COVID-19
អន្តរជាតិ
COVID-19៖ គ្រូកីឡាបេស្បលម្នាក់ស្លាប់ ក្រោយចេញពីពេទ្យមុនពេលកំណត់
× លោក Ben Luderer គ្រូបង្វឹកកីឡាបេស្បលនៅវិទ្យាល័យមួយនៅរដ្ឋ New Jersey បានស្លាប់ដោយសារ COVID-19 នៅឯផ្ទះរបស់ខ្លួន ក្នុងអាយុ៣០ឆ្នាំ។ យោងតាមការផ្សាយរបស់ NJ.com មរណភាពរបស់អ្នកកីឡារូបនេះ ដោយសារតែគាត់ចេញពីមន្ទីរពេទ្យមុនពេលកំណត់ ក្រោយមានអារម្មណ៍ថា ខ្លួនអាចទប់ទល់បាន។
លោក Luderer ជាគ្រូបង្វឹកកីឡាបេស្បលដ៏ជោគជ័យមួយរូបនៅសាលា Cliffside Park School និងជាអតីតសមាជិកកីឡាករនៃក្រុម Bon Bosco Prep ដែលឈ្នះជើងឯកបេស្បលថ្នាក់ជាតិ កាលពីឆ្នាំ២០០៨។
លោក David Porfido ប្រធានផ្នែកកីឡាប្រចាំនៅ Cliffside Park បានអះអាងថា លោក Luderer បានចេញពីមន្ទីរពេទ្យ មុនពេលកំណត់ នៅពេលគាត់មានអារម្មណ៍ថា ខ្លួនមានសុខភាពមាំទាំ អាចទប់ទល់មេរោគ COVID-19 បាន។ «ក្រោយមក ខ្ញុំទទួលដំណឹងថា គាត់មិនសូវស្រួលខ្លួនឡើងវិញ ហើយគាត់ក៏បានស្លាប់នៅផ្ទះតែម្តង»។ លោក Porfido បានអះអាងយ៉ាងដូច្នេះ។
មិត្តរួមអាជីព និងកូនសិស្សទាំងអស់សុទ្ធតែមានការសោកស្តាយចំពោះមរណភាពរបស់លោក Luderer។ អ្នកស្រី Brandy ដែលជាភរិយារបស់លោក Luderer មិនបាននៅក្បែរស្វាមីនោះឡើយ ដោយសារតែគាត់ក៏មានវិជ្ជមាន COVID-19 ហើយស្ថិតក្រោមការព្យាបាលដាច់ដោយឡែក។
អ្នកស្រី Brandy បានរៀបរាប់ប្រាប់ BuzzFeed News ថា ស្វាមីខ្លួនត្រូវបានបំពាក់អុកស៊ីសែន ហើយក្រោយមកត្រូវបានអនុញ្ញាតឲ្យចេញពីមន្ទីរពេទ្យ ដោយសារសុខភាពរបស់គាត់មានស្ថានភាពប្រក្រតី។ ប៉ុន្តែនៅយប់ថ្ងៃអាទិត្យ អ្នកស្រី បានទទួលសារពីស្វាមី ថាគាត់ធ្លាក់ខ្លួនឈឺឡើងវិញ ហើយក្រោយមកក៏បានស្លាប់តែម្តង៕
© រក្សាសិទ្ធិដោយ thmeythmey.com