ជាតិ
នយោបាយជាតិ
រដ្ឋសភា នឹងពិភាក្សាអនុម័តសេចក្តីព្រាងច្បាប់ គ្រប់គ្រងប្រទេសក្នុងភាពអាសន្ន នៅថ្ងៃទី១០មេសា
× ភ្នំពេញ៖ រដ្ឋសភា នឹងប្រជុំពេញអង្គលើកទី៤ នីតិកាលទី៦ ដើម្បីពិភាក្សា និងអនុម័តលើសសេចក្តីព្រាងច្បាប់ស្តីពី ការគ្រប់គ្រងប្រទេសជាតិស្ថិតក្នុងភាពអាសន្ន នៅថ្ងៃទី១០ មេសា។ នេះបើតាមការសម្រេចក្នុងអង្គប្រជុំគណៈកម្មាធិការអចិន្ត្រៃយ៍រដ្ឋសភា នាព្រឹកថ្ងៃទី៩ មេសា។
ក្រៅពីកិច្ចប្រជុំអនុម័តលើសេចក្តីព្រៀងច្បាប់នេះ រដ្ឋសភាក៏នឹងបោះ ឆ្នោតជ្រើសតាំង និងផ្លាស់ប្តូរសមាជិកគណៈកម្មការជំនាញរដ្ឋសភាមួយចំនួនទៀតផង។ នេះបើតាមហ្វេសប៊ុកសម្ដេច ហេង សំរិន ប្រធានរដ្ឋសភា។
សម្ដេច ហ៊ុន សែន បានបញ្ជាក់ថា មាត្រា២២នៃរដ្ឋធម្មនុញ្ញកម្ពុជា បានចែងពីការដាក់ប្រទេសក្នុងគ្រាអាសន្ន ប៉ុន្តែមិនបានចែងពីការគ្រប់គ្រងស្ថានភាពឡើយ ទើបតម្រូវឱ្យរដ្ឋាភិបាលសម្រេចបង្កើតច្បាប់ ដើម្បីងាយស្រួលគ្រប់គ្រង។ «មិនទាន់មានច្បាប់ណា ដាក់ប្រទេសក្នុងគ្រាអាសន្ននោះទេ ប៉ុន្តែចង់មិនចង់ ច្បាប់មួយត្រូវបង្កើតឡើង ដើម្បីឱ្យផ្ដល់ភាពងាយស្រួលក្នុងការដាក់ប្រទេសក្នុងគ្រាអាសន្ន បានដោយរលូន»។ នេះជាការបញ្ជាក់របស់សម្ដេច ហ៊ុន សែន។
សម្ដេច ហ៊ុន សែន ក៏អំពាវនាវឱ្យពលរដ្ឋ កុំព្រួយបារម្ភចំពោះច្បាប់នេះដែរ ព្រោះសម្ដេចគ្រាន់តែចង់បង្កើតច្បាប់គ្រប់គ្រងប្រទេសក្នុងគ្រាអាសន្ននេះ ដើម្បីឱ្យមាននៅក្នុងដៃប៉ុណ្ណោះ ហើយក៏មិនច្បាស់ថា នឹងត្រូវអនុវត្តភ្លាមៗដែរ បើសិនជាស្ថានការណ៍ជំងឺCOVID-19 នៅក្នុងប្រទេសមិនទាន់ដល់កម្រិតធ្ងន់ធ្ងរ៕
Tag:
ហ៊ុន សែន
នយោបាយ
ច្បាប់
© រក្សាសិទ្ធិដោយ thmeythmey.com