ដោយមានពេលសម្រាកពីការងារខ្លះព្រោះការរាតត្បាតកូវីដ១៩ ក្លើ សំណាង និងសុធីរ មានពេលច្រើនជាងពេលណាៗទាំងអស់ក្នុងការតាមដានព័ត៌មាននៃការវិវិត្តមេរោគកូរូណា និងផលបះពាល់របស់វាទៅលើជីវិតមនុស្ស និងសេដ្ឋកិច្ច។ ថ្ងៃនេះ សុធីរ និងសំណាង លើកយកទំទាក់ទំនងឥទ្ធិពលកូវីដ១៩ និងវិស័យកសិកម្មខ្មែរ។
សំណាង៖ អា សុធីរ! នៅក្នុងបរិបទកូវីដ១៩នេះ ជំនួញមួយចំនួនទ្រឹង ឬងាប់តែម្តង តែរបររកស៊ីផ្នែកម្ហូបអាហារដូចជាត្រូវប៉ាន់?
សុធីរ៖ អើ ត្រូវហើយ! មាននរណាទៅទិញឡានធ្វើអីទៀត! មាននរណាទៅទិញផ្ទះធ្វើអ្វីទៀតអ្ហា! គិតតែពីរឿងថា តើមានអីស៊ីឬអត់? ឥឡូវនេះ គេលែងគិតរឿងផ្សេងហើយ គេគិតតែរឿងបំពេញក្រពះទេតើ។
សំណាង៖ អ៊ីចឹង ប្រទេសកសិកកម្ម ដូចកម្ពុជាយើង ពិតជាត្រូវប៉ាន់ហើយពេលនេះមិនថា អ៊ីចឹង?
សុធីរ៖ វាអាស្រ័យទេថា តើយើងផលិតបានហូបគ្រប់គ្រាន់ហើយឬនៅ? យើងបានផលិតសម្រាប់ការនាំចេញហើយឬនៅ?
សំណាង៖ តើកម្ពុជាបានធ្វើរឿងពីរខាងលើដែលអ្ហែងលើកឡើងហ្នឹងរួចហើយឬនៅ?
សុធីរ៖ បើតាមអញដឹងតាមរបាយការណ៍ខ្លះ កម្ពុជានៅបន្តនាំចូលច្រើនផលិតផលកសិកម្មពីបរទេសដើម្បីបំពេញសេចក្តីត្រូវការក្នុងស្រុក ដូចជា បន្លែ ផ្លែឈើ ត្រី សាច់។ល។ បើនិយាយពីកម្ពុជានាំចេញវិញ មានដែរ តែតិចតួចទេ។ កម្ពុជានាំចេញ ជាពិសេស តែអង្ករទេ។ សរុបមកវិញ កម្ពុជានៅពឹងលើទីផ្សារខាងក្រៅច្រើនជាងការផលិតក្នុងស្រុក។ យើងនៅផលិតបានតិចតួចណាស់។
សំណាង៖ បើស្តាប់អ្ហែងពន្យល់ទៅ យើងមិនអាចត្រូវប៉ាន់ពីបរិបទគ្រោះអាសន្នកូវីដ១៩នេះទេ?
សុធីរ៖ កុំនិយាយរឿងត្រូវប៉ាន់។ និយាយត្រឹមផលិតចិញ្ចឹមខ្លួនឯងឲ្យរស់ទៅបានហើយ។ ដូចអញនិយាយប្រាប់អ្ហែងពីខាងដើមអ៊ីចឹង បើយើងអាចផលិតបានច្រើន ឬក៏លើសតម្រូវការសម្រាប់ការនាំចេញទៀត ពេលនោះ ទើបយើងអាចនិយាយបានថា បរិបទប្រឈមកូវីដ១៩នេះ គឺជាឱកាសដ៏ល្អសម្រាប់វិស័យកសិកម្មដែលយើងជាប្រទេសកសិកម្មស្រាប់។ តែបើយើងនៅបន្តនាំចូលដដែល វាមិនមែនជាឱកាសទេ។ តែទោះជាយ៉ាងណាក៏ដោយ អញគិតឃើញថា កូវីដ១៩នេះ បាន និងកំពុងចាក់ចង្កេះ«ក្រសួងកសិកម្ម»ខ្មែរ ឲ្យចេះប្រឹងប្រែងជំរុញការដាំដុះ កែច្នៃផលិតផលកសិកម្មដើម្បីបំពេញសេចក្តីត្រូវការខ្លួនឯងដោយមិនបាច់ពឹងគេ ឬដកដង្ហើមតាមគេ។ បើយើងខ្វះផលិតផលអាហារបរិភោគ ចុះចៃដន្យ គ្រាអាសន្នកូវីដ១៩ បង្ខំឲ្យប្រទេសជិតខាងបិទព្រំដែន តើយើងបានអ្វីស៊ី? ចំណុចនេះ អា សំណាង! ក្រសួងកសិកម្មត្រូវពិនិត្យឲ្យបានហ្មត់ចត់មែនទែន។ អត់អីបាន អត់អីស៊ីនេះ មិនកើតទេវើយ៕
ចំណាំ៖ ក្នុងមួយឆ្នាំៗកម្ពុជាបានចំណាយថវិកាមិនក្រោម២០០លានដុល្លារឡើយ ដើម្បីនាំចូលបន្លែ និង ផ្លែឈើពីប្រទេសជិតខាង។ ក្នុងនោះ កម្ពុជាបាននាំបន្លែពី២០០ទៅ៤០០តោនក្នុងមួយថ្ងៃៗ ពីវៀតណាម ដើម្បីបំពេញតម្រូវការក្នុងស្រុកសរុបជាង១ពាន់តោន។ បច្ចុប្បន្ន កម្ពុជាអាចផ្គត់ផ្គង់បន្លែក្នុងស្រុកជាមធ្យម ពី៥០០ទៅ៦០០តោនក្នុងមួយថ្ងៃ។ ក្នុងនោះមាន បន្លែសុវត្ថិភាព២០ទៅ៣០ភាគរយ និងមាន១០ភាគរយ ជាបន្លែសរីរាង្គ។