COVID-19
ជាតិ
សង្គមជាតិ
ស្ថានទូតកម្ពុជា ប្រាប់ពលរដ្ឋខ្មែរនៅម៉ាឡេស៊ី «សូមកុំឲ្យព្យាយាមរកមធ្យោបាយត្រឡប់មកវិញ» ពលរដ្ឋខ្មែរ១១នាក់ចុងក្រោយ នៅព្រលានយន្តហោះកូឡាឡាំពួរ នាយប់ថ្ងៃទី៧ ខែមេសា ឆ្នាំ២០២០ ប៉ងធ្វើដំណើរតាមជើងយន្តហោះ មកកម្ពុជា តែមិនបានជោគជ័យ ក៏ត្រឡប់ទៅកន្លែងស្នាក់នៅរៀងៗខ្លួនវិញ ក្នុងប្រទេសម៉ាឡេស៊ី (រូបពីស្ថានទូតកម្ពុជាប្រចាំនៅម៉ាឡេស៊ី)
× ស្ថានទូកកម្ពុជាប្រចាំប្រទេសម៉ាឡេស៊ី បានអំពាំវនាវដល់ប្រជាពលរដ្ឋ ពលករ និង និស្សិតខ្មែរ ដែលកំពុងធ្វើការនៅប្រទេសម៉ាឡេស៊ី កុំឲ្យព្យាយាមរកមធ្យោបាយត្រឡប់មកកម្ពុជាវិញ នៅអំឡុងពេលនេះ។ ការមិនឲ្យវិលត្រឡប់មកកម្ពុជាអំឡុងពេលនេះ គឺដើម្បីទប់ស្កាត់ការរាលដាល COVID-19។
តាមសេចក្ដីជូនដំណឹង នៅថ្ងៃទី៧ ខែមេសា ឆ្នាំ២០២០ ស្ថានទូតកម្ពុជា បានអំពាវនាវឲ្យពលរដ្ឋខ្មែរ ដែលកំពុងស្នាក់នៅប្រទេសម៉ាឡេស៊ី ព្យាយាមអត់ធ្មត់ ហើយបន្តស្នាក់នៅជាបណ្ដោះអាសន្ននៅកន្លែងដែលខ្លួន កំពុងស្នាក់នៅ រហូតដល់មានការជូនដំណឹងថ្មីពីស្ថានទូត។ ការធ្វើបែបនេះ គឺដើម្បីសុវត្ថិភាពផ្ទាល់ខ្លួន ខណៈពិភពលោកកំពុងមានការរាលដាល COVID-19។
សេចក្តីជូនដំណឹងរបស់ស្ថានទូតកម្ពុជាប្រចាំនៅម៉ាឡេស៊ី គឺធ្វើឡើងបន្ទាប់ពីសម្តេចនាយករដ្ឋមន្ត្រី ហ៊ុន សែន បដិសេធមិនយន្តហោះមួយគ្រឿង ដឹកពលរដ្ឋខ្មែរ១៥០នាក់ ពីម៉ាឡេស៊ី មកកម្ពុជា កាលពីថ្ងៃទី៧ ខែមេសា ឆ្នាំ២០២០។ ក្នុងសន្និសីទកាសែតស្តីពីបច្ចុប្បន្នភាពនៃជំងឺកូវីដ-១៩ នៅកម្ពុជា សម្តេចនាយករដ្ឋមន្ត្រី សុំការយោគយល់ពីប្រជាពលរដ្ឋខ្មែរទាំង១៥នោះ ចំពោះការសម្រេចមិនអនុញ្ញាតឲ្យធ្វើដំណើរចូលមកម្ពុជានាពេលនេះ ដោយខ្លាចរាលដាលជំងឺកូវីដ-១៩។
នៅយប់ម៉ោង១២ ថ្ងៃទី៧ ខែមេសា ឆ្នាំ២០២០ មន្ត្រីស្ថានទូតកម្ពុជា បានចុះទៅដោយផ្ទាល់ដល់ព្រលានយន្តហោះទីក្រុងគូឡាឡាំពួរ ដីម្បីសម្របសម្រួលឲ្យពលរដ្ឋខ្មែរ១១នាក់ចុងក្រោយ ដែលប៉ងវិលត្រឡប់មកកម្ពុជា តែមិនបានជោគជ័យ ឲ្យបានវិលទៅកាន់ទីកន្លែងស្នាក់នៅរបស់ពួកគាត់វិញ ក្នុងប្រទេសម៉ាឡេស៊ី។ នេះបើតាមព័ត៌មាន ដែលបង្ហោះលើទំព័រហ្វេសប៊ុករបស់ស្ថានទូតកម្ពុជាប្រចាំនៅម៉ាឡេស៊ី។
ទន្ទឹមនឹងនេះ តាមរយៈសេចក្តីជូនដំណឹងដដែល ស្ថានទូតកម្ពុជាប្រចាំប្រទេសម៉ាឡេស៊ី អំពាវនាវឲ្យប្រជាពលរដ្ឋខ្មែរទាំងអស់ ត្រូវប្រកាន់ខ្ជាប់វិធានការការពារ COVID-19 របស់បទបញ្ជាត្រួតពិនិត្យរបស់រដ្ឋាភិបាលម៉ាឡេស៊ី។ វិធានការនៃការការពារ COVID-19 ដែលពលរដ្ឋត្រូវអនុវត្ដ រួមមានការរក្សាអនាម័យ លាងដៃនឹងសាប៊ូឬអាល់កុល រក្សាគម្លាតពីគ្នាយ៉ាងតិច១ម៉ែត្រ និងហាមធ្វើដំណើរទៅកន្លែងអាជ្ញាធរម៉ាឡេស៊ីបានហាមឃាត់៕
Tag:
ពលខ្មែរនៅម៉ាឡេស៊ី
COVID-19
© រក្សាសិទ្ធិដោយ thmeythmey.com