កសិករ ថូ ពិសី ប្រាប់របៀបដាំបន្លែធម្មជាតិនៅផ្ទះ ក្នុងបរិបទ COVID-19

COVID-19

ជាតិ

កសិករ ថូ ពិសី ប្រាប់របៀបដាំបន្លែធម្មជាតិនៅផ្ទះ ក្នុងបរិបទ COVID-19

06, Apr 2020 , 4:17 pm

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ លោក ថូ ពិសី ជាម្ចាស់កសិដ្ឋានដាំបន្លែធម្មជាតិមួយកន្លែង នៅឃុំអរិយក្សត្រ បានចែករំលែករបៀបដាំបន្លែប្រភេទបន្លែស្លឹកនៅតាមផ្ទះ ក្នុងបរិបទ COVID-19។ បើតាមកសិករ ថូ ពិសី ក្នុងករណីប្រជាពលរដ្ឋមិនចង់ចេញពីផ្ទះ គួរឆ្លៀតពេលដាំបន្លែទទួលទានដោយខ្លួនឯង តាមវិធីងាយៗ ចំណេញថវិកា និងជួយសុខភាព។

សូមអញ្ជើញទស្សនាបទសម្ភាសរវាងកញ្ញា ញឹក ស្រីល័ក្ខ អ្នកសារព័ត៌មានថ្មីៗ ជាមួយលោក ថូ ពិសី កសិករដាំបន្លែធម្មជាតិ នៅឃុំអរិយក្សត្រដូចតទៅ៖

កសិករ ថូ ពិសី ដែលមានបទពិសោធន៍ដាំបន្លែធម្មជាតិ និងសរីរាង្គផ្គត់ផ្គង់លើទីផ្សារ បានចែករំលែកបទពិសោធន៍ និងវិធីដាំបន្លែសម្រាប់ទទួលទាននៅតាមផ្ទះ។ ការចាប់ផ្ដើមដាំដំណាំត្រូវចេះធ្វើដី, ជ្រើសរើសគ្រាប់ពូជ និងស្រោចទឹកឲ្យបានទៀងទាត់។

បើតាមកសិករ ថូ ពិសី សម្រាប់ពលរដ្ឋដែលមានដីទំនេរនៅក្បែរផ្ទះ ត្រូវជ្រើសរើសដីដែលមានពន្លឺថ្ងៃយ៉ាងហោចណាស់៤ម៉ោងក្នុង១ថ្ងៃ និងជាដីដែលមិនជាំទឹក។ មុនដំបូង ត្រូវកាប់ដី និងហាលដី រយៈពេល ១សប្ដាហ៍ និងត្រូវបណ្ដុះគ្រាប់ពូជបន្លែក្នុងពេលដំណាលគ្នានោះ ឬមុនពេលកាប់ដីហាល១សប្តាហ៍។ បន្ទាប់ពីហាលដីរួច ត្រូវយកជីកំប៉ុស្តិ៍គោក និងធ្យូងអង្កាមមករោយពីលើ និងកាប់ច្របល់បញ្ជូលគ្នា រួចត្រូវលើករងទទឹងទំហំមិនលើសពី១ម៉ត្រ( ងាយស្រួលថែទាំ) និងកម្ពស់១-២តឹក។

ក្រោយឃើញកូនបន្លែមានស្លឹក៤ ឬកូនបន្លែអាយុបាន១០-១៥ថ្ងៃ លោក-អ្នក អាចយកកូនបន្លែទៅដាំបាន។ បន្ថែមលើនេះ ត្រូវស្រោចទឹកនៅពេលព្រឹកទៀងទាត់រាល់ថ្ងៃ លើកលែងតែថ្ងៃមានភ្លៀងធ្លាក់ ( ហាមស្រោចទឹកបន្លែក្រោយម៉ោង៤ល្ងាច ព្រោះធ្វើឲ្យបន្លែជាំទឹករលួយឫស)។

ពេលដាំកូនបន្លែ ត្រូវមានគម្លាតគ្នាពី១០-២០សង់ទីម៉ែត្រតាមប្រភេទបន្លែ។ ក្នុងពេលដាំបីឬបួនថ្ងៃដំបូង ត្រូវគ្របសំណាញ់ ឬស្បៃពីលើរងសម្រាប់ការពារកូនបន្លែដែលមិនទាន់ស៊ាំជាមួយកម្ដៅថ្ងៃ និងត្រូវដកស្មៅចេញដើម្បីកុំឲ្យបោកបន្លែ។ ក្រោយដាំរយៈពេល ២សប្តាហ៍ ទៅ៤សប្តាហ៍ លោក-អ្នក នឹងបានបន្លែធម្មជាតិទទួលទានដោយខ្លួនឯង៕