ជាតិ
សង្គមជាតិ
រូបពីគណនីហ្វេសប៊ុករបស់កំពង់ចម្លងភ្នំពេញ-អរិយក្សត្រ
×![]()
ដោយ៖ ស៊ែម ម៉ូនីតា
កំពង់ចម្លងភ្នំពេញ-អរិយក្សត្រ ផ្អាកចម្លងមនុស្ស ចាប់ពីថ្ងៃទី១០ រហូតថ្ងៃទី១៦ ខែមេសា ឆ្នាំ២០២០។ ប៉ុន្តែ រថយន្តសង្គ្រោះបន្ទាន់ និង រថយន្តពន្លត់អគ្គិភ័យ នៅចម្លងធម្មតា។
កំពង់ចម្លងភ្នំពេញ-អរិយក្សត្រ សរសេរលើគណនីហ្វេសប៊ុកថា ចំពោះយានយន្តមន្ត្រីរាជការទូទៅ (មិនមែនឡានស៊ីរ៉ែន ឬសញ្ញាសម្គាល់ជាយានយន្តស្ថាប័នមានសមត្ថកិច្ច) អាចឆ្លងបាន លុះត្រាតែមានការបញ្ជាក់ពីគណៈបញ្ជាការឯកភាពគោលដៅ។
លោក ផុន គឹមឡុង អ្នកតំណាងកំពុងចម្លងភ្នំពេញ-អរិយក្សត្រ ប្រាប់សារព័ត៌មានថ្មីតាមទូរស័ព្ទថា គណៈបញ្ជាការឯកភាពខ័ណ្ឌដូនពេញ និងគណៈបញ្ជាការឯកភាពស្រុកល្វាឯម បានប្រជុំពិនិត្យទៅលើស្ថានភាពជាក់ស្ដែង ដោយសម្រេចផ្ដល់លក្ខខណ្ឌមួយចំនួន រួមមាន អ្នកដំណើរជាមន្ត្រីរាជការ កងកម្លាំងប្រដាប់អាវុធ បុគ្គលិកក្រុមហ៊ុន ប្រជាពលរដ្ឋដឹកទំនិញ អាចឆ្លងបានជាធម្មតា ប៉ុន្តែត្រូវមានបណ្ណសម្គាល់ខ្លួន។ លោក បន្តថា ករណីលែកលែងមួយទៀត គឺរថយន្តសង្គ្រោះបន្ទាន់ រថយន្តពន្លត់អគ្គីសនី រថយន្តភ្នាក់ងារមានសមត្ថកិច្ច។
កំពង់ចម្លងភ្នំពេញ-អរិយក្សត្រ បញ្ជាក់ថា ការផ្អាកចម្លងមនុស្សនេះ គឺអនុវត្តតាមបទបញ្ជារបស់រដ្ឋាភិបាល ស្តីពីការដាក់កំហិតលើការធ្វើដំណើរក្នុងផ្ទៃប្រទេស ដើម្បីបង្ការនិងទប់ស្កាត់ការរាតត្បាតនៃជំងឺកូវីដ-១៩។
រដ្ឋាភិបាល បានដាក់បម្រាមមិនឲ្យធ្វើដំណើរចេញពីរាជធានីភ្នំពេញ ចូលទៅខេត្ត ឬចេញខេត្ត ចូលមករាជធានីភ្នំពេញ ហាមធ្វើដំណើរពីស្រុកមួយទៅស្រុកមួយទៀត និង ហាមធ្វើដំណើរពីខេត្តមួយ ទៅខេត្តមួយទៀត។ ចំពោះរថយន្តដឹកទំនិញ មិនត្រូវបានហាមឃាត់ឡើយ។ បទបញ្ជានេះ ចាប់ផ្តើមអនុវត្តពីថ្ងៃទី៩ រហូតដល់ថ្ងៃទី១៦ ខែមេសា ឆ្នាំ២០២០៕
Tag:
COVID-19
កំពង់ចម្លងភ្នំពេញ-អរិយក្សត្រ
ផ្អាកចម្លង
© រក្សាសិទ្ធិដោយ thmeythmey.com
