កោះបាលីរបស់ឥណ្ឌូណេស៊ី យកស្រាច្នៃធ្វើទឹកលាងដៃជំនួសអាល់កុល

COVID-19

អន្តរជាតិ

កោះបាលីរបស់ឥណ្ឌូណេស៊ី យកស្រាច្នៃធ្វើទឹកលាងដៃជំនួសអាល់កុល

09, Apr 2020 , 7:19 pm

រូបភាព

រូបភាព៖ AFP

ដោយ: ធៀន ភារិន្ទ

កោះបាលី ឥណ្ឌូណេស៊ី បានយកស្រាមកធ្វើជាទឹកលាងដៃ ជំនួយទឹកអាល់កុល ដើម្បីសម្លាប់កូរ៉ូណាវីរុស។ ការប្រើប្រាស់ស្រានេះ គឺធ្វើឡើងបន្ទាប់ពីទឹកអាល់កុលមានតម្លៃថ្លៃ និងខ្វះខាតនៅលើកោះ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP នាថ្ងៃទី៩ ខែមេសា។

ជាកោះទេសចរណ៍ដ៏ល្បីប្រចាំឥណ្ឌូណេស៊ី និងពិភពលោក កោះបាលីបានយកស្រាមកធ្វើជាទឹកលាងដៃជំនួយឲ្យទឹកអាល់កុល ដែលកំពុងតែខ្វះខាត និងមានតម្លៃថ្លៃ។ ការយកស្រាធ្វើជាទឹកលាងដៃនេះ គឺកើតចេញពីគំនិតរបស់មេប៉ូលិសប្រចាំកោះ លោក Petrus Reinhard Golose។ ដោយសារតែខ្វះខាតទឹកអាល់កុល លោក Petrus បានយកស្រា Arak ប្រភេទស្រាខ្លាំងរបស់ឥណ្ឌូណេស៊ី ប្រមាណ ៤ពាន់លីត្រ ដែលបានមកពីការទិញ និងបរិច្ចាគពីអ្នកស្រុក។

កិច្ចការបន្ទាប់ គឺជាបន្ទុករបស់សកលវិទ្យាល័យ Udayana ដើម្បីប្រែក្លាយពីស្រា ទៅជាទឹកលាងដៃ ដែលអាចមានប្រសិទ្ធភាពក្នុងការសម្លាប់កូរ៉ូណាវីរុស។ បើសកលវិទ្យាល័យ ក្នុងរយៈពេលមួយសប្តាហ៍ គេអាចបង្កើតប្រភេទស្រាមួយប្រភេទ ដែលមានជាតិអាល់កុលរហូតដល់ ៩៦ភាគរយ និងស្របតាមស្តង់ដាររបស់អង្គការសុខភាពពិភពលោក។ ទឹកលាងដៃនេះ នឹងមានផ្សំពីប្រេងជីអង្កាម និងផ្កាមួយប្រភេទ។

ប្រាប់ទីភ្នាក់ងារព័ត៌មាន AFP សកលវិទ្យាធិការរបស់ Udayana បានបញ្ជាក់ថា កន្លងមកខាងសកលវិទ្យាល័យ បានផលិតទឹកលាងដៃ ១០៦០០ ដបរួចមកហើយ ដោយមានដាក់ Arak ហើយប៉ូលិសកោះបាលី ក៏បានឲ្យវាទៅឲ្យប្រជាជន ដែលកំពុងត្រូវការផងដែរ។

សូមបញ្ជាក់ថា គិតមកត្រឹមពេលនេះ ឥណ្ឌូណេស៊ីមានករណីCOVID-19 សរុប២៩៥៦ ករណី អ្នកស្លាប់ ២៤០ករណី និងអ្នកជាសះស្បើយ២២២ករណី។ គ្រាន់តែនៅលើកោះបាលីមានកូរ៉ូណាវីរុសចំនួន ៤៩ករណី និងស្លាប់ ២នាក់៕