COVID-19៖ សិង្ហ​បុរី ទម្លាក់​លុយ​៣,៥ពាន់​លាន​ដុល្លារ​បន្ថែម ដើម្បី​ជួយ​ប្រជាជន​និង​ជំនួញ​ក្នុងប្រទេស​
COVID-19
អន្តរជាតិ
COVID-19៖ សិង្ហ​បុរី ទម្លាក់​លុយ​៣,៥ពាន់​លាន​ដុល្លារ​បន្ថែម ដើម្បី​ជួយ​ប្រជាជន​និង​ជំនួញ​ក្នុងប្រទេស​
06, Apr 2020 , 8:39 pm        
រូបភាព
ឧបនាយករដ្ឋមន្រ្តីសិង្ហបុរី លោក Heng Swee Keat។ រូបភាព៖ CHONG JUN LIANG
ឧបនាយករដ្ឋមន្រ្តីសិង្ហបុរី លោក Heng Swee Keat។ រូបភាព៖ CHONG JUN LIANG
​ឧបនាយករដ្ឋមន្ត្រី​សិង្ហ​បុរី លោក Heng Swee Keat នា​ថ្ងៃទី​៦ ខែមេសា បានប្រកាស​បញ្ចេញ​កញ្ចប់​ថវិកា​គាំទ្រ​ប្រមាណ៣,៥ ពាន់លានដុល្លារអាមេរិក ( ៥,១ ​ពាន់​លាន​ដុល្លារសិង្ហបុរី ) ​បន្ថែមទៀត ដើម្បី​ជួយ​ប្រជាជន​សិង្ហ​បុរី និង​មុខ​ជំនួញ​ទាំងអស់​ក្នុងប្រទេស​ពី​ការអុកឡុក​នៃ​ជំងឺ​រលាក​សួត ដែល​បង្កដោយ​កូ​រ៉ូ​ណាវី​រុស (COVID-19)​។ នេះ​គឺជា​បញ្ចេញ​កញ្ចប់​ថវិកា​លើក​ទី​៣​របស់​សិង្ហ​បុរី ក្នុង​រយៈពេល តិចជាង​២​ខែ​កន្លងមកនេះ​។

 
​គិត​មកទល់ពេលនេះ សិង្ហ​បុរី​បានប្រកាស​បញ្ចេញ​កញ្ចប់​ថវិកា​ចំនួន ៣​លើក​ហើយ​។ លើកទីមួយ​សិង្ហ​បុរី បាន​បញ្ចេញ​ទឹកប្រាក់ ៤,៤​ពាន់​លាន​ដុល្លារ​។ លើក​ទី​ពីរ មាន​រហូតដល់ ៣៣​ពាន់​លាន​ដុល្លារ ចំណែក​លើក​ទី​បី​នេះ គឺមាន ៣,៥ ​ពាន់​លាន​ដុល្លារ​។ 
 
​តាមរយៈ​កញ្ចប់​ថវិកា​ចុងក្រោយ​នេះ សិង្ហ​បុរី​នឹង​ប្រើប្រាស់​សម្រាប់​ប្រជាជន​របស់ខ្លួន​ចំនួន ៧៦៦​លាន​ដុល្លារ និង​ជួយ​ទ្រទ្រង់​ជំនួញ​ជាង ២,៧​ពាន់​លាន​ដុល្លារ​។ ក្នុង​កិច្ចប្រជុំសភា​ថ្ងៃទី​៦ ខែមេសា ឧបនាយករដ្ឋមន្ត្រី​សិង្ហ​បុរី លោក Heng Swee Keat ប្រកាសថា ពលរដ្ឋ ដែលមាន​អាយុ​២១​ឆ្នាំ​ឡើងទៅ នឹង​ទទួលបាន​ទឹកប្រាក់​ប្រមាណ ៤១៧ ដុល្លារ​ក្នុង​មួយ​នាក់​។ សម្រាប់​អ្នកមាន​គណនី​ធនាគារ រដ្ឋាភិបាល​នឹងដាក់​ប្រាក់​ចូលទៅក្នុង​គណនី​ផ្ទាល់ ចំណែក​អ្នក​ផ្សេងទៀត នឹង​ផ្តល់​ឲ្យ​តាមរយៈ​សែក​។ 
 
​សម្រាប់​ទឹកប្រាក់​ខាងលើ គឺ​រដ្ឋាភិបាល​សិង្ហ​បុរី បាន​បន្ថែម​ទឹកប្រាក់​ឧបត្ថម្ភ​ឲ្យ​ប្រជាពលរដ្ឋ​សិង្ហ​បុរី​ក្នុង​មួយ​នាក់ ចំនួន ២០៨​ដុល្លារ​បន្ថែមទៀត ពោលគឺ​ពីលើ​កញ្ចប់​ថវិកា ដែលមាន​ចំនួន​២០៨​ដុល្លារ ដែល​រដ្ឋាភិបាល​បានប្រកាស​នា​ខែកុម្ភៈ​កន្លងទៅ​។ ទឹកប្រាក់​ដែល​ត្រូវ​ចំណាយ​សរុប​សម្រាប់​ប្រជាជ​នេះ​ពេលនេះ មាន​ចំនួន​ជាង ៧៦៦​លាន​ដុល្លារ​។ នេះ​បើតាម​ការចុះផ្សាយ​របស់​ទូរទស្សន៍ Channel News Asia​។ 
 
​ក្រៅពី​ជំនួយ​សម្រាប់​ប្រជាពលរដ្ឋ​សិង្ហ​បុរី ថវិកា​ដែល​នៅសល់​ប្រមាណ​ជាជាង ២,៧​ពាន់​លាន​ដុល្លារ នឹង​យកទៅជួយ​គាំទ្រ​ជំនួញ​ផ្សេងៗ ដើម្បី​ការពារ​កុំ​ឲ្យ​កាត់បន្ថយ​បុគ្គលិក និង​មានដំណើរ​ការល្អ​។ តាមរយៈ​កញ្ចប់​ថវិកា​ចុងក្រោយ​នេះ ក្រុមហ៊ុន​ទាំងអស់ នឹង​ទទួលបាន​ប្រាក់បៀវត្ស​សម្រាប់​បុគ្គលិក​ពី​រដ្ឋាភិបាល​ចំនួន ៧៥​ភាគរយ​។ បើសិន​គ្មាន​ការប្រែប្រួល​ទេ គម្រោង​នឹង​ចាប់ផ្តើម​លើកដំបូង​នៅ​សប្តាហ៍​ក្រោយ​។ ចំណែក​បុគ្គលិក​បរទេស រដ្ឋាភិបាល​សម្រេច​មិន​យកពន្ធ​ឡើយ​ក្នុង​ខែមេសា​នេះ​។ សម្រាប់​ការបង់ពន្ធ តម្លៃ​ជួល រដ្ឋាភិបាល​សិង្ហ​បុរី ក៏​ពន្យារ​ឲ្យ​ម្ចាស់​ជំនួញ​ទាំងអស់​ដែរ ដែល​កំពុងតែ​រងគ្រោះ ដោយសារតែ COVID-19​។ 
 
​សូមបញ្ជាក់ថា គិត​មក​ត្រឹម​ថ្ងៃទី​៦ ខែមេសា សិង្ហ​បុរី មាន​ករណី COVID-19 សរុប​ចំនួន ១៣០៩​ករណី អ្នកស្លាប់ ៦​ករណី និង​អ្នកជា​សះស្បើយ​មាន​ចំនួន ៣២០​ករណី​៕ 

Tag:
 សិង្ហ​បុរី​
  COVID-19
© រក្សាសិទ្ធិដោយ thmeythmey.com