COVID-19
ជាតិ
វីដេអូ
×![]()
ភ្នំពេញ៖ ស្ថានភាពជំងឺ COVID-19 នៅតែបន្តរាលដាលនៅកម្ពុជា ដោយមិនដឹងស្ថានភាពនេះ អូសបន្លាយដល់ពេលណានោះទេ។ ស្របពេលស្ថានភាពដ៏តានតឹងនេះ រដ្ឋាភិបាលបានបិទ កន្លែងកម្សាន្ត ខារ៉ាអូខេ និងសាលារៀនជាដើម ដើម្បីទប់ស្កាត់ការរីករាលដានជំងឺកូវីដ-១៩។ បញ្ហាកូវីដ-១៩នេះ បានធ្វើឱ្យអាជីវកម្មតូច-ធំ ត្រូវប្រឈមនឹងការធ្លាក់ចុះចំណូល ដោយធ្វើឱ្យម្ចាស់អាជីវកម្មខ្លះត្រូវបង្ខំចិត្តបិទទ្វារ។ មិនខុសពីអាជីវកម្មផ្សេងៗ អ្នកប្រកបរបរ អ៊ុតសក់ ក៏បានត្អូញត្អែរ ពីការបង់បាត់ចំណូល ដោយធ្លាប់តែមានភ្ញៀវហូរហែ ប្រែជាស្ងាត់ ដែលធ្វើឱ្យពួកគាត់ស្ទើរតែ រកប្រាក់បង់ថ្លៃតូប និងបំណុលស្ទើរគ្មាន។ 
ដើម្បីជ្រាបច្បាស់សូមអញ្ជើញលោក-នាងទស្សនាវីដេអូដូចតទៅ៖
អ្នកស្រី ស្រឿន សារ៉ាន់ ជា ជាងអ៊ុតសក់នៅសង្កាត់ទឹកថ្លា បានបញ្ជាក់ថា រយៈពេលជាងកន្លះ ខែមកនេះ ហាងរបស់អ្នកស្រីមិនសូវមានភ្ញៀវនោះទេ ដែលធ្វើឱ្យអ្នកស្រីបាត់បង់ចំណូលស្ទើរតែពាក់កណ្ដាល។ ក្នុងមួយខែអ្នកស្រីអាចរកចំណូលបានពី៨ ទៅ៩ រយដុល្លារ តែពេលនេះអាចរកត្រឹមតែ៤-៥ រយដុល្លារប៉ុណ្ណោះ។
ទោះបីមួយរយៈនេះចំណូលមានការធ្លាក់ចុះ និងខ្លាចជំងឺកូវីដ-១៩ក៏ដោយ តែអ្នកស្រី សារ៉ាន់ មិនមានគម្រោងបិទតូបនោះឡើយ ព្រោះខ្លាចមិនមានលទ្ធភាពបង់បំណុល និងថ្លៃតូបឱ្យគេ តែទោះយ៉ាងណាជាងអ៊ុតសក់រូបនេះ នៅតែប្រុងប្រយ័ត្ន និងធ្វើអនាម័យការពារខ្លួនពីជំងឺកូវីដ-១៩ដែរ។ អ្នកស្រីបានរៀបរាប់ដូច្នេះថា «ពេលដែលផ្ទុះកូវីដ-១៩ ខ្លាំងចង់តែផ្អាក់ដែរ តែនឹកឃើញថា បើយើងឈប់ទៅ គឺបាត់បង់ថវិកា អីចឹងបើយើងបើកទៅចេះតែបានខ្លះៗដែរ»។
មិនខុសគ្នាពី អ្នកស្រី សារ៉ាន់ ជាងអ៊ុតសក់នៅ សង្កាត់ទឹកថ្លា ខណ្ឌសែនសុខ អ្នកស្រី ឡា ឡៃហៀក ក៏កំពុងជួបប្រទះនឹងការបាត់បង់ចំណូលដែរ។ ជាជាងអ៊ុតសក់រយៈពេល៥ឆ្នាំ អ្នកស្រី ឡៃហៀក បានឱ្យដឹងថា នៅពេលជិតចូលឆ្នាំ តែងតែមានភ្ញៀវមិនដែលដាច់ តែក្រោយពេលមានជំងឺកូវីដ-១៩មក ចំណូលរបស់អ្នកស្រីមានការថយចុះជាងមុនច្រើន។ អ្នកស្រីបានរៀបរាប់យ៉ាងដូច្នេះ៖ « និយាយទៅជំងឺកូវីដ១៩ហ្នឹងចូលមកវារៀងស្ងាត់ជាងមុន ព្រោះខែហ្នឹងភាគច្រើនដាច់ តែពេលឥលូវស្ងាត់។ ចំណូលខែហ្នឹងពិបាករក»។
ជាមួយគ្នានេះដែរ អ្នកស្រី សុខ គា ប្រកបរបរអ៊ុតសក់នៅបឹងត្របែក បានឱ្យដឹងថា ភ្ញៀវដែលមកទទួលសេវាកម្មក្នុងហាងអ្នកស្រី ភាគច្រើនជាអ្នកធ្វើការនៅខារ៉ាអូខេ។ បើតាមអ្នកស្រី សុខ គា ក្រោយពេលផ្ទុះកូវីដ-១៩នេះ មានការបិទ ខារ៉ាអូខេ និងកន្លែងកម្សាន្តនានា ដែលធ្វើឱ្យហាងរបស់អ្នកស្រីថ្ងៃខ្លះគ្មានភ្ញៀវសម្បីតែម្នាក់ ក៏មាន។
អ្នកស្រី សុខ គា បានបន្ថែមថា អ្នកស្រីមិនមានប្រាក់សម្រាប់បំរុងទុកនោះទេ ហើយត្រូវបង់ថ្លៃតូបពេញថ្លៃចំនួន២០០ដុល្លារក្នុងមួយខែថែមទៀត ដែលធ្វើឱ្យអ្នកស្រីខ្លាចមិនមានលទ្ធភាពបង់ថ្លៃតូបឱ្យគេ។ អ្នកស្រីបានរៀបរាប់ដូចច្នេះថា៖ កាលពីមុនមួយខែសល់ប្រហែល២០០ដុល្លារអីដែរ ប៉ុន្តែឥលូវសម្បីតែថ្លៃផ្ទះជួលក៏រកមិនចង់បាន ចេះតែរកតិចៗទៅ។ គម្រោងប្រហែលខ្ញុំរកបិទ ព្រោះអីបើស្ងាត់សឹងអីចឹង»។
សូមជម្រាបថា គិតមកថ្ងៃទី១ ខែមេសានេះ កម្ពុជាបានរកឃើញអ្នកផ្ទុកកូវីដ-១៩ ចំនួន១០៩នាក់ ដែលនៅក្នុងចំណោមនោះមានអ្នកជាសះស្បើយចំនួន២៥នាក់៕
Tag:
របរអ៊ុតសក់
កូវីដ-១៩
© រក្សាសិទ្ធិដោយ thmeythmey.com
