COVID-19
ជាតិ
សង្គមជាតិ
លោក Zhao Lijian អ្នកនាំពាក្យការបរទេសចិន ថ្លែងក្នុងសន្និសីទកាសែត នៅថ្ងៃទី៨ ខែមេសា ឆ្នាំ២០២០ (រូបពីក្រសួងការបរទេសចិន)
×![]()
ដោយ: ថ្មីៗ
លោក Zhao Lijian អ្នកនាំពាក្យការបរទេសចិន អះអាង ក្នុងសន្និសីទ នៅថ្ងៃទី៨ ខែមីនា ឆ្នាំ២០២០ ថា ចិន ត្រៀមខ្លួនរួចហើយ ក្នុងការបន្តផ្តល់ការគាំទ្រនិងជំនួយដល់កម្ពុជា បើមានតម្រូវការកើតឡើង។ លោក សង្កត់ធ្ងន់ថា៖«ដោយការរួមដៃគ្នា យើង នឹងទទួលបានជ័យជម្នះ ក្នុងការប្រយុទ្ធប្រឆាំងនឹងជំងឺកូវីដ-១៩ ក្នុងពេលឆាប់ៗ»។
លោក Zhao Lijian លើកឡើងពីការជ្រោមជ្រែងរបស់ចិន ដល់កម្ពុជា នៅពេលអ្នកកាសែត សួរលោក អំពីបេសកកម្មរបស់ក្រុមគ្រូពេទ្យចិន៧នាក់ ដែលបានមកជួយកម្ពុជា ក្នុងការប្រយុទ្ធប្រឆាំងនឹងជំងឺកូវីដ-១៩ ហើយបានត្រឡប់ទៅវិញ។ លោក និយាយថា ក្នុងអំឡុងនៃការបំពេញបេសកកម្មនៅកម្ពុជា ក្រុមគ្រូពេទ្យទាំងនោះ បានទៅទស្សនកិច្ចតាមកន្លែងនានា រួមមាន មន្ទីរពេទ្យ សហគមន៍ ព្រលានយន្តហោះ សណ្ឋាគារ និង តំបន់ឧស្សាហកម្ម ជាដើម។
លោក បន្តថា ក្រុមគ្រូពេទ្យទាំងនោះ បានផ្តល់យោបល់និងចែករំលែកបទពិសោធ អំពីការធ្វើរោគវិនិច្ឆ័យនិងការព្យាបាលជំងឺដែលមានសភាពធ្ងន់ធ្ងរ (កូវីដ-១៩)។ លើសពីនេះ ពួកគេ ក៏បានណែនាំនិងផ្តល់ជំនួយវេជ្ជសាស្ត្រដល់ពលរដ្ឋចិន ដែលកំពុងស្ថិតនៅក្នុងប្រទេសកម្ពុជាផងដែរ។
អ្នកនាំពាក្យការបរទេសចិន មានប្រសាសន៍ថា ក្រុមគ្រូពេទ្យទាំងនោះ បានទទួលការកោតសរសើរពីប្រជាពលរដ្ឋកម្ពុជា។ លោក បានលើកពាក្យរបសសម្តេចនាយករដ្ឋមន្ត្រី ហ៊ុន សែន ទៅថ្លែងក្នុងសន្និសីទសារព័ត៌មានថា «ស្រឡាញ់គ្នាក្នុងពេលក្រ ស្គាល់មិត្តល្អ ក្នុងគ្រាលំបាក»។ លោក បញ្ជាក់ថា៖«ការបញ្ជូនអ្នកជំនាញវេជ្ជសាស្ត្រចិន ទៅជួយកម្ពុជា គឺជាផ្នែកមួយនៃមិត្តភាពពិតប្រាកដរបស់ពួកយើង»។
ក្រុមគ្រូពេទ្យចិនទាំង៧នាក់ បានមកដល់កម្ពុជា នៅថ្ងៃទី២៣ ខែមីនា ឆ្នាំ២០២០ និងបានត្រឡប់ទៅវិញនៅថ្ងៃទី៧ ខែមេសា ក្រោយបញ្ចប់បេសកកម្ម។ បច្ចុប្បន្ន នៅមានគ្រូពេទ្យយោធាចិន៤នាក់ទៀត កំពុងមានវត្តមាននៅកម្ពុជា ដើម្បីជួយផ្តល់បទពិសោធដល់គ្រូពេទ្យយោធាកម្ពុជា។ គេ មិនទាន់ថា ពួកគេ នឹងត្រឡប់ទៅវិញនៅថ្ងៃណាឡើយ។
ចិន គ្រោងបញ្ចូនក្រុមគ្រូពេទ្យ១៣នាក់បន្ថែមទៀត មកកម្ពុជា ក្នុងអំឡុងខែមេសានេះ។ ក្រៅពីបញ្ជូនក្រុមគ្រូពេទ្យមកកម្ពុជា ចិន ក៏បានផ្តល់ម៉ាស់ សម្លៀកបំពាក់ពេទ្យ សម្ភារពេទ្យ និង ថវិកាផងដែរ ដើម្បីប្រយុទ្ធប្រឆាំងនឹងជំងឺកូវីដ-១៩។
នៅកម្ពុជា មានអ្នកឆ្លងជំងឺកូវីដ-១៩ ១១៨នាក់ហើយ ដោយក្នុងនោះ បានជាសះស្បើយវិញ៦៨នាក់ គិតមកដល់ព្រឹកថ្ងៃទី៩ ខែមេសា ឆ្នាំ២០២០។ ក្នុងចំណោមអ្នកជំងឺកូវីដ-១៩ ៥០នាក់ ដែលកំពុងសម្រាកព្យាបាល មានម្នាក់ បានលាប់ឡើងវិញ គឺរូបគេ បានជាសះស្បើយហើយ តែត្រឡប់ទៅមានជំងឺនេះម្តងទៀត៕
Tag:
COVID-19
ចិន-កម្ពុជា
ជំនួយ
© រក្សាសិទ្ធិដោយ thmeythmey.com
