COVID-19
អន្តរជាតិ
សិង្ហបុរី មិនឲ្យគ្រូប្រើកម្មវិធី «Zoom» បង្រៀនសិស្ស ក្រោយលេចធ្លាយរូបមិនសមរម្យ
× រដ្ឋាភិបាលសិង្ហបុរី សម្រេចផ្អាកគ្រូបង្រៀនប្រើប្រាស់កម្មវិធីវីដេអូ Call តាមអនឡាញហៅថា «Zoom» ។ ក្រសួងអប់រំសិង្ហបុរី ប្រកាសបែបនេះនៅថ្ងៃទី១០ ខែមេសា ក្រោយពីបែកធ្លាយរូបភាពអាសអាភាសក្នុងសប្តាហ៍ដំបូងនៃការបិទសាលារៀនព្រោះCOVID-19 ហើយគ្រូៗសិង្ហបុរីផ្ដើមបង្រៀនតាមអនឡាញដោយប្រើកម្មវិធីនេះ។
រឿងហេតុនោះ គឺពាក់ព័ន្ធនឹងរូបភាពអាសអាភាស ដែលលេចឡើងលើកញ្ចក់កុំព្យូទ័រ ហើយបុរសចម្លែកសរសេរពាក្យពេចន៍មិនសមរម្យ អំឡុងពេលបង្រៀនតាមអនឡាញនៅម៉ោងភូមិវិទ្យា ដែលមានសុទ្ធតែសិស្សស្រីៗ។ នេះបើតាមការចុះផ្សាយរបស់ទូរទស្សន៍សិង្ហបុរី Channel News Asia ។
«នេះគឺជារឿងហេតុដ៏ធ្ងន់ធ្ងរបំផុតមួយ។ ក្រសួងអប់រំ កំពុងស៊ើបអង្កេតរឿងនេះ ហើយនឹងធ្វើរបាយការណ៍ជូនដល់សមត្ថកិច្ច»។ លោក Aaron Loh ប្រធាននាយកដ្ឋានបច្ចេកវិទ្យាអប់រំនៃក្រសួងអប់រំសិង្ហបុរី លើកឡើងបែបនេះ ដោយពុំបញ្ជាក់ព័ត៌មានបន្ថែមលើករណីនេះឡើយ។ បើតាមទូរទស្សន៏សិង្ហបុរីដដែល លោក Loh បញ្ជាក់ដូច្នេះថា៖«ជាវិធានការបង្ការទុកជាមុន គ្រូៗយើង នឹងផ្អាកប្រើកម្មវិធី Zoom »។
សូមបញ្ជាក់ថា នៅមុនចំណាត់ការរបស់សិង្ហបុរី អាល្លឺម៉ង់ និងកោះតៃវ៉ាន់ បានសម្រេចរឹតត្បិតការប្រើប្រាស់កម្មវិធីវីដេអូ Call តាមអនឡាញ «Zoom» នេះ ខណៈក្រុមហ៊ុន Google បានដាក់បម្រាមបុគ្គលិកប្រើកម្មវិធីលើកុំព្យូទ័រ កាលពីថ្ងៃទី៨ ខែមេសា៕
Tag:
សិង្ហបុរី
ក្រសួងអប់រំ
Zoom
រៀនតាមអនឡាញ
© រក្សាសិទ្ធិដោយ thmeythmey.com