រដ្ឋាភិបាល កាត់ចំណាយ៤៧៥លានដុល្លារទៀត ដែលឡើង៩១៨លានដុល្លារ សម្រាប់ប្រយុទ្ធប្រឆាំងCOVID-19

COVID-19

ជាតិ

រដ្ឋាភិបាល កាត់ចំណាយ៤៧៥លានដុល្លារទៀត ដែលឡើង៩១៨លានដុល្លារ សម្រាប់ប្រយុទ្ធប្រឆាំងCOVID-19

08, Apr 2020 , 5:59 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ដើម្បីទប់ស្កាត់ និងប្រយុទ្ធប្រឆាំងនឹងជំងឺCOVID-19នោះ សម្ដេចនាយករដ្ឋមន្ត្រី បានសម្រេចកាត់បន្ថយការចំណាយ៤៧៥លានដុល្លារថែមទៀត ដែលឡើង៩១៨លានដុល្លារ។ ថវិកាទាំងនេះ បានមកពីការកាត់បន្ថយចំណាយតាមក្រសួងរដ្ឋនានា។

សម្ដេច ហ៊ុន សែន បានបញ្ជាក់ថា ការកាត់ចំណាយថវិកាជាតិលើកទី២នេះ ដើម្បីត្រៀមបម្រុងទុកសម្រាប់ទិញសម្ភារនិងបរិក្ខាពេទ្យ ព្រមទាំងស្បៀងអាហារស្តុកទុក សម្រាប់ជួយប្រជាពលរដ្ឋក្នុងស្ថានភាពដែលមិនអាចមើលឃើញនាពេលខាងមុខ។

ថ្លែងក្នុងសន្និសីទកាសែត កាលពីថ្ងៃទី៧ មេសា សម្ដេច ហ៊ុន សែន បាននិយាយដូច្នេះថា៖«ខ្ញុំសុំការយោគយល់ពីស្ថាប័នជាតិគ្រប់ថ្នាក់ ទាំងថ្នាក់ជាតិ និង ថ្នាក់ក្រោមជាតិ ដែលរាជរដ្ឋាភិបាលត្រូវបង្ខំចិត្តកាត់បន្ថយការចំណាយពីរដង លើកទីមួយ គឺកាត់បន្ថយការចំណាយចំនួន ៤៤៣លានដុល្លារអាមេរិក និងលើកទីពីរនេះ កាត់បន្ថយការចំណាយចំនួន៤៧៥លានដុល្លារអាមេរិកថែមទៀត។ បូកសរុបទាំងពីរលើកនេះគឺមានចំនួន៩១៨លាន ដុល្លារអាមេរិក សម្រាប់ប្រយុទ្ធប្រឆាំងនឹងជំងឺកូវីដ-១៩ »។

កាលពីដើមខែមីនា កន្លងមកសម្ដេច ហ៊ុន សែន បានប្រកាសកាត់បន្ថយការចំណាយនៅតាមក្រសួងនានា៥០ភាគរយ លើកលែងតែស្ថាប័នបីប៉ុណ្ណោះ គឺក្រសួងការបរទេស ក្រសួងពាណិជ្ជកម្ម និង ទីស្តីការគណៈរដ្ឋមន្ត្រី ដែលត្រូវកាត់បន្ថយចំណាយត្រឹម២៥ភាគរយ។ ក្រៅពីនេះប្រមុខរដ្ឋាភិបាល ក៏បានណែនាំឱ្យស្ថាប័នទាំងអស់ កាត់បន្ថយការចំណាយណា ដែលមិនត្រូវចាំបាច់ផងដែរ។

ថវិកាជាតិនៅឆ្នាំ២០២០នេះ មាន៨,២២៣លានដុល្លារ ក្នុងនោះចំណាយចរន្តថវិការដ្ឋ ៤,៨៨៨លានដុល្លារ និងចំណាយមូលធនថវិការដ្ឋ ៣,៣៣៥លានដុល្លារ។

សម្រាប់ថវិកាទប់ស្កាត់ការឆ្លងជំងឺCOVID-19នេះ រដ្ឋាភិបាល ក៏បានតាមរៃអង្គាសប្រាក់ពីសប្បុរសជន និងពីមន្ត្រីរាជការ បានជាង១១លានដុល្លារអាមេរិកដែរ។

គិតត្រឹមថ្ងៃទី៧ មេសានេះ កម្ពុជា មានអ្នកឆ្លងជំងឺCOVID-19 ចំនួន១១៧នាក់ ក្នុងនោះអ្នកជាសះស្បើយ៦៣នាក់។ អ្នកជាសះស្បើយទាំងនោះ រួមមានខ្មែរ៣២នាក់ បារាំង១៩នាក់ ម៉ាឡេស៊ី៧នាក់ អង់គ្លេស៣នាក់ បែលហ្ស៊ិក១នាក់ និងចិន១នាក់៕