COVID-19
អន្តរជាតិ
មនុស្សរាប់ពាន់នាក់ផ្ដើមសម្រុកចេញពីវូហាន ក្រោយអស់បម្រាមធ្វើដំណើរ អ្នកដំណើរពាក់ម៉ាស់តម្រង់ជួរនៅស្ថានីយ៍រថភ្លើង Wuchang ក្រុងវូហាន នៅថ្ងៃទី៨ ខែមេសា ខណៈត្រៀមចាកចេញពីវូហាន។ រូបភាព AFPjpg
× មនុស្សរាប់ពាន់នាក់បានផ្ដើមនាំគ្នាសម្រុកចេញពីទីក្រុងវូហាន តាមរយៈរថភ្លើងនៅថ្ងៃទី៨ ខែមេសា ខណៈអាជ្ញាធរសម្រេចដកហូតបម្រាមលើការធ្វើដំណើរ។ បម្រាមនេះមានរយៈពេល៧៦ថ្ងៃ ពោលគឺបានដាក់ដំបូងកាលពីថ្ងៃទី២៣ ខែមករា មកម្ល៉េះ។
ខណៈបម្រាមត្រូវបានលុបចោលនៅពាក់កណ្ដាលយប់ថ្ងៃទី៨ ខែមេសាម៉ោងក្នុងស្រុក អ្នកដំណើរជាច្រើននាក់ បានបង្ហាញក្តីសោមនស្ស និងធូរស្រាលក្នុងចិត្ត។ ពួកគេបានសម្រុកទៅស្ថានីយរថភ្លើង Wuchang របស់ក្រុង វូហាន ដោយប៉ងទិញសំបុត្ររថភ្លើងជិះពេញមួយយប់ចាកចេញពីក្រុង។
«ទីក្រុង វូហាន បានបាត់បង់ច្រើនសន្ធឹកដោយសារជំងឺរាតត្បាតនេះ ហើយប្រជាជនក្រុងវូហាន បានលះបង់យ៉ាងធំធេង»។ បុរសវ័យ២១ឆ្នាំម្នាក់ ឈ្មោះថា Yao ដែលបានធ្វើដំណើរត្រលប់ទៅបម្រើការនៅភោជនីយដ្ឋានមួយក្នុងក្រុងសៀងហៃវិញ។ ប្រាប់ទីភ្នាក់ងារព័ត៌មាន AFP បុរសចិនរូបនេះ អះអាងថា៖«ឥឡូវនេះ ការបិទក្រុងត្រូវបានដកហូត ខ្ញុំគិតថា ពួកយើងទាំងគ្នាពិតជាសប្បាយរីករាយណាស់»។
តាមការចុះផ្សាយរបស់ទូរទស្សន៍រដ្ឋ CCTV រដ្ឋាភិបាលចិន ប៉ាន់ស្មានថា មនុស្សប្រមាណ ៥៥០០០នាក់ រំពឹងថានឹងចាកចេញតាមរយៈរថភ្លើងនៅថ្ងៃទី៨ ខែមេសាពីទីក្រុងវូហាន ដែលបានត្រូវបិទជិតឈឹងតាំងពីថ្ងៃទី២៣ ខែមករា។ ក្រុងវូហាននេះ គឺជាចំណុចផ្ដើមនៃការផ្ទុះជំងឺរាតត្បាតសាកល COVID-19 កាលពីចុងឆ្នាំ២០១៩។
ការសម្រេចដកហូតបម្រាមធ្វើដំណើរនេះ ធ្វើឡើងក្រោយចិនរាយការណ៍គ្មានអ្នកស្លាប់ដោយសារ COVID-19 កាលពីថ្ងៃទី៧ មេសា ដែលជាលើកដំបូងបង្អស់។ កាលពីខែមុន នៅពេលក្រុង វូហាន បានរាយការណ៍គ្មានករណីឆ្លងថ្មីមួយសប្តាហ៍ពេញ ហាងទំនិញមួយចំនួន បានបើកទ្វារឡើងវិញ។ ប្រជាជនខ្លះ ដែលរស់នៅក្នុងតំបន់គ្មានករណីឆ្លងថ្មី ក៏ត្រូវបានអនុញ្ញាតឲ្យចាកចេញពីផ្ទះពួកគេរយៈពេល២ម៉ោង ។
បន្ថែមពីការធ្វើដំណើរចេញពី វូហាន ចាប់ពីថ្ងៃទី៨ តទៅ ពលរដ្ឋដែលបម្រើការក្នុងឧស្សាហកម្មផលិតថ្នាំពេទ្យ និងគ្រឿងបរិភោគប្រចាំថ្ងៃដទៃទៀត នឹងត្រូវអនុញ្ញាតឲ្យត្រលប់ទៅធ្វើការវិញ។ ចំណែក ឧស្សាហកម្ម ដែលប៉ះពាលដល់ចង្វាក់ផលិតកម្មជាតិ ឬសាកល ក៏នឹងត្រូវអនុញ្ញាឲ្យដំណើរការឡើងវិញផងដែរ។
ទោះបីរដ្ឋាភិបាលដាក់កំហិតផ្នែកដែនអាកាស ជើងហោះហើរ២០០ជើងក្នុងមួយថ្ងៃ ដែលចាកចេញពីក្រុងវូហាន នៅថ្ងៃទី៨ មេសា ដឹកអ្នកដំណើរ១ម៉ឺននាក់។ រថភ្លើងល្បឿនលឿនជិត១០០គ្រឿង ត្រៀមរួចរាល់សម្រាប់ដឹកអ្នកដំណើរ ខណៈផ្លូវល្បឿនលឿន ត្រូវបានអនុញ្ញាតឲ្យចរាចរណ៍ផងដែរ។ នេះបើតាមប្រព័ន្ធផ្សព្វផ្សាយរដ្ឋចិន។ យ៉ាងណាមិញ សាលារៀននានានៅតែបន្តបិទទ្វារ រហូតដល់ជូនដំណឹងជាថ្មី៕
Tag:
ចិន
វូហាន
COVID-19
© រក្សាសិទ្ធិដោយ thmeythmey.com