COVID-19
អន្តរជាតិ
រូបភាព AFP
×![]()
នៅថ្ងៃទី៧ ខែមេសា លោក Rinat Maksyutov ប្រធានមជ្ឈមណ្ឌលស្រាវជ្រាវកំពូលរបស់រុស្ស៉ី បានប្រាប់ប្រធានាធិបតី វ្ល៉ាឌីមៀ ពូទីន ថា មន្ទីរពិសោធន៍របស់លោកបានត្រៀមរួចរាល់ហើយ សម្រាប់ធ្វើតេស្តវ៉ាក់សាំងការពារជំងឺ COVID-19 លើមនុស្សនៅខែមិថុនា។ នេះយោងតាមទីភ្នាក់ងារសារព័ត៍មាន AFP។ 
លោក Rinat Maksyutov ប្រធានមជ្ឈមណ្ឌលរដ្ឋវីរុសវិទ្យា និងជីវបច្ចេកវិទ្យា Vektor បាននិយាយថា មជ្ឈមណ្ឌលរបស់លោកបានលើកសំណើដើម្បីធ្វើតេស្តដំបូងលើមនុស្ស ដោយប្រើប្រាស់វ៉ាក់សាំង៣ប្រភេទ និងមានអ្នកស្ម័គ្រចិត្តចំនួន១៨០នាក់។ ការធ្វើតេស្តនេះ នឹងចាប់ផ្តើមនៅថ្ងៃទី២៩ ខែមិថុនាខាងមុខ។
ក្នុងជំនួបវីដេអូជាមួយ ប្រធានាធិបតី វ្ល៉ាឌីមៀ ពូទីន លោក Maksyutov បានបញ្ជាក់ថា៖ « ក្រុមអ្នកស្ម័គ្រចិត្តត្រូវបានបង្កើតឡើងហើយ។ យើងទទួលបានសំណើពីមនុស្សជាង៣០០នាក់»។
អ្នកវិទ្យាសាស្ត្រនៅមជ្ឈមណ្ឌលពិសោធន៍សំងាត់ខាងលើដែលស្ថិតនៅប្រជុំជន Koltsovo ក្នុងទីក្រុងNovosibirsk ក្រៅតំបន់ស៊ីបេរី បានផលិតគំរូវ៉ាក់សាំងជាច្រើនប្រភេទ។ ការធ្វើតេស្តគំរូវ៉ាក់សាំងទាំងនោះ ក៏ត្រូវបានធ្វើលើសត្វកណ្តុរ ទន្សាយ និងសត្វដទៃទៀតរហូតដល់ថ្ងៃទី ៣០ ខែមេសាដើម្បីកំណត់ពីភាពជោគជ័យរបស់វា។
មជ្ឈមណ្ឌល Vektor គ្រោងនឹងធ្វើតេស្តលើសត្វសិននៅថ្ងៃទី២២ ខែមិថុនា មុននឹងធ្វើតេស្តលើមនុស្ស។ បើតាមលោក Maksyutov បើសិនមានការអនុញ្ញាតពីក្រសួងសុខាភិបាលរុស្ស៉ី ការធ្វើតេស្តវ៉ាក់សាំងលើមនុស្សអាចនឹងចាប់ផ្តើមនៅខែឧសភាតែម្ដង។ លោកបន្ថែមទៀតថា មន្ទីរពិសោធន៍នៅមជ្ឈមណ្ឌល Vektor មានបច្ចេកវិទ្យាដែលធ្លាប់ធ្វើតេស្តមនុស្សសម្រាប់ជំងឺឆ្លងពីមុនៗ និងក៏អាចប្រើសម្រាប់ COVID-19 ដែរ។
មន្ទីរពិសោធន៍ នៅមជ្ឈមណ្ឌល Vektor ធ្លាប់ជាកន្លែងស្រាវជ្រាវអាវុធជីវសាស្ត្រក្នុងជំនាន់សហភាពសូវៀត ហើយក៏មានផ្ទុកផងដែរវីរុសជំងឺអេបូឡា និងជំងឺអុតតូច។
គិតត្រឹមថ្ងៃទី៧ មេសា ចំនួនអ្នកឆ្លង COVID-19 នៅរុស្ស៊ី មានចំនួន៧,៤៩៧នាក់ ចំណែកឯអ្នកស្លាប់មានចំនួន៥៨នាក់ ប៉ុន្តែគេជឿថាចំនួនពិតប្រាកដមានច្រើនជាងនេះ៕
© រក្សាសិទ្ធិដោយ thmeythmey.com
