ឃាតកសម្លាប់បិតាឯករាជ្យជាតិបង់ក្លាដែស ត្រូវចាប់ខ្លួន២៥ឆ្នាំក្រោយរត់ពីទោសប្រហារជីវិត

អន្តរជាតិ

ឃាតកសម្លាប់បិតាឯករាជ្យជាតិបង់ក្លាដែស ត្រូវចាប់ខ្លួន២៥ឆ្នាំក្រោយរត់ពីទោសប្រហារជីវិត

09, Apr 2020 , 8:29 am

រូបភាព

បិតាឯករាជ្យជាតិបង់ក្លាដែស លោក Sheikh Mujibur Rahman ឪពុករបស់នាយករដ្ឋមន្ត្រីបង់ក្លាដែស អ្នកស្រី Sheikh Hasina (AFP)

ដោយ:

អតីតមេបញ្ជាការកងទ័ពបង់ក្លាដែសម្នាក់ ត្រូវបានឃាត់ខ្លួន ជិត២៥ឆ្នាំក្រោយរត់គេចខ្លួនពីបទចោទសម្លាប់បិតាឯករាជ្យរបស់ប្រទេសនេះ។ បើតាមរដ្ឋមន្ត្រីយុត្តិធម៌បង់ក្លាដែស នៅថ្ងៃទី៨ ខែមេសា ឃាតកររូបនេះ នឹងត្រូវកាត់ទោសប្រហារជីវិត។

លោក Sheikh Mujibur Rahman ឪពុករបស់នាយករដ្ឋមន្ត្រីបង់ក្លាដែស អ្នកស្រី Sheikh Hasina ត្រូវបានឃាតករសម្លាប់ អមជាមួយសមាជិកគ្រួសារគាត់មួយចំនួនធំក្នុងរដ្ឋប្រហារយោធាមួយ កាលពីថ្ងៃ ១៥ ខែសីហា ឆ្នាំ១៩៧៥ ពោលគឺជិត៤ឆ្នាំបន្ទាប់ពីលោកបានដឹកនាំប្រទេសបង់ក្លាដែសទាមទារឯករាជ្យពីប៉ាគីស្ថាន។

ក្នុងឆ្នាំ ១៩៩៨ អតីតមេបញ្ជាការយោធា Abdul Majed ត្រូវបានកាត់ទោសប្រហារជីវិតរួមជាមួយមន្ត្រីយោធារាប់សិបនាក់ទៀតពីបទឃាតកម្មនេះ។ តុលាការជាន់ខ្ពស់បង់ក្លាដែស បានតម្កល់សាលក្រមនេះក្នុងឆ្នាំ ២០០៩ ហើយឃាតក ៥ នាក់ត្រូវបានប្រហារជីវិតប៉ុន្មានខែក្រោយមក។

លោក Majed ត្រូវបានជឿថាបានរត់ភៀសខ្លួនទៅកាន់ប្រទេសឥណ្ឌាក្នុងឆ្នាំ១៩៩៦ ហើយលោកបានត្រលប់មកកាន់ប្រទេសបង់ក្លាដែសវិញ កាលពីខែមីនា ឆ្នាំ២០២០នេះ។ រដ្ឋអាជ្ញាបង់ក្លាដែស បញ្ជាក់ប្រាប់ទីភ្នាក់ងារព័ត៌មាន AFP បែបនេះ។ ប៉ូលីសប្រឆាំងភេរវកម្មបានចាប់ខ្លួនលោក Majed កាលពីថ្ងៃទី៧ ខែមេសា នៅពេលលោកកំពុងជិះរថយន្តដឹកទំនិញក្នុងរដ្ឋធានីដាក្កា។

រដ្ឋមន្ត្រីក្រសួងយុត្តិធម៌បង់ក្លាដែស Anisul Huq បញ្ជាក់ថា៖«នីតិវិធីផ្លូវច្បាប់នៃការប្រហារជីវិតលោក Majed បានចាប់ផ្តើមរួចហើយ»។ លោក បន្តថា អតីតមន្ត្រីយោធារូបនេះនឹងមិនអាចប្តឹងឧទ្ធរណ៍ចំពោះការកាត់ទោសរបស់គាត់បានទេ។

អ្នកស្រីនាយករដ្ឋមន្ត្រី Sheikh Hasina បានរួចផុតពីការវាយប្រហារឆ្នាំ១៩៧៥ ព្រោះនៅពេលនោះអ្នកស្រីបានរស់នៅតំបន់អឺរ៉ុបជាមួយប្អូនស្រី។ ក្នុងសារវីដេអូមួយ រដ្ឋមន្ត្រីមហាផ្ទៃ បង់ក្លាដែស ចាត់ទុកការចាប់ខ្លួនលោក Majed ជាអំណោយដ៏ពិសេសមួយសម្រាប់ប្រជាជាតិ។

ផ្លូវឆ្ពោះទៅរកយុត្តិធម៌សម្រាប់ឃាតកម្មឆ្នាំ១៩៧៥ គឺមានរយៈយូរ ហើយការសម្លាប់បិតាឯករាជ្យនេះបន្តបំពុលឆាកនយោបាយបង់ក្លាដែសមកដល់សព្វថ្ងៃ។ រដ្ឋាភិបាលបង្ដុបដោយរដ្ឋប្រហារ បានផ្ដល់លាភសក្ការៈដល់ក្រុមឃាតករជាមួយតំណែងក្នុងជួររដ្ឋាភិបាល និងមួយចំនួននៃពួកគេ ត្រូវបានអនុញ្ញាតឲ្យបង្កើតបក្សនយោបាយមួយ ហើយចូលប្រកួតការបោះឆ្នោតអំឡុងទសវត្សរ៍ឆ្នាំ១៩៨០។

សម្រាប់ពេល២១ឆ្នាំ ច្បាប់មួយដែលបង្កើតឡើងដោយរដ្ឋាភិបាលរដ្ឋប្រហារហាមឃាត់ការកាត់ទោសក្រុមឃាតករ។ ច្បាប់នេះត្រូវបានកែប្រែ ក្រោយអ្នកស្រីនាយករដ្ឋមន្ត្រី Hasina ឡើងកាន់តំណែងក្នុងឆ្នាំ១៩៩៦ ។ អ្នកស្រី ក៏បានចោទប្រកាន់លោក Ziaur Rahman ដែលជាប្រធានាធិបតីពីឆ្នាំ១៩៧៧ ដល់ពេលឃាតកម្មលោកក្នុងឆ្នាំ១៩៨១ ថា បានរៀបចំផែនការសម្លាប់ឪពុកអ្នកស្រីផងដែរ៕