COVID-19
កីឡាអន្តរជាតិ
អន្តរជាតិ
មេ UEFA ថា Liverpool នឹងលើកពាន បើ Premier League ត្រូវរំសាយដោយវិបត្តិ COVID-19
× លោក Aleksander Ceferin ប្រធានសហព័ន្ធកីឡាបាល់ទាត់អឺរ៉ុប (UEFA) យល់ឃើញថា គ្មានផ្លូវដែល Liverpool ត្រូវគេបដិសេធក្នុងការឈ្នះពាន Premier League នៅរដូវកាលនេះទេ ទោះបីលីគត្រូវបញ្ឈប់ដោយសារតែជំងឺរាតត្បាត COVID-19 ក៏ដោយ។
ក្រុមរហស្សនាមហង្សក្រហមមាន២៥ពិន្ទុនាំមុខដាច់ក្នុងតារាងលីគកំពូលអង់គ្លេស បន្ទាប់ពីឆ្លងកាត់ការប្រកួត២៩លើក មុនពេលលីគត្រូវផ្អាកបណ្តោះអាសន្នដោយសារជំងឺឆ្លង COVID-19 កាលពីខែមុន។
មកដល់ពេលនេះ គេនៅតែមិនទាន់ច្បាស់ទេថាពេលណាទើបការប្រកួតលីគដែលនៅសេសសល់រដូវកាលនេះនឹងចាប់ផ្តើមពេលណានោះទេ ខណៈ COVID-19 កាន់តែរីករាលដាលខ្លាំងពេញពិភពលោក។ បើទោះយ៉ាងនេះក្តី លោក Ceferin អះអាងថាក្រុមដែលដឹកនាំដោយលោក Jurgen Klopp ស្ទើរតែក្លាយជាជើងឯក Premier League ទៅហើយ ដែលជាការឈ្នះលើកដំបូងចាប់តាំងពីឆ្នាំ ១៩៩០ មក។
ប្រធាន UEFA បានប្រាប់កាសែតកីឡា Ekipa ថា៖« ខ្ញុំមិនមានវិធីសាស្ត្រណាដែលអាចធ្វើឲ្យ Liverpool មិនអាចឈ្នះជើងឯកបានឡើយ។ ប្រសិនបើការប្រកួតនៅបន្តលេងនោះពួកគេប្រាកដជានឹងឈ្នះពានមិនខាន - តាមទ្រឹស្តីកីឡាពួកគេនៅមិនទាន់ឈានដល់កម្រិតធានាមែន ប៉ុន្តែវាពិតជាកៀកនឹងឈ្នះណាស់»។
លោកបន្ថែមថា ទោះបីការប្រកួតមិនបន្ត ក៏ចាំបាច់ត្រូវប្រកាសលទ្ធផលតាមវិធីសាស្ត្រផ្សេងៗហើយក៏គួរតែត្រូវកំណត់ថាក្រុមណាជាជើងឯកដែរ ហើយគ្មានហេតុផលណាដែលថាមិនមែនជា Liverpool នោះដែរ។
Ceferin ក៏បានទទូចថាផែនការខាងលើនឹងប្រើសម្រាប់លីគនៅជុំវិញពិភពលោក ក្នុងការបញ្ចប់លីគទោះសល់ការប្រកួតក្តី៕
Tag:
COVID-19
UEFA
Premier League
Liverpool
© រក្សាសិទ្ធិដោយ thmeythmey.com