COVID-19
កីឡាអន្តរជាតិ
អន្តរជាតិ
មេ FIFA៖ «ជាការមិនទទួលខុសត្រូវ» ដែលចាប់ផ្ដើមលីគឡើងវិញ ពេល COVID-19 រាតត្បាត
× លោក Gianni Infantino ប្រធានសហព័ន្ធកីឡាបាល់ទាត់អន្តរជាតិ (FIFA) បាននិយាយថា ការចាប់ផ្តើមការប្រកួតឡើងវិញឆាប់ពេកជា «ការមិនទទួលខុសត្រូវ» ស្របពេលជំងឺ COVID-19 កំពុងបន្តរាតត្បាតនោះ។
កម្មវិធីកីឡានៅជុំវិញពិភពលោក រួមទាំងកីឡាបាល់ទាត់ផងត្រូវបានផ្អាកដោយសារការរីករាលដាលនៃជំងឺរលាកសួតបង្កដោយកូរ៉ូណាវីរុសប្រភេទថ្មី ដែលបានសម្លាប់មនុស្សជាង ៩៥៧០០ នាក់នៅទូទាំងពិភពលោក។
ក្របខណ្ឌ Bundesliga អាចនឹងចាប់ផ្តើមឡើងវិញនៅខែឧសភា ខណៈដែលលីគកំពូលអាល្លឺម៉ង់នេះចាប់ផ្តើមរៀបចំផែនការ និងត្រៀមសម្រាប់ការបន្តការប្រកួតរបស់ពួកគេ។ គម្រោងនេះ ត្រូវបានលោក Infantino ព្រមានថានឹងមានគ្រោះថ្នាក់ជាថ្មីម្តងទៀតព្រោះចាប់ផ្តើមឆាប់ពេក។
«អាទិភាពចម្បង និងគោលការណ៍របស់យើង គឺពឹងលើការប្រកួតរបស់យើង ហើយយើងក៏សូមឲ្យអ្នករាល់គ្នាគោរពគោលការណ៍ដោយទុកសុខភាពជាអាទិភាព។ ដូចដែលខ្ញុំបានលើកឡើងនេះនៅមិនគ្រប់គ្រាន់ទេ។ វាមិនសមនឹងប្រថុយជីវិតរបស់កីឡាករ និងអ្នកពាក់ព័ន្ធសម្រាប់ការប្រកួតណាមួយ ឬលីគណាមួយឡើយ។ អ្នករាល់គ្នាគួរតែគិតឲ្យច្បាស់លាស់»។ នេះជាការព្រមានរបស់លោក Infantino។
ប្រធាន FIFA ចង់ឲ្យលីគទាំងអស់រង់ចាំបន្តិចទៀតទើបជាការប្រសើរជាងការចាប់ផ្តើមទាំងប្រថុយប្រថាន។ លោកបន្តថា ជាការមិនទទួលខុសត្រូវឡើយក្នុងការចាប់ផ្តើមការប្រកួតឡើងវិញស្របពេលស្ថានភាពមិនមានសុវត្ថិភាព ១០០ ភាគរយនោះ។
លីគជាច្រើននៅជុំវិញពិភពលោកត្រូវប្រឈមមុខនឹងការលំបាកផ្នែកហិរញ្ញវត្ថុដោយសារវិបត្តិ COVID-19 ហើយកាន់តែធ្ងន់ធ្ងរនោះប្រសិនបើការប្រកួតត្រូវលុបចោល ឬលេងដោយបិទទ្វារកីឡដ្ឋាន។
ជុំវិញបញ្ហានេះ ស្ថាប័នគ្រប់គ្រងកីឡាបាល់ទាត់ពិភពលោកអះអាងថាខ្លួនមានប្រាក់បម្រុងចំនួន ២,៧ ពាន់លានដុល្លារអាមេរិក ដែលគ្រោងយកទៅប្រើប្រាស់ដើម្បីបង្កើតមូលនិធិបន្ទាន់មួយដើម្បីជួយសម្រួលដល់ក្លិបដែលជួបវិបត្តិ៕
Tag:
FIFA
COVID-19
Gianni Infantino
© រក្សាសិទ្ធិដោយ thmeythmey.com