COVID-19
អន្តរជាតិ
រដ្ឋមន្ត្រីសុខាភិបាលនូវែលសេឡង់សុំលាលែង ក្រោយល្មើសបញ្ជាបិទប្រទេស រដ្ឋមន្ត្រីសុខាភិបាលនូវែលសេឡង់ David Clark (AFP)
× រដ្ឋមន្ត្រីសុខាភិបាលនូវែលសេឡង់ David Clark បានដាក់ពាក្យសុំលាលែងតំណែងទៅកាន់នាយករដ្ឋមន្ត្រី ក្រោយសារភាពថា លោកបានធ្វើដំណើរចម្ងាយ២០គីឡូម៉ែត្រជាមួយគ្រួសារលោកទៅកម្សាន្តនៅឆ្នេរសមុទ្រ។ យ៉ាងណាមិញ តំណែងលោក ត្រូវបានធានាមួយរយៈសិន ពោលគឺរហូតដល់ស្ថានការណ៍ធូរស្រាល ទើបគិតគូរដកហូត។
លោករដ្ឋមន្ត្រី Clark អះអាងថា ដំណើរការកម្សាន្តលក្ខណៈគ្រួសាររបស់លោកនេះ គឺល្មើសបទបញ្ជាបិទប្រទេសដ៏តឹងរ៉ឹង ដែលគ្រួសារនូវែលសេឡង់ទាំងអស់តម្រូវឲ្យនៅផ្ទះ ហើយជាពិសេសនោះ ក្នុងតំណែងជារដ្ឋមន្ត្រីសុខាភិបាល លោកគប្បីធ្វើជាគំរូសម្រាប់ពលរដ្ឋ។
ក្នុងសេចក្តីថ្លែងការណ៍ លោក David Clark បញ្ជាក់ដូច្នះថា៖នៅពេលដែលយើងស្នើសុំពលរដ្ឋនូវែលសេឡង់ធ្វើពលីកម្មជាប្រវត្តិសាស្ត្រ ខ្ញុំបានធ្វើឲ្យពួកគេខកចិត្ត»។ តាមការចុះផ្សាយរបស់ទីភ្នាក់ងារព័ត៌មាន AFP លោលសង្កត់ធ្ងន់ថា៖«ខ្ញុំពិតជាល្ងីល្ងើណាស់ ហើយខ្ញុំដឹងថា ប្រជាជននឹងខឹងសម្បាជាមួយខ្ញុំ»។
ឆ្លើយតបនឹងរឿងនេះ នាយករដ្ឋមន្ត្រីនូវែលសេឡង់ អ្នកស្រី Jacinda Ardern លើកឡើងថា នៅពេលស្ថានការណ៍ COVID-19 វិលមកសភាពធម្មតាឡើងវិញ អ្នកស្រីនឹងដកហូតតំណែងលោករដ្ឋមន្ត្រី Clark ចោល។ យ៉ាងណាមិញ បច្ចុប្បន្ន អ្នកស្រីសម្រេចគ្រាន់តែទម្លាក់ឋានន្តរសក្តិលោកក្នុងគណៈរដ្ឋមន្ត្រី និងដកហូតលោកចេញពីតួនាទីមួយពាក់ព័ន្ធនឹងរដ្ឋមន្ត្រីហិរញ្ញវត្ថុ។
ត្រង់ចំណុចនេះ អ្នកស្រីនាយករដ្ឋមន្ត្រី និយាយដូច្នេះថា៖«អ្វីដែលលោកបានប្រព្រឹត្តគឺជារឿងខុសឆ្គង ហើយវាគ្មានការលើកលែងនោះឡើយ។ ក៏ប៉ុន្តែ ស្ថានភាពបច្ចុប្បន្ន អាទិភាពចម្បងខ្ញុំគឺរួមដៃប្រយុទ្ធប្រឆាំង COVID-19។ ម្ល៉ោះហើយ យើងពុំអាចទ្រាំទ្រការបង្អាក់យ៉ាងធំធេងមួយក្នុងវិស័យសុខាភិបាល ឬក្នុងការឆ្លើយតបយើងឡើយ។ សម្រាប់ហេតុផលតែមួយគត់នេះ លោកវេជ្ជបណ្ឌិត Clerk នឹងបន្តកាន់តួនាទីលោកដដែល»។
គិតត្រឹមថ្ងៃ ៧ ខែមេសា ប្រទេស នូវែលសេឡង់ មានករណីឆ្លង COVID-19 សរុប ១១៦០ករណី ខណៈអ្នកស្លាប់មាន១ករណី ហើយជាសះស្បើយមាន២៤១នាក់។ អ្នកជំងឺស្ថិតនៅសភាពធ្ងន់ធ្ងរ មានសរុប៤នាក់។ នេះបើតាមយោងតាមវេបសាយ worldometers.info ដែលតាមដានតួលេខ COVID-19 នៅទូទាំងពិភពលោក៕
Tag:
នូវែលសេឡង់
David Clark
COVID-19
បិទប្រទេស
© រក្សាសិទ្ធិដោយ thmeythmey.com