អន្តរជាតិ
លោក ត្រាំ និងលោក បៃឌិន ប្រជែងគ្នាអូសទាញអ្នកគាំទ្រលោក សេនដឺ
× លោក ចូ បៃឌិន ដែលមានសង្ឃឹមក្លាយជាបេក្ខជនប្រធានាធិបតីតំណាងបក្សប្រជាធិបតេយ្យ បានអំពាវនាវឲ្យអ្នកគាំទ្របក្សទាំងអស់រួបរួមដើម្បីសម្រេចគោលដៅឈានទៅគ្រប់គ្រងសេតវិមាន។ នៅថ្ងៃទី៨ ខែមេសា លោក បៃឌិន បានស្នើឲ្យអ្នកគាំទ្រលោក បេននី សេនដឺ ចូលរួមជាមួយលោក ក្រោយលោក សេនដឺ បោះបង់ការប្រជែងកៅអីបេក្ខជនតំណាងបក្សហើយនោះ។ ប្រធានាធិបតី ដូណាល់ ត្រាំ ក៏បានបោះដៃទៅរកអ្នកគាំទ្រលោក សេនដឺ ផងដែរ។
នៅថ្ងៃទី៨ ខែមេសាលោក បេននី សេនដឺ បានប្រកាសដកខ្លួនចេញពីបេក្ខភាពប្រជែងតំណែងប្រធានាធិបតីអាមេរិកពីខាងគណបក្សប្រជាធិតេយ្យ។ ការដកខ្លួនរបស់អ្នកនយោបាយវ័យ៧៨ឆ្នាំរូបនេះ មានន័យថា អតីតអនុប្រធានាធិបតីអាមេរិក ចូ បៃឌិន តែម្នាក់គត់ដែលត្រូវត្រៀមខ្លួនប្រជែងជាមួយលោកប្រធានាធិបតី ដូណាល់ ត្រាំ ពីគណបក្សសាធារណរដ្ឋ សម្រាប់ការបោះឆ្នោតខែវិច្ឆិកាខាងមុខ។
ពេលនេះ អ្នកគាំទ្ររបស់លោក សេនដឺ កំពុងក្លាយជាមុខសញ្ញាអូសទាញរបស់លោក បៃឌិន និងលោក ត្រាំ ។ ក្រោយលោក សេនដឺ ប្រកាសផ្អាកយុទ្ធនាការ លោក បៃឌិន និយាយសរសើរអតីតគូប្រជែងរបស់ខ្លួនថា ជាមនុស្សល្អ មេដឹកនាំអស្ចារ្យ និងជាសំឡេងដ៏មានឥទ្ធិពលបំផុតដើម្បីការផ្លាស់ប្ដូរក្នុងប្រទេស។ លោក បៃឌិន បានស្នើឲ្យអ្នកគាំទ្រលោក សេនដឺ ចូលរួមក្នុងយុទ្ធនាការរបស់លោក ដូចអ្នកគាំទ្របេក្ខជនដទៃទៀត។
អ្នកគាំទ្រលោក សេនដឺ ភាគច្រើនមកពីវណ្ណៈកម្មករដែលកម្លាំងដ៏សំខាន់សេដ្ឋកិច្ចអាមេរិក។ កាលពីឆ្នាំ២០១៦ លោក ត្រាំ ទទួលបានការគាំទ្រខ្លាំងពីអ្នកបោះឆ្នោតមកពីក្រុមប្រជាជននេះទើបអាចទទួលសំឡេងច្រើន។
«ខ្ញុំឃើញអ្នក។ ខ្ញុំឮសំឡេងអ្នក ហើយខ្ញុំយល់ពីភាពបន្ទាន់នៃអ្វីដែលយើងត្រូវធ្វើដើម្បីប្រទេសជាតិ។ ខ្ញុំសង្ឃឹមថា អ្នកនឹងចូលរួមជាមួយយើង។ អ្នកត្រូវបានស្វាគមន៍៍...។» លោក បៃឌិន និយាយបែបនេះក្នុងសារទៅកាន់អ្នកគាំទ្រលោក សេនដឺ និងរបស់លោកផ្ទាល់។ ជាមួយនឹងក្ដីសង្ឃឹមស្ទើរមួយរភាគរយទៅហើយនោះ លោក បៃឌិន ក៏បានបញ្ជាក់ជាថ្មី បេក្ខភាពអនុប្រធានាធិបតីរបស់លោកសម្រាប់ការបោះឆ្នោតខាងមុខ នឹងនៅតែជាស្ត្រីដដែល។
លោក ត្រាំ ឯណោះវិញ ក៏សំលឹងឃើញអ្នកគាំទ្រលោក សេនដឺ ដែរ ប៉ុន្តែវិធីសាស្ត្រទាក់ទាញរបស់លោកខុសពីលោក បៃឌិន ។ លោក ត្រាំ បានសរសេរលើ Twitter ថា លោក សេនដឺ ចាកចេញហើយ ដូចនេះមនុស្សរបស់លោកគួរចូលរួមជាមួយបក្សសាធារណរដ្ឋវិញដើម្បីបន្តនយោបាយពាណិជ្ជកម្ម។ លោក ត្រាំ ក៏ឆ្លៀតនិយាយបញ្ឈឺលោក សេនដឺ ថា សំឡេងក្រុមសេរីនិយមក្នុងបក្សប្រជាធិបតេយ្យ ត្រូវបានបំបែកដោយសារអ្នកស្រី Elizabeth Warren បន្តប្រជែង ហើយលោក បៃឌិន ក៏ឈ្នះទៅ៕
Tag:
អាមេរិក
ដូណាល់ ត្រាំ
ចូ បៃឌិន
បេននី សេនឌឺ
© រក្សាសិទ្ធិដោយ thmeythmey.com