ទិវាសុខភាពពិភពលោកឆ្នាំ២០២០ ប្រារព្ធដឹងគុណគ្រូពេទ្យជួរមុខប្រឆាំង COVID-19

COVID-19

អន្តរជាតិ

ទិវាសុខភាពពិភពលោកឆ្នាំ២០២០ ប្រារព្ធដឹងគុណគ្រូពេទ្យជួរមុខប្រឆាំង COVID-19

07, Apr 2020 , 6:29 am

រូបភាព

ដោយ:

ជារៀងរាល់ឆ្នាំ ថ្ងៃទី៧ ខែមេសា បណ្ដាប្រទេសនៅទូទាំងសាកលលោក តែងប្រារព្វទិវាសុខភាពពិភពលោក (World Health Day)។ សម្រាប់ឆ្នាំ២០២០នេះ គឺជាឆ្នាំដ៏ពិសេសខុសឆ្នាំសព្វដង ព្រោះថាអង្គការសុខភាពពិភពលោកបានសម្រេចយកពាក្យស្លោកមួយថា «គាំទ្រគិលានុបដ្ឋាក និងពេទ្យឆ្មប»។ ការប្រារព្ធទិវានេះ ធ្វើឡើងចំពេលដែលជំងឺរាតត្បាតសាកល COVID-19 កំពុងញាំញីពិភពលោកទាំងមូល ដោយមិនថាប្រទេសតូច ឬប្រទេសធំ សុទ្ធតែរងគ្រោះដូចគ្នា។

«ថ្ងៃទី៧ ខែមេសា ឆ្នាំ២០២០ គឺជាថ្ងៃដែលប្រារព្វឡើងដើម្បីអបអរសាទរចំពោះការងាររបស់គិលានុបដ្ឋាក និងពេទ្យឆ្មប ព្រមទាំងក្រើនរម្លឹកមេដឹកនាំពិភពលោកនានាអំពីតួនាទីដ៏សំខាន់ដែលបុគ្គលិកសុខាភិបាលធ្វើដើម្បីរក្សាពិភពលោកមានសុខភាពល្អផងដែរ»។ នេះបើតាមសេចក្តីប្រកាសព័ត៌មានលើវេបសាយផ្លូវការរបស់អង្គការសុខភាពពិភពលោក (WHO)។

សេចក្តីប្រកាសព័ត៌មានដដែល បញ្ជាក់ទៀតថា គិលានុបដ្ឋាក និងបុគ្គលិកសុខាភិបាលផ្សេងទៀត ជាស្ថិតនៅជួរមុខនៃប្រតិបត្តិការឆ្លើយតបប្រឆាំង COVID-19 ដូចជា ផ្ដល់ការថែទាំ និងព្យាបាលដែលគុណភាពខ្ពស់ និងដោយក្តីគោរព, ដឹកនាំកិច្ចសន្ទនាសហគមន៍ដើម្បីដោះស្រាយភាពភ័យខ្លាច និងសំណួរនានាពាក់ព័ន្ធ COVID-19 ព្រមទាំងប្រមូលទិន្នន័យសម្រាប់សិក្សាស្រាវជ្រាវជាដើម។ «បើគ្មានគិលានុដ្ឋាយកា វាក៏នឹងគ្មានការឆ្លើយតបនោះដែរ»។

ឆ្លៀតក្នុងឱកាស «ទិវាសុខភាពពិភពលោក» ឆ្នាំ២០២០នេះ អង្គការសុខភាពពិភពលោក ទទូចសុំការគាំទ្ររបស់់សាធារណជននិងរដ្ឋាភិបាលធានាថាសមត្ថភាពនិងកម្លាំងបុគ្គលិកសុខាភិបាលខ្លាំងគ្រប់គ្រាន់ក្នុងការជួយមនុស្សគ្រប់គ្នា គ្រប់ទីកន្លែងទទួលការថែទាំងសុខភាពដែលពួកគេត្រូវការ។

ទន្ទឹមនេះ សាធារណជនទូទៅក៏ត្រូវបានលើកទឹកចិត្តឲ្យចំណាយពេលពួកគេបន្ដិចដើម្បីអរគុណ និងបង្ហាញការគោរពដល់បុគ្គលិកសុខាភិបាលទាំងអស់ដែលនៅជួរមុខប្រឆាំង COVID-19 ។ ត្រង់ចំណុចនេះ WHO អះអាងថា ពួកគេ អាចចែករំលែករូបភាព និងវីដេអូ ដែលបង្ហាញពីសារសំខាន់នៃការងារគ្រូពេទ្យ។

សូមបញ្ជាក់ថា ការប្រាព្ធទិវាសុខភាពពិភពលោក ត្រូវបានចាប់ផ្ដើមដំបូង តាងពីឆ្នាំ១៩៥០មកម្ល៉េះ ក្នុងគោលដៅបង្កើតការយល់ដឹងលើមូលបទសុខភាពជាក់លាក់ណាមួយ ដែលមានដាក់បញ្ចូលក្នុងបញ្ចីអាទិភាពរបស់អង្គការសុខភាពពិភពលោក។ ក្នុងរយៈពេល៥០ឆ្នាំចុងក្រោយ ទិវាប្រចាំឆ្នាំនេះ ក៏បានលើកបង្ហាញជុំវិញបញ្ហាសុខភាពសំខាន់ៗ ដូចជា សុខភាពផ្លូវចិត្ត ការថែទាំកុមារ និងពាក់ព័ន្ធបម្រែបម្រួលអាកាសធាតុផងដែរ៕