COVID-19
ជាតិ
សម្តេច ហ៊ុន សែន និងរដ្ឋមន្ត្រីការបរទេសអាមេរិក ជួបគ្នាតាមទូរសព្ទ និងលើកទឹកចិត្តគ្នាប្រឆាំង COVID-19
× សម្តេចនាយករដ្ឋមន្ត្រី ហ៊ុន សែន កាលពីព្រឹកថ្ងៃទី៨ ខែមេសា នេះ បានជួបសន្ទនាតាមទូរសព្ទជាមួយរដ្ឋមន្ត្រីការបរទេសអាមេរិក លោក Mike Pompeo។ នេះបើតាមសេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ។ ភាគីទាំងពីរ បង្ហាញពីការយកចិត្តទុកដាក់ជួយគ្នាទៅវិញទៅមក ក្នុងការប្រយុទ្ធប្រឆាំងការរាលដាល COVID-19។
ក្រសួងការបរទេសខ្មែរ បានលើកឡើងថា៖ «លោក Pompeo អរគុណកម្ពុជាចំពោះការជួយសង្គ្រោះអ្នកធ្វើដំណើរលើនាវាកម្សាន្ត Westerdam ហើយសម្តេចអរគុណអាមេរិកចំពោះជំនួយ និងកិច្ចសហការពីសំណាក់អ្នកជំនាញការ [...] ក៏ដូចជាចំពោះទឹកប្រាក់២លានដុល្លារអាមេរិកសម្រាប់ជួយដល់ការប្រឆាំង COVID-19»។
រដ្ឋមន្ត្រីការបរទេសអាមេរិក បានអះអាងពីការបន្តជួយគាំទ្រកម្ពុជាទាក់ទងនឹងកិច្ចប្រឹងប្រែងនានាដើម្បីសុខភាព សុវត្ថិភាពរបស់ប្រជាជនកម្ពុជា។ ជាមួយគ្នានេះដែរ សម្តេច ហ៊ុន សែន បានលើកឡើងពីតួនាទីសំខាន់របស់អាមេរិកក្នុងក្របខណ្ឌអាស៊ាន-អាមេរិក រួមទាំងការចូលរួមចំណែកកាត់បន្ថយគម្លាតរវាងប្រទេសនានាក្នុងតំបន់មេគង្គក្រោម និងសមាជិកអាស៊ានផ្សេងទៀត។
ក្នុងកិច្ចសន្ទនាតាមទូរសព្ទនោះផងដែរ សម្តេច ហ៊ុន សែន និងលោក Pompeo បានចែករំលែកសមានចិត្តក្រៀមក្រំទៅវិញទៅមក ចំពោះគ្រួសារនៃជនរងគ្រោះទាំងឡាយនៅអាមេរិក និងនៅតំបន់អាស៊ី ដោយសារ COVID-19។ ប្រមុខរដ្ឋាភិបាលខ្មែរ ក៏បានផ្តាំផ្ញើការគាំទ្ររបស់សម្តេចជូនលោកប្រធានាធិបតី ដូណាល់ ត្រាំ ក្នុងកិច្ចប្រឹងប្រែងប្រយុទ្ធនឹងជំងឺរាលដាលនេះផងដែរ៕
© រក្សាសិទ្ធិដោយ thmeythmey.com