិសេសនេះ សូមទស្សនាវីដេអូខាងក្រោម៖
© រក្សាសិទ្ធិដោយ thmeythmey.com