COVID-19
អន្តរជាតិ
លោក ត្រាំ អរគុណវៀតណាមដែលសម្រួលការដឹកជញ្ជូនអាវការពារ៤៥ម៉ឺនឈុតប្រយុទ្ធនឹង COVID-19 ថតពី Twiiter លោកដូណាល់ ត្រាំ
× វៀតណាម បានពន្លឿនការបញ្ជូនសំលៀកបំពាក់ពេទ្យការពារចំនួន ៤៥ម៉ឺនសម្រាប់ទៅកាន់សហរដ្ឋអាមេរិកដើម្បីជួយបុគ្គលិកពេទ្យនៅទីនោះប្រយុទ្ធប្រឆាំងនឹង COVID-19។ នេះបើតាមការបញ្ជាក់របស់ស្ថានទូតអាមេរិកប្រចាំក្រុងហាណូយ នៅថ្ងៃទី ៨ ខែមេសា។ ប្រធានាធិបតីអាមេរិក ដូណាល់ ត្រាំ បានអរគុណមិត្តវៀតណាមចំពោះសមានចិត្តនេះ។
សំលៀកបំពាក់ការពារដែលផលិតក្នុងស្រុកវៀតណាម ចំនួន ៤៥ម៉ឺននាក់ឈុត បានដឹកទៅដល់ទីតាំងស្តុកជាតិអាមេរិក កាលពីថ្ងៃទី៨ ខែមេសា។ ស្ថានទូតអាមេរិកបញ្ជាក់បែបនេះក្នុងសេចក្តីថ្លែងការណ៍ ដែលដកស្រង់ចុះផ្សាយទីភ្នាក់ងារព័ត៌មាន Reuters ។
សេចក្តីថ្លែងការណ៍ បញ្ជាក់បន្ថែមទៀតថា បរិក្ខារពេទ្យទាំងនេះ នឹងជួយការពារបុគ្គលិកសុខាភិបាលអាមេរិកដែលធ្វើការនៅជួរមុខប្រឆាំងនឹង COVID-19 ព្រមទាំងបង្ហាញពីកម្លាំងនៃភាពជាដៃគូរវាសហរដ្ឋអាមេរិកនិងវៀតណាមផងដែរ។
ទាក់ទិននឹងការផ្ដល់ឲ្យនេះ ប្រធានាធិបតីអាមេរិក នៅថ្ងៃព្រហស្បតិ៍ បាននិយាយអរគុណសមានចិត្តរបស់មិត្តវៀតណាម។ លោកបានសរសេរលើបណ្ដាញសង្គម Twitter ដូច្នេះថា៖«នៅព្រឹកនេះ សំលៀកបំពាក់ការពារ ៤៥ម៉ឺនឈុត បានដឹកដល់ក្រុង Dallas រដ្ឋ Texas។ នេះអាចធ្វើទៅបាន […] ដោយសារមិត្តវៀតណាមយើង។ អរគុណអ្នក»។
ក្រៅពីផ្ដល់ជំនួយជាគ្រឿងបរិក្ខារពេទ្យដល់សហរដ្ឋអាមេរិក វៀតណាម ដែលបច្ចុប្បន្នមានករណីឆ្លងCOVID-19 សរុប ២១៥ករណី តែគ្មានអ្នកស្លាប់ បានបញ្ជាក់កាលពីថ្ងៃ៧ ខែមេសាថា ខ្លួនបានបរិច្ចាគម៉ាស់សរុប ៥៥ម៉ឺនសន្លឹកដល់ប្រទេសក្នុងតំបន់អឺរ៉ុបចំនួន ៥។ ប្រទេសទាំង៥នោះគឺមានដូចជា បារាំង, អាល្លឺម៉ង់, អ៊ីតាលី , អេស្ប៉ាញ និងចក្រភពអង់គ្លេស។
គួររម្លឹកផងដែរ វៀតណាម ក៏ធ្លាប់បានផ្ដល់ម៉ាស់ និងសម្ភារពេទ្យផ្សេងទៀតដល់បណ្ដាប្រទេសជិតខាងខ្លួន ដូចជា ចិន កម្ពុជា និងឡាវផងដែរ។ ហើយកាលពីសប្តាហ៍មុន ប្រទេសក្នុងតំបន់អាស៊ីអាគ្នេយ៍មួយនេះ បានស្នើសុំឲ្យបណ្ដារោងចក្រផលិតម៉ាស់ខ្លួនទាំងអស់ពន្លឿនផលិតកម្មពួកគេឲ្យមានសមត្ថភាពផលិតម៉ាស់ដល់៥លានសន្លឹកក្នុងមួយថ្ងៃ៕
Tag:
សហរដ្ឋអាមេរិក
EU
COVID-19
វៀតណាម
© រក្សាសិទ្ធិដោយ thmeythmey.com