ជាតិ
ក្រសួងកសិកម្មជំរុញការបង្កបង្កើនផលកសិកម្មនៅរដូវវស្សា រូបភាពពីក្រសួងកសិកម្ម
× ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានចេញសេចក្ដីណែនាំពីការពិនិត្យសន្និធិស្បៀងសម្រាប់ឆ្លើយតបទៅនឹងហានិភ័យនៃការឆ្លងរាលដាលជំងឺកូវីដ-១៩។
ផលប៉ះពាល់ដែលអាចកើតមានអំឡុងពេលរាលដាលនៃជំងឺកូវីដ-១៩ លើវិស័យកសិកម្ម ក្រសួងកសិកម្មបានណែនាំឲ្យអ្នកដែលពាក់ព័ន្ធទាំងអស់ ត្រូវអនុវត្តនូវវិធានការចាំបាច់ ដោយជំរុញការងារបង្កបង្កើនផលកសិកម្មនៅក្នុងរដូវវស្សាឆ្នាំ២០២០ ដើម្បីធានាសន្និធិស្បៀងសម្រាប់ឆ្លើយតបទៅនឹងហានិភ័យនាពេលខាងមុខ។
សម្រាប់ការអនុវត្ត នាយកដ្ឋានកសិកម្ម ត្រូវស្មានពីបរិមាណស្រូវ អង្ករ ដែលមានក្នុងស្តុក ទាំងក្នុងរោងម៉ាស៊ីនកិនស្រូវ ក្នុងសហគមន៍ និងគ្រួសារកសិករ ដើម្បីអាចព្យាករណ៍ពីតុល្យាភាពស្បៀងច្បាស់លាស់ក្នុងឆ្នាំ២០២០។ ក្នុងនោះនាយកដ្ឋានត្រូវសិក្សាផ្ទៃដីមានសក្ដានុពលអាចដាំដុះបន្លែ និងបរិមាណផលដែលអាចរក្សាបានស្ថិរភាពស្បៀងដោយសហការជាមួយនាយកដ្ឋានផែនការស្ថិតិ និងមន្ទីរកសិកម្មរាជធានីខេត្តផងដែរ។
ក្រៅពីនោះ ផលិតកម្មសត្វក៏ត្រូវធ្វើការប៉ាន់ស្មានពីតម្រូវការសាច់ និងការផ្គត់ផ្គង់សម្រាប់ឆ្នាំ២០២០ ដើម្បីអាចជំរុញការចិញ្ចឹមសត្វ ក៏ដូចជាធានាលើការផ្កត់ផ្គង់ថែមទៀតផង។ ការចិញ្ចឹមសត្វអាចមានគ្រប់បែបយ៉ាងដូចជា ការចិញ្ចឹមសត្វដែលមានវដ្ដផលិតកម្មខ្លី ដោយមានការចូលរួមពីគ្រប់ភាគីពាក់ព័ន្ធ ទាំងវិស័យឯកជន និងសហគមន៍ផងដែរ។
បន្ថែមពីនោះ មន្ទីរកសិកម្មទាំងអស់ត្រូវមានវិធានការ ក្នុងការទប់ស្កាត់ការលួចនាំចូលសត្វ ឬសាច់សត្វដោយខុសច្បាប់ ដើម្បីបញ្ចៀសពីការឆ្លងជំងឺសត្វជាយថាហេតុ។ សម្រាប់រដ្ឋបាលជលផល ក៏ត្រូវធ្វើការស្មានផងដែរពីតម្រូវការ ក៏ដូចជាការផ្គត់ផ្គង់ផលនេសាទ ដើម្បីធានាដល់ការប្រើប្រាស់ក្នុងស្រុក ហើយនិងត្រូវរក្សាឲ្យបានស្ថិរភាពតម្លៃ និងបរិមាណគ្រប់គ្រាន់ផងដែរ៕
© រក្សាសិទ្ធិដោយ thmeythmey.com