រថយន្ត
អន្តរជាតិ
លោកស្រី Merkel ពិភាក្សាជាមួយបណ្តាមេក្រុមហ៊ុនយានយន្តពីដំណើរការរោងចក្រឡើងវិញ លោកស្រី Angela Merkel ជាមួយអគ្គនាយក Daimler លោក Ola Kaellenius (ស្តាំ) នាពិព័រណ៌យានយន្តមួយ។ រូបថត AFP
× លោកស្រីអធិការបតីអាល្លឺម៉ង់ Angela Merkel និងបណ្តានាយកប្រតិបត្តិក្រុមហ៊ុនយានយន្តនៅអាល្លឺម៉ង់ កំពុងសិក្សាពីការចាប់ផ្តើមចង្វាក់ផលិតកម្មនៅតាមរោងចក្រ ដោយបារម្ភពីកង្វះការផ្គត់ផ្គង់កាន់តែធ្ងន់ធ្ងរ ដោយសារតែ COVID-19។
យោងតាមការផ្សាយរបស់កាសែតអាល្លឺម៉ង់ Handelsblatt លោកស្រី Merkel បានកោះហៅសុទ្ធតែថៅកែក្រុមហ៊ុនធំៗ មានដូចជា Volkswagen, BMW និង Daimler កាលពីសប្តាហ៍មុន។ បណ្តាក្រុមហ៊ុនទាំងនោះ បានផ្អាកផលិតកម្មរបស់ខ្លួននៅតំបន់ជាច្រើន ដោយសារតែរដ្ឋាភិបាលនានានៅលើពិភពលោក បានបិទប្រទេស និងរឹតត្បិតការចេញចូល ដើម្បីទប់ស្កាត់ការរាលដាល COVID-19។
នាជំនួបនោះ លោកស្រី Merkel និងថ្នាក់ដឹកនាំក្រុមហ៊ុនយានយន្ត បានពិភាក្សាពីវិធានការកាត់បន្ថយហានីភ័យនៃការរាលដាលជំងឺ ក៏ដូចជាការការពារដល់សុខមាលភាពបុគ្គលិកក្រុមហ៊ុន នៅពេលដែលពួកគេត្រូវជួបជុំគ្នាបង្កើនផលិតកម្ម។
Handelsbatt បានផ្សាយឲ្យដឹងថា អ្នកចូលរួមពិភាក្សាជាមួយមេដឹកនាំរដ្ឋាភិបាល សុទ្ធតែបង្ហាញពីកង្វល់ទាក់ទងខ្សែសង្វាក់ផ្គត់ផ្គង់ ស្របពេលដែលនាយកប្រតិបត្តិក្រុមហ៊ុន VW Group លោក Herbert Diess បានលើកឡើងកន្លងមកថា ក្រុមហ៊ុនលោកនឹងកាត់បន្ថយបុគ្គលិក ប្រសិនបើមេរោគបន្តរាលដាលឥតឈប់ឈរ។
ប្រភពបានលើកឡើងថា ការចាប់ផ្តើមដំណើរការរោងចក្រយានយន្តឡើងវិញ ទាល់តែមានការយល់ព្រមគ្នាក្រោមក្របខណ្ឌសហគមន៍អឺរ៉ុប។ «វាមិនអាចជួយអ្វីបានឡើង បើប្រទេសមួយដំណើរការទៅមុខ ប៉ុន្តែអ្វីទាំងអស់នៅអ៊ីតាលី ឬក៏អេស្ប៉ាញ នៅតែជួបបញ្ហា»។
អ្នកនាំពាក្យម្នាក់របស់រដ្ឋាភិបាលអាល្លឺម៉ង់ បានអះអាងថា ជំនួបធ្វើឡើងតាមការហៅទូរសព្ទ ប៉ុន្តែមិនបានផ្តល់ព័ត៌មានលម្អិតឡើយ។ អ្នកដែលមានវត្តមានពិភាក្សានាពេលនោះដែរមានដូចជា រដ្ឋមន្ត្រីសេដ្ឋកិច្ច Peter Altmaier, រដ្ឋមន្ត្រីហិរញ្ញវត្ថុ Olaf Scholz និងលោក Joerg Hofmann នាយកអង្គភាពពាណិជ្ជកម្ម IG Metall។ រីឯតំណាងក្រុមហ៊ុនមានដូចលោក Ola Kaellenius អគ្គនាយក Daimler, លោក Oliver Zipse មេក្រុមហ៊ុន BMW និងលោក Diess នៃ VW Group ជាដើម៕
© រក្សាសិទ្ធិដោយ thmeythmey.com