COVID-19
អន្តរជាតិ
ករណីឆ្លង COVID-19 នៅអាមេរិក ឡើងដល់ជាងកន្លះលានហើយ បុគ្គលិកវេជ្ជសាស្រ្តអាមេរិកពីរនាក់ កំពុងធ្វើតេស្តរកCOVID-19 លើអ្នកដំណើរ។ រូបភាព៖ Health Policy Watch
× អាមេរិក នៅតែបន្តរកឃើញអ្នកជំងឺរលាកសួត ដែលបង្កដោយកូរ៉ូណាវីរុស (COVID-19) ជាបន្តបន្ទាប់ និងច្រើនសន្ធឹកសន្ធាប់។ គិតមកត្រឹមថ្ងៃទី១០ ខែមេសា អាមេរិកមានករណីCOVID-19 រហូតជាងកន្លះលាននាក់ និងមានអ្នកស្លាប់សរុបឈរនៅលំដាប់ទី២ ក្នុងតារាង ដែលមានអ្នកស្លាប់ដោយសារ COVID-19 ច្រើនជាងគេ។
បើតាមវែបសាយ Worldometer អាមេរិកមានករណី COVID-19 ច្រើនជាងគេ។ គិតមកត្រឹមថ្ងៃទី១០ ខែមេសា អាមេរិកឈរនៅតារាងខ្ពស់ជាងគេ និងមានករណី COVID-19សរុបចំនួនជាង ៥០ម៉ឺនករណី។ ចំណែកអ្នកស្លាប់អាមេរិកឈរនៅលំដាប់ទី២ បន្ទាប់ពីអ៊ីតាលី មានរហូតដល់ជិត២ម៉ឺនករណី។ ចំណែកអ្នកជាសះស្បើយមានចំនួនប្រមាណ ២៧០០០ករណី។
យ៉ាងណាក៏ដោយ ក្នុងមួយថ្ងៃៗអាមេរិក បានរកឃើញអ្នកផ្ទុករហូតដល់ជាង ៣ម៉ឺនករណីឯណោះ។ គិតចាប់តាំងពីថ្ងៃទី៦ ខែមេសា រហូតដល់ថ្ងៃទី១០ ខែមេសា អាមេរិករកឃើញអ្នកផ្ទុក COVID-19 ថ្មីលើស ៣ម៉ឺនករណី។ ញូវយ៉ក គឺជារដ្ឋដែលមាន COVID-19 ច្រើនជាងគេ ដែលមានរហូតដល់ជាង១៧ម៉ឺនករណី និងបន្ទាប់មករដ្ឋ New Jersey ដែលមានត្រឹមតែជាង ៥ម៉ឺនករណីប៉ុណ្ណោះ។
សូមបញ្ជាក់ថា ដើម្បីទប់ស្កាត់ COVID-19 រដ្ឋាភិបាលអាមេរិក បានចេញវិធានការរឹតត្បិតការធ្វើដំណើរនៅក្នុងរដ្ឋមួយចំនួន ការទិញសម្ភារវេជ្ជសាស្ត្របន្ថែមពីបរទេស ផ្អាកកន្លែងកម្សាន្ត ភោជនីយដ្ឋាន និងកន្លែងមួយចំនួនជាដើម។
© រក្សាសិទ្ធិដោយ thmeythmey.com