COVID-19
ជាតិ
រដ្ឋាភិបាលផ្អាកពិធីចូលឆ្នាំ ក៏ព្រោះតែចង់ទប់ស្កាត់ការឆ្លងរាតត្បាតជំងឺកូវីដ
×![]()
ដោយ: ថ្មីៗ
រដ្ឋាភិបាល បានដាក់ចេញវិធានការជាបន្តបន្ទាប់ ដោយមានគោលបំណងតែមួយ គឺទប់ស្កាត់ការឆ្លងរាលដាលជំងឺកូវីដ-១៩ រហូតដល់ផ្អាកពិធីបុណ្យចូលឆ្នាំខ្មែរ និងសម្រេចមិនឲ្យពលរដ្ឋ ចេញពីភ្នំពេញ ចូលទៅខេត្ត ឬចេញពីខេត្តចូលមកភ្នំពេញ ព្រមទាំងមិនឲ្យធ្វើដំណើរឆ្លងកាត់ពីខេត្តមួយទៅខេត្តមួយ។
«ចូរធ្វើជាបុគ្គល ដែលគេអប់រំបានដោយងាយ! ចូរធ្វើជាបុគ្គលដែលអាចយល់ពីហេតុផល និងដឹងពីអ្វីដែលគួរធ្វើ និងអ្វីដែលមិនគួរធ្វើ ជាពិសេសស្ថិតក្នុងស្ថានភាពមានអាសន្ន ដើម្បីជៀសផុតពីក្តីវិនាសអន្តរាយ»។ ការដោះស្រាយវិបត្តិប្រទេសជាតិនាពេលនេះ មិនអាស្រ័យតែទៅលើរដ្ឋាភិបាលនោះទេ តែក៏អាស្រ័យលើការចូលរួមរបស់ប្រជាជនផងដែរ។
ប្រជាពលរដ្ឋគួរយល់ថា រដ្ឋាភិបាលប្រាកដជាមើលឃើញពីហានិភ័យធ្ងន់ធ្ងរហើយ ទើបបានចេញវិធានការអស់ទាំងនេះ។ ស្ថិតក្នុងដំណាក់កាលនេះ ពលរដ្ឋគ្មានជម្រើសអ្វី ក្រៅពីការចូលរួមអនុវត្តវិធានការរបស់រដ្ឋាភិបាលនោះទេ។ ការដែលពលរដ្ឋយល់ដឹងពីវត្ថុបំណងរបស់រដ្ឋាភិបាល និងអនុលោមតាមរដ្ឋាភិបាលនាពេលនេះ គឺជាគន្លឹះដ៏សំខាន់ ក្នុងការទប់ស្កាត់ការរាលដាលជំងឺកូវីដ-១៩ ពីព្រោះថា បើពលរដ្ឋមិនយល់ដឹងទេនោះ រាល់វិធានការទាំងអម្បាលម៉ានរបស់របស់រដ្ឋាភិបាល អាចនឹងគ្មានប្រយោជន៍។
អ្វីដែលពលរដ្ឋ ត្រូវធ្វើនៅពេលនេះ គឺការកាត់ចិត្តទៅជួបជុំគ្រួសារត្រឹមតែបី-បួនថ្ងៃ ក្នុងអំឡុងបុណ្យចូលឆ្នាំ។ អាចនិយាយបែបម្យ៉ាងទៀតថា សុខចិត្តលះបង់ការសប្បាយរយៈពេលខ្លី ដើម្បីសេចក្តីសុខរយៈពេលវែង និងដើម្បីធានាពីអាយុជីវិតរបស់យើង ក្រុមគ្រួសារ និងមនុស្សជាទីស្រឡាញ់របស់យើង។ យើង មិនអាចដឹងច្បាស់១០០ភាគរយឡើយថា អ្នកណាខ្លះ អាចផ្ទុកជំងឺកូវីដ-១៩។ ឧទាហរណ៍ថា យើងខ្លួនឯង បានផ្ទុកជំងឺកូវីដ-១៩ ហើយសុខភាពយើង នៅមានសភាពធម្មតា យើងក៏ទៅលេងផ្ទះ ជួបជុំបងប្អូន ពេលនោះ យើងអាចនឹងចម្លងជំងឺកូវីដ-១៩ ទៅសមាជិកគ្រួសារ។ បើរឿងអកុសលបែបនេះ កើតឡើងមែន តើយើងនឹងមានវិប្បដិសារីយ៉ាងណា?
ម្យ៉ាងទៀត ទោះបីជាយើង គ្មានជំងឺកូវីដ-១៩ ក៏ដោយ តែពេលធ្វើដំណើរតាមរថយន្ត ក៏ជាបញ្ហាប្រឈមដែរ ដែលអាចធ្វើឲ្យយើងឆ្លងជំងឺនេះ។ នេះគ្រាន់តែលើកយកបុគ្គលខ្លួនយើងតែម្នាក់ មកធ្វើជាឧទារហណ៍ គឺយើង អាចមើលឃើញហានិភ័យកម្រិតនេះទៅហើយ ចុះឧបមាថា យើងគ្រប់រូប នាំគ្នាសម្រុកទៅស្រុកនោះ តើហានិភ័យ មានកម្រិតណា? ការខកខានទៅជួបឪពុកម្តាយតែម្តង សម្រាប់ឆ្នាំនេះ គឺមិនខុសឆ្គងអ្វីឡើយ។ ផ្ទុយទៅវិញ ការមិនទៅស្រុកកំណើតពេលនេះ គឺជារឿងល្អ សម្រាប់គ្រួសារនិងសង្គម ព្រោះថា យើង បានចូលរួមចំណែកក្នុងការទប់ស្កាត់ការរាលដាលជំងឺកូវីដ-១៩។ ក្រោយស្ថានការណ៍ជំងឺកូវី១៩ ធូរស្បើយ មិនខ្វះពេលទៅលេងស្រុកនិងជួបជុំគ្រួសារនោះទេ។
គេ មិនអាចភ្លេចឡើយពីបទពិសោធដ៏ជូរចត់របស់ចិន។ ចិន ចាប់ផ្តើមរាលដាលខ្លាំងនូវជំងឺកូវីដ-១៩ នៅក្រោយពិធីចូលឆ្នាំនេះឯង។ ទម្រាំតែ អាចទប់ទល់នឹងជំងឺកូវីដ-១៩ និងធ្វើឱ្យស្ថានការណ៍ធូរស្រាលឡើងវិញ ប្រទេសចិនទាំងមូលបានទ្រុឌទ្រោមមិនតិចនោះទេ។ ប្រជាជនចិនប្រមាណ ៣០០០នាក់បានស្លាប់។
ចូរសាកធ្មេចភ្នែក និងស្រមៃបន្តិចថា បើនៅកម្ពុជាយើង ជំងឺកូវីដ-១៩ ផ្ទុះខ្លាំង ដូចនៅអាមេរិក អេស្ប៉ាញ អ៊ីតាលី អាល្លឺម៉ង់ បារាំង ចិន...តើកម្ពុជានឹងមានចលាចល និងរងវិបត្តិធ្ងន់ធ្ងរប៉ុនណា? ហេតុដូច្នេះ គេ អាចវាយតម្លៃបានថា ការទប់ស្កាត់ពលរដ្ឋ មិនឲ្យទៅស្រុកកំណើត នាពិធីចូលឆ្នាំ គឺជាវិធានការសមស្រប ដើម្បីទប់ស្កាត់ការរាលដាលជំងឺកូវីដ-១៩៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
