ក្លិបបាល់ទាត់បឹងកេត បានសម្រេចផ្អាកការហ្វឹកហាត់ជាក្រុម និងបានឲ្យកីឡាករហ្វឹកហាត់ខ្លួនឯងនៅផ្ទះរៀងៗខ្លួន ដោយសារបារម្ភពីការរីករាលដាល នៃជំងឺកូវីដ-១៩។ តែយ៉ាងណា កីឡាករទាំងអស់ ស្ថិតក្រោមការតាមដានរបស់គ្រូបង្វឹក និងថ្នាក់ដឹកនាំតាមរយៈវីដេអូ។
ដើម្បីបង្ការ និងទប់ស្កាត់ ការឆ្លងមេរោគកូរ៉ូណាប្រភេទថ្មីកូវីដ-១៩ ជាសហគមន៍ ក្លិបបាល់ទាត់បឹងកេត បានសម្រេចផ្អាកការហាត់ជាក្រុម ដោយដាក់កម្មវិធីឲ្យកីឡាករ ហ្វឹកហាត់នៅតាមផ្ទះរៀងៗខ្លួន។ គោលការណ៍នេះ នឹងត្រូវអនុវត្តរហូតការរាតត្បាតនៃកូវីដ-១៩ នៅកម្ពុជាមានភាពធូរស្រាល។ នេះបើតាមការលើកឡើងរបស់ លោក បែ មករា អគ្គលេខាធិការក្លិបបាល់ទាត់បឹងកេត។
ទោះបីពួកគេហ្វឹកហាត់នៅផ្ទះក៏ដោយ តែសកម្មភាពរបស់ពួកគេ ត្រូវបានតាមដានដោយគ្រូបង្វឹក និងថ្នាក់ដឹកនាំជាប្រចាំ តាមរយៈវីដេអូ Conference។ តែយ៉ាងណា ការហ្វឹកហាត់តាមតាមរបស់កីឡាករ ផ្តោតសំខាន់លើការហ្វឹកហាត់កម្លាំងកាយ ពោលគឺមិនសូវផ្តោតលើបច្ចេកទេសប៉ុន្មាននោះទេ។ នេះបើតាមការបន្ថែមរបស់លោក មករា។
ក្នុងបទសម្ភាសតាមទូរសព្ទជាមួយសារព័ត៌មានថ្មីៗ អគ្គលេខាធិការរូបនេះ បាននិយាយដូច្នេះថា៖«ក្រុមការបច្ចេកទេស និងគ្រូបង្វឹកបានពិភាក្សាគ្នា ដោយសម្រេចឲ្យកីឡាករហ្វឹកហាត់តាមផ្ទះ តាមរយៈកម្មវិធីដែលគ្រូដាក់ឲ្យ និងពិនិត្យតាមវីដេអូ Meeting។ ការហ្វឹកហាត់យើងផ្តោតលើការរក្សាកម្លាំង អត់មានបច្ចេកទេសអីច្រើនទេ»។
ការផ្លាស់ប្តូររបៀបហ្វឹកហាត់នេះ ធ្វើឡើងក្រោយការរាតត្បាត នៃកូរ៉ូណាវីរុសប្រភេទថ្មី(កូវីដ-១៩) បន្តកើនឡើង។ ដំបូងឡើយ ពេលតួលេខអ្នកឆ្លងកូវីដ-១៩នៅកម្ពុជា មានចំនួនតិចតួច ក្លិបបឹងកេត បានបន្តហ្វឹកហាត់ជាក្រុមធម្មតា ដោយគ្រាន់តែកាត់បន្ថយពេលវេលាហ្វឹកហាត់ប៉ុណ្ណោះ។ ប៉ុន្តែការហ្វឹកហាត់របស់ពួកគេ ស្ថិតក្រោមការរឹតដ្បិត ដោយតម្រូវតម្រូវឲ្យកីឡាករ និងក្រុមការងារទាំងអស់ លាងដៃជើងជាមួយសាប៊ូ អាល់កុល ឬជែល និងវាស់កម្តៅជាដើម មុនអនុញ្ញាតឲ្យចូលទីលានហ្វឹកហាត់។
ក្នុងបទសម្ភាសជាមួយសារព័ត៌មានថ្មីៗ កាលពីពេលកន្លងទៅ លោក ហៅ សុជាតិ នាយកបច្ចេកទេសគ្រប់គ្រង និងអភិវឌ្ឍន៍យុវជនរបស់ក្លិបបឹងកេត បានអះអាងថា ការមិនផ្អាកការហ្វឹកហាត់ជាក្រុម គឺដើម្បីងាយស្រួល ក្នុងការគ្រប់គ្រង និងតាមដានកីឡាករ និងបញ្ចៀសផលប៉ះពាល់ជាដើម។
លោកបានលើកឡើងដូច្នេះថា៖«ការមិនផ្អាកការហ្វឹកហាត់ ដោយសារយើងចង់តាមដានកីឡាករ ព្រោះបើយើងឲ្យគាត់ឈប់តែម្តង យើងមិនដឹងថា គាត់ទៅណាខ្លះ ធ្វើឲ្យយើងពិបាកក្នុងការតាមដាន និងដឹងថាពួកគាត់មានផ្ទុកជំងឺនឹង(COVID-19)។ ម្យ៉ាងទៀតការធ្វើបែបនេះ គឺកុំឲ្យមានផលប៉ះពាល់ ព្រោះបើកីឡាករណាម្នាក់ស្ថិតក្នុងការសង្ស័យ គឺពួកគេត្រូវសម្រាករយៈពេលវែង»។
ដើម្បីរួមចំណែកកាត់បន្ថយការចំណាយ ក្នុងអំឡុងពេលក្លិបជួបវិបត្តិ កីឡាករ គ្រូបង្វឹក និងបុគ្គលិកគ្រប់ផ្នែកលើកលែងសន្តិសុខ និងអ្នកថែទាំស្មៅរបស់ក្លិបបឹងកេត បានយល់ព្រមឲ្យក្លិបកាត់ប្រាក់ខែពី៣០ ទៅ៥០ភាគរយ តាមទំហំប្រាក់ខែតិច ឬច្រើន។ លោក បែ មករា បានចាត់ទុកទង្វើនេះថា ជាការរួមចំណែកមួយ ក្នុងការកាត់បន្ថយការខាតបង់ និងជួយរក្សានិរន្តភាពរបស់ក្លិប។
មិនមែនមានតែក្លិបបឹងកេតនោះទេ ដែលដាក់កម្មវិធីឲ្យកីឡាករហ្វឹកហាត់នៅតាមផ្ទះ ក្លិបមួយចំនួនទៀត ក៏អនុវត្តតាមវិធីសាស្ត្រនេះដែរ។ តែក៏មានក្លិបខ្លះ នៅបន្តហ្វឹកហាត់ដោយបែងចែកជាក្រុមតូចផងដែរ។ ការអនុវត្តបែបនេះ ធ្វើឡើងក្រោយសហព័ន្ធកីឡាបាល់ទាត់កម្ពុជា ប្រកាសផ្អាកការប្រកួតលីគកំពូល និងពានសម្តេច ហ៊ុន សែន ដោយសារបារម្ភពីការរីករាលដាលនៃកូវីដ-១៩ កាលពីថ្ងៃទី១៩ ខែមីនា ឆ្នាំ២០២០។
គិតត្រឹមថ្ងៃទី២ ខែមេសា ឆ្នាំ២០២០ កម្ពុជាមានផ្ទុកកូវីដ-១៩ចំនួន១១០នាក់ ក្នុងនោះព្យាបាលជាសះស្បើយចំនួន៣៤នាក់៕