ក្រុង​បាងកក ហាម​លក់​គ្រឿង​ស្រវឹង​១០​ថ្ងៃ​បង្ការ​ការជួបជុំ​ទប់ស្កាត់ COVID-19
COVID-19
អន្តរជាតិ
ក្រុង​បាងកក ហាម​លក់​គ្រឿង​ស្រវឹង​១០​ថ្ងៃ​បង្ការ​ការជួបជុំ​ទប់ស្កាត់ COVID-19
10, Apr 2020 , 9:51 am        
រូបភាព
​សាលាក្រុង​បាងកក បានចេញ​បម្រាម​ការលក់​គ្រឿង​ស្រវឹង​ច​ក្នុង​រាជធានី​ថៃ​ដែលមាន​ប្រជាជន​ជាង​១០​លាន​នាក់​នេះ សម្រាប់​រយៈពេល​១០​ថ្ងៃ​។ បទបញ្ជា​នេះ ចូល​ជា​ធរមាន​ចាប់ពី​ថ្ងៃ​សុក្រ ១០ ខែមេសា​តទៅ​ក្នុង​គោលដៅ​រារាំង​ការជួបជុំ​មនុស្ស​ច្រើន ដែល​អាចជា​មូលហេតុ​នៃ​ការរីក​រាលដាល COVID-19 ។ ក្រៅពី​ក្រុង​បាងកក ខេត្ត​ថៃ​១០​ផ្សេងទៀត ក៏បាន​ដាក់​បម្រាម​ដូចគ្នានេះដែរ​។



​អភិបាលក្រុង បាងកក លោក Aswin Kwanmuang បាន​ដាក់ចេញ​សេចក្តីប្រកាស​នេះ​ដោយ​បញ្ជា​ឲ្យ​បិទ​ជា​បណ្ដោះអាសន្ន​ហាង ឬ​កន្លែង​លក់​គ្រឿង​ស្រវឹង​គ្រប់​ប្រភេទ ដែល​ចាប់​អនុវត្ត​ពីថ្ងៃ​ទី​១០​រហូតដល់​ថ្ងៃទី​២០ ខែមេសា​។ លោក Aswin អះអាងថា ហាង​ទាំងនោះ នៅតែ​អនុញ្ញាត​ឲ្យ​លក់ដូរ​ទំនិញ​ដទៃទៀត​ដូច​ធម្មតា​។  នេះ​បើតាម​កាសែត បាងកក​ប៉ុស្តិ៍ ។​

​ប្រាប់​សន្និសីទ​ព័ត៌មាន នា​ថ្ងៃ​៩ ខែមេសា អ្នកនាំពាក្យ​រដ្ឋបាល​ក្រុង​បាងកក លោក Pongsakorn Kwanmuang និយាយ​ដូច្នេះ​ថា​៖«​យើង​ស្នើសុំ​កិច្ចសហការ​ពី​អ្នក​ទាំងអស់​។ ដូច្នេះ​យើង​អាច​គ្រប់គ្រង​ការរីក​រាលដាល​នៃ​វីរុស​នេះ​បាន​»​។

​គោលដៅ​នៃ​ចំណាត់ការ​នេះ​គឺ​ដើម្បី​ផ្អាក​ការប្រមូល​ផ្ដុំគ្នា ដែលជា​ប្រភព​មួយ​នៃ​ការចម្លង​ជំងឺ COVID-19 ។ ទោះជា​បែបនេះ​ក្តី ក្រោយ​ការប្រកាស​នេះ ពលរដ្ឋ​ថៃ​ជាច្រើន បាននាំគ្នា​សម្រុក​ទៅ​ហាង​ទំនើប​កាលពី​យប់​ថ្ងៃទី​៩ ខែមេសា ដើម្បី​ទិញ​គ្រឿង​ស្រវឹង​ស្ដុក​ទុក​។ នេះ​តាម​ការចុះផ្សាយ​របស់​កា​សែត​បាងកក​ប៉ុស្តិ៍ ។​

​ក្រៅពី​ទីក្រុង បាងកក ខេត្ត​ថៃ​១០​ផ្សេងទៀត ក៏បាន​ដាក់​បម្រាម​លើ​ការលក់​គ្រឿង​ស្រវឹង​ផងដែរ ដូចជា Surin, Rayong, Mukdahan , Chiang Mai និង Buri Ram ជាដើម​។

​សូមបញ្ជាក់ថា រដ្ឋាភិបាល​ថៃ កាលពី​ថ្ងៃ​៩ ខែមេសា បាន​រាយការណ៍​ករណី​ឆ្លង​ថ្មី ៥៤​ករណី​បន្ថែម ដែល​ធ្វើ​ករណី​ឆ្លង​COVID-19 សរុប​ឡើងដល់​២៤២៣​ករណី​ហើយ​។ អ្នកស្លាប់​សរុប ឡើងដល់ ៣២​នាក់​៕







Tag:
 ​ថៃ​
  បាងកក​
  គ្រឿង​ស្រវឹង​
  ចូលឆ្នាំថ្មី​
  COVID-19
© រក្សាសិទ្ធិដោយ thmeythmey.com