នាពេលថ្មីៗនេះ ក្រុមហ៊ុនសែលកាត បានពន្លឿនផែនការរបស់ខ្លួន ក្នុងការផ្តល់ជូនដល់សហគមន៍អ្នកគាំទ្រវិស័យហ្គេម នូវវេទិកា (platform) សម្រាប់លេងហ្គេមកម្សាន្ត ស្របពេលដែលបងប្អូនពលរដ្ឋខ្មែរ កំពុងត្រូវបានលើកទឹកចិត្តឱ្យស្នាក់នៅក្នុងផ្ទះ ក្នុងអំឡុងស្ថានការណ៍ដ៏ពិបាកនេះ។
PlayGame គឺជាវេទិកា (Virtual gaming platform) សម្រាប់លេងហ្គេមកម្សាន្តដំបូងគេបង្អស់នៅក្នុងប្រទេសកម្ពុជា ដែលអាចឱ្យមនុស្សគ្រប់វ័យ អាចលេងហ្គេមដែលពួកគេចូលចិត្ត នៅលើទូរសព្ទ័ស្មាតហ្វូន ហើយថែមទាំងមានឱកាសឈ្នះប្រាក់រង្វាន់ជាច្រើនទៀតផង។
ប្អូនៗយុវជននៅទូទាំងប្រទេសកម្ពុជា សុទ្ធតែអាចចូលរួមនៅក្នុងវេទិការនេះ ដើម្បីលេងហ្គេមកម្សាន្តសប្បាយបាន ដោយពួកគាត់គ្រាន់តែចូលទៅទាញយកកម្មវិធី PlayGame នៅលើហាងកម្មវិធីរបស់ iOS និង Android។
អ្នកប្រើប្រាស់បណ្តាញទូរស័ព្ទចល័តគ្រប់ប្រព័ន្ធទាំងអស់ អាចបង់សេវា ដើម្បីចូលរួមលេងកម្សាន្ត តាមរយៈការប្រើកាតកោសរបស់សែលកាត ឬការបញ្ចូលទឹកប្រាក់តាមប្រព័ន្ធអនឡាញ។ ក្នុងនោះ អ្នកលេងហ្គេមនឹងទទួលបាននូវជម្រើសជាច្រើន ដូចជា ការលេងតែម្នាក់ឯង ការលេងជាក្រុមជាមួយមិត្តភក្តិ ឬការលេងជាមួយអ្នកដទៃផ្សេងទៀតជាដើម។ កាន់តែពិសេសទៀតនោះ អ្នកដែលឈរនៅលើកំពូលគេ ក្នុងតារាងចំណាត់ថ្នាក់ នឹងទទួលបានប្រាក់រង្វាន់ ដែលនឹងទូទាត់ជូនដោយស្វ័យប្រវត្តិ ចូលទៅក្នុងគណនី PlayGame របស់ពួកគាត់ ហើយប្រាក់រង្វាន់ទាំងនោះ ក៏អាចដកយកជាសាច់ប្រាក់ តាមរយៈវីងបានផងដែរ។
លោក Ian Watson នាយកប្រតិបត្តិក្រុមហ៊ុនសែលកាត បានថ្លែងថា PlayGame គឺជាការផ្តល់ជូន ដ៏គួរឱ្យរំភើបបំផុតមួយ ដែលឋិតនៅក្នុងយុទ្ធសាស្ត្រ នៃការគាំទ្រ និងការពង្រីកវិស័យហ្គេមរបស់សែលកាត។ លោក Watson បានថ្លែងទៀតថា៖«យើងបានសម្រេចចិត្តបើកសម្ពោធគម្រោងនេះ លឿនជាងការរំពឹងទុក ព្រោះយើងចង់ជួយឱ្យប្អូនៗយុវជន ទទួលបានការកម្សាន្តរីករាយ បន្ទាប់ពីការសិក្សា និងអាចប្រាស្រ័យទាក់ទងគ្នាទៅវិញទៅមក ដោយសុវត្ថិភាពតាមប្រព័ន្ធអនឡាញ»។
«PlayGame» មានផ្តល់ជូននូវហ្គេមគ្រប់ប្រភេទ និងគ្រប់កម្រិតដល់ប្អូនៗយុវជន អ្នកគាំទ្រទាំងអស់ ដោយក្នុងនោះ មានរាប់បញ្ចូលទាំងអ្នកលេងកីឡាអេឡិចត្រូនិកអាជីព អ្នកលេងកម្រិតធម្មតា និងអ្នកលេងដែលគ្រាន់តែចង់កម្សាន្តសប្បាយ ជាមួយប្រភេទវីដេអូហ្គេមងាយៗជាដើម។
សហគមន៍អ្នកគាំទ្រវិស័យហ្គេម ថែមទាំងអាចរីករាយ ជាមួយនឹងការប្រកួតប្រជែងគ្នា ដើម្បីឈ្នះរង្វាន់ដ៏អស្ចារ្យជាច្រើន រួមមានទាំងទឹកប្រាក់រហូត ដល់ទៅ ១,០០០ដុល្លារ សម្រាប់ប្រភេទហ្គេម ដែលកំពុងពេញនិយមបំផុតដូចជា PUBG, Mobile Legends និង Rules of Survival។
វេទិកា PlayGame នឹងផ្តល់ឱកាសឱ្យសែលកាត អាចរៀបចំនូវកម្មវិធីប្រកួតកីឡាអេឡិចត្រូនិកខ្នាតធំតាមប្រព័ន្ធអនឡាញ ដោយមានការចូលរួមបង្កបរិយាកាសសប្បាយ ពីសំណាក់បុគ្គលមានប្រជាប្រិយភាព (Game Infuencers) ក្នុងវិស័យហ្គេម និងអ្នកផ្សាយហ្គេមតាមអនឡាញល្បីៗ នៅក្នុងប្រទេសកម្ពុជាផងដែរ។
លោក Watson បានថ្លែងថា៖«PlayGame គឺជាប្រភពនៃការកម្សាន្តសប្បាយដ៏អស្ចារ្យ ដែលអាចឱ្យសហគមន៍ អ្នកគាំទ្រវិស័យហ្គេមទូទាំងប្រទេសកម្ពុជា អាចប្រមូលផ្តុំ ជួបជុំជជែកគ្នា ឬបង្កើនសមត្ថភាពលេងហ្គេមរបស់ពួកគេ ដើម្បីក្លាយខ្លួនជាកីឡាករអេឡិចត្រូនិកអាជីពដូចក្រុម Orange Esports ជាដើម»៕
(អត្ថបទពាណិជ្ជកម្ម)