ជាតិ
សង្គមជាតិ
សមត្ថកិច្ច រកឃើញសាធាតុសម្លាប់មេរោគ ម៉ាស់ និងគ្រឿងសម្អាងគ្មានច្បាប់១៣តោន សារធាតុសម្លាប់មេរោគ ម៉ាស់ និងគ្រឿងសម្អាង ដែលសមត្ថកិច្ចចុះបង្ក្រាប (រូបពីគណៈកម្មាធិការប្រយុទ្ធប្រឆាំងផលិតផលក្លែងក្លាយ)
× ភ្នំពេញ៖ សមត្ថកិច្ច បានចុះបង្ក្រាបនិងរឹបអូសយកសារធាតុសម្លាប់រោគ ម៉ាស់ និងគ្រឿងសម្អាងជាង១៣តោន ដែលគ្មានច្បាប់អនុញ្ញាតពីក្រសួងសុខាភិបាល ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
ការចេញផ្សាររបស់គណៈម្មាធិការប្រយុទ្ធប្រឆាំងផលិតផលក្លែងក្លាយ បានឲ្យដឹងថា កម្លាំងសមត្ថកិច្ច បានចុះបង្ក្រាបផលិតផលនាំចូល ស្តុកទុក និងចែកចាយខុសច្បាប់ជាង១៣តោន កាលពីថ្ងៃទី៩ ខែមេសា ឆ្នាំ២០២០។ ផលិតផលទាំង១៣នេះ ត្រូវបានសមត្ថកិច្ចពិនិត្យឃើញថា គ្មានស្លាកយីហោ មិនបានចុះបញ្ជីការ និង មិនអនុលោមតាមច្បាប់ពីក្រសួងសុខាភិបាលឡើយ។
ក្រោយពីបានពិនិត្យ សមត្ថកិច្ចបានសម្រេចផ្អាកអាជីវកម្មរបស់អ្នកលក់ទាំងនោះបណ្តោះអាសន្ន។ ចំណែក ផលិតផលដែលរកឃើញបានរក្សាទុកនៅទីតាំងដដែល ដោយដកហូតវត្ថុតាងមួយចំនួនប៉ុណ្ណោះ យកទៅពិសោធ ដើម្បីរៀបចំសំណុំរឿងបន្ថែមតាមនីតិវិធីនៃច្បាប់។
ជាមួយគ្នានេះ មន្រី្តនៃគណៈម្មាធិការប្រយុទ្ធប្រឆាំងផលិតផលក្លែងក្លាយ បានអំពាវនាវដល់ពលរដ្ឋទាំងអស់ សហការផ្តល់ព័ត៌មាន ពីទីតាំងចែកចាយរបស់ផលិតផលក្លែងក្លាយ ជូនដល់សមត្ថកិច្ច ដោយផលិតផលទាំងនេះ អាចប៉ះពាល់ដល់សុខភាព។ ពលរដ្ឋគ្រប់រូប អាចទាក់ទងផ្ដល់ព័ត៌មានទៅលេខទូរស័ព្ទ០៨១ ៩៩៩ ៨០៨ ឬតាមបណ្តាញសង្គមហ្វេសប៊ុកឈ្មោះ គណៈកម្មាធិការប្រយុទ្ធប្រឆាំងផលិតផលក្លែងក្ហាយ-Counter Counterfeit Committee៕
© រក្សាសិទ្ធិដោយ thmeythmey.com