សហរដ្ឋអាមេរិក នៅថ្ងៃទី៦ មេសា បានព្រមានចិន កុំឲ្យទាញប្រយោជន៍ពីការរាតត្បាតនៃជំងឺ COVID-19 ដើម្បីបង្កើនការបញ្ជ្រាតខ្លួនចូលសមុទ្រចិនខាងត្បូង។ ការព្រមានធ្វើឡើងក្រោយ វៀតណាមបានប្រកាសថា ចិនបានពន្លិចកប៉ាល់មួយគ្រឿង។
បើតាមតាមក្រសួងការបរទេសអាមេរិក ខណៈពេលពិភពលោកកំពុងប្រយុទ្ធនឹងជំងឺ COVID-19 ចិនបានពន្លឿនការសាងសង់អ្វីដែលខ្លួនបានពិពណ៌នាថា ជាស្ថានីយ៍ស្រាវជ្រាវ និងកន្លែងចុះចតយន្តហោះយោធាពិសេស នៅក្នុងសមុទ្រដែលមានជម្លោះរវាងចិន និងប្រទេសមួយចំនួនទៀត។
អ្នកនាំពាក្យក្រសួងការបរទេសអាមេរិក លោកស្រី Morgan Ortagus នៅក្នុងសេចក្តីថ្លែងការណ៍បានលើកឡើងថា៖ « យើងអំពាវនាវឲ្យចិន ផ្តោតការយកចិត្តទុកដាក់ក្នុងការគាំទ្រកិច្ចប្រឹងប្រែងជាអន្តរជាតិដើម្បីប្រឆាំងជំងឺរាតត្បាតសកល និង ឈប់កេងប្រវ័ញ្ចការមិនអាចផ្តោតយកចិត្តទុកដាក់ និង ភាពទន់ខ្សោយរបស់រដ្ឋដទៃទៀត ដើម្បីពង្រីកការទាមទារមិនស្របច្បាប់ក្នុងសមុទ្រចិនខាងត្បូង»។
កាលពីសប្តាហ៍មុន វៀតណាមបានតវ៉ាទៅកាន់ទីក្រុងប៉េកាំង បន្ទាប់ពីឆ្មាំសមុទ្រចិន បានបង្អាក់ បុកទង្គិច និងពន្លិចកប៉ាល់មួយគ្រឿងដែលមានអ្នកនេសាទ៨រូប នៅជិតប្រជុំកោះប៉ារ៉ាសែល ដែលជាតំបន់ប្រទាញប្រទង់គ្នានៅសមុទ្រចិនខាងត្បូង។
វៀតណាម ក៏ដូចជាចិន និងតៃវ៉ាន់ សុទ្ធសឹងតែទាមទារអធិបតេយ្យភាពលើប្រជុំកោះប៉ារ៉ាសែល។ វៀតណាម តាមរយៈសេចក្តីថ្លែងការណ៍របស់ក្រសួងការបរទេស បានទាមទារឲ្យចិន ចេញសំណងទៅកាន់អ្នកនេសាទ និងដាក់ពិន័យតឹងរឹងទៅលើមន្ត្រីដែលទទួលខុសត្រូវ ក៏ដូចជាបង្ការហេតុការណ៍បែបនេះនាពេលអនាគត។
សហរដ្ឋអាមេរិកវិញ បានបង្ហាញសេចក្តីព្រួយបារម្ភយ៉ាងខ្លាំងចំពោះហេតុការណ៍ដែលបានកើតឡើង។ អ្នកនាំពាក្យក្រសួងការបរទេសអាមេរិក លោកស្រី Ortagus បន្តថា ឧបទ្ទវហេតុនេះ គឺជាសកម្មភាពចុងក្រោយ ក្នុងចំណោមសកម្មភាពយ៉ាងច្រើនរបស់ចិន ដើម្បីបញ្ជ្រៀតការទាមទារផ្លូវសមុទ្រមិនស្របច្បាប់ និងធ្វើឲ្យប៉ះពាល់ដល់ផលប្រយោជន៍ប្រទេសអាស៊ីអាគ្នេយ៍ជិតខាង ក្នុងសមុទ្រចិនខាងត្បូង»។
ខណៈបង្កើនទំនាក់ទំនងជាមួយវៀតណាម សហរដ្ឋអាមេរិក បានប្រជែងការទាមទាររបស់ចិនក្នុងសមុទ្រចិនខាងត្បូង ដែលជាតំបន់នាវាចរណ៍ដ៏មមាញឹក និងជាជង្រុកថាមពលផងដែរ។
ចិនកាលពីខែមុន បានចោទអាមេរិកថា«បង្ករឿង»បន្ទាប់ពីនាវាចម្បាំងអាមេរិក USS McCampbell បើកជិតប្រជុំកោះប៉ារ៉ាសែល ដោយពុំមានការអនុញ្ញាតពិចិន។ ក្នុងរយៈពេលចុងក្រោយនេះទំនាក់ទំនងរវាងចិន និងអាមេរិកមានភាពតានតឹងកាន់តែខ្លាំង បន្ទាប់ពីអាមេរិកចោទចិនថា មិនបានចាត់វិធានការភ្លាមៗក្នុងការគ្រប់គ្រងជំងឺ COVID-19 ដែលមកដល់ពេលនេះបានចម្លងមកលើមនុស្សលើសពី១លាននាក់ហើយ៕