ក្រសួងណែនាំកន្លែងកាត់សក់ ហាងថែរក្សាសម្ផស្ស ពង្រឹងការការពារ COVID-19

COVID-19

ជាតិ

ក្រសួងណែនាំកន្លែងកាត់សក់ ហាងថែរក្សាសម្ផស្ស ពង្រឹងការការពារ COVID-19

05, Apr 2020 , 3:59 pm

រូបភាព

ដោយ: ឡាយ សុភាវតី

ភ្នំពេញ៖ក្រសួងសុខាភិបាល ណែនាំឱ្យអ្នកទៅកន្លែងសេវវាកម្មកាត់សក់ ថែរក្សាសម្ផស្ស និងសេវាពាក់ព័ន្ធផ្សេងទៀត រួមទាំងម្ចាស់ហាង ពង្រឹងវិធានការការពារCOVID-19។

បើតាមសេចក្ដីណែនាំរបស់ក្រសួងសុខាភិបាល វិធានការដែលអ្នកទៅកន្លែងកាត់សក់ ឬទៅកន្លែងថែរក្សាសម្ផស្ស ត្រូវអនុវត្តរួមមាន កាត់បន្ថយតាមដែលអាចធ្វើបាន ការទៅស្វែងរកសេវាកាត់សក់ និងថែសម្ផស្សក្នុងអំឡុងពេលនេះ ដើម្បីទប់ស្កាត់ការរីករាលដាលCOVID-19។

ករណីខានមិនបាន ក្រសួងណែនាំទាំងអ្នកកាត់សក់ និងជាងកាត់សក់ ឲ្យពាក់ម៉ាស់ឲ្យបានត្រឹមត្រូវ រហូតដល់កាត់សក់រួច ហើយក្នុងពេលកាត់សក់ ពេលធ្វើសក់ ឬកិច្ចការថែសម្ផស្ស ត្រូវចៀសវាងការនិយាយស្តីទល់មុខគ្នា។ បើចៀសមិនបាន និយាយឲ្យបានតិចបំផុត ហើយគេចមុខចេញពីគ្នា កុំឲ្យតទល់មុខគ្នាពេក។ ចំណែកឯការកោររោមមុខ ជើងសក់ ឬចិញ្ចើម ក្រសួងណែនាំឲ្យបុគ្គលម្នាក់ៗ ធ្វើដោយខ្លួនឯង។

ក្រសួងសុខាភិបាល បានណែនាំទៅជាងកាត់សក់ ឲ្យលាងដៃជាមួយសាប៊ូ ឬអាល់កុល ឬជែលសម្លាប់មេរោគ មុនចាប់ផ្តើមកាត់សក់ជូនភ្ញៀវ។ ចំណែកឯសម្ភារដែលប្រើប្រាស់ សម្រាប់កាត់សក់ ឬថែរក្សាសម្ផស្ស ត្រូវតែលាងសម្អាតជាមួយសាប៊ូ ឬត្រាំជាមួយអាល់កុល យ៉ាងហោចណាស់១នាទី បន្ទាប់ពីកាត់សក់ ឬថែរក្សាសម្ផស្សរួចភ្លាម និងមុនពេលយកវាទៅប្រើប្រាស់លើបុគ្គលម្នាក់ទៀត។

ចំពោះកំណាត់ ឬកន្សែងដែលប្រើសម្រាប់គ្របមុខ ឬដងខ្លួន ក្រសួងហាមដាច់ខាតយកទៅប្រើប្រាស់លើបុគ្គលម្នាក់ទៀត តែត្រូវតែបោកសម្អាតឲ្យស្អាត និងហាលថ្ងៃឲ្យស្ងួតល្អ។ ជាងកាត់សក់ ឬអ្នកផ្តល់សេវាថែសម្ផស្សត្រូវប្រើស្រោមដៃប្លាស្ទិក។ រីឯកៅអីកាត់សក់ ឬកៅអីអង្គុយ ត្រូវដាក់ឲ្យមានគម្លាតពីគ្នាលើសពី១ម៉ែត្រកន្លះឡើង។

ក្រោយពីកាត់សក់រួច ត្រូវមុជទឹក កក់ស្អាត និងសម្អាតខ្លួនប្រាណភ្លាមៗ មុននឹងជួបជាមួយសមាជិកគ្រួសារនៅក្នុងផ្ទះ។ ទាំងអ្នកកាត់សក់ និងជាងកាត់សក់ ត្រូវចៀសវាងការចាប់ដៃ ឬប៉ះពាល់គ្នា ក្នុងអំឡុងពេលកាត់សក់ ឬថែរក្សាសម្ផស្ស។ ប្រសិនបើអ្នកមានបញ្ហាសុខភាពមិនត្រូវទៅកាត់សក់ ឬសេវាថែសម្ផស្ស ឬសេវាពាក់ព័ន្ធឡើយ តែត្រូវស្វែងរកការពិនិត្យព្យាបាល ដោយហៅទៅលេខ១១៥ ឬទៅមន្ទីរពេទ្យរដ្ឋដែលនៅជិតលោកអ្នក។ ទាំងនេះ គឺជាការណែនាំរបស់ក្រសួងសុខាភិបាលដើម្បីបង្ការការឆ្លងជំងឺកូវីដ-១៩ នៅកន្លែងកាត់សក់ ឬថែរក្សាសម្ផស្ស៕