កូវីដ១៩៖ អ្នកស្រី ប៉ូ សុផាត កប់បន្លែក្នុងដី ដើម្បីរក្សាទុកបានយូរ

COVID-19

ជាតិ

កូវីដ១៩៖ អ្នកស្រី ប៉ូ សុផាត កប់បន្លែក្នុងដី ដើម្បីរក្សាទុកបានយូរ

12, Apr 2020 , 9:59 am

រូបភាព

ដោយ: ប៉ូ សាគុន

ភ្នំពេញ៖ ដើម្បីបញ្ចៀសការទៅផ្សារ ឬចេញក្រៅផ្ទះញឹកញាប់ អ្នកស្រី ប៉ូ សុផាត បានទិញ អង្ករ ត្រី សាច់ជ្រូកយកទៅប្រឡាក់ទុក និងធ្វើផ្អក ព្រមទាំងគ្រឿងទេសមួយចំនួនទៀត ដើម្បីអាចទទួលទានបានយូរថ្ងៃ។ ក្រៅពីនេះ ស្ត្រីកូន៣រូបនេះក៏បានទិញបន្លែមួយចំនួនយកទៅកប់ដី ដើម្បីរក្សាទុកបានយូរផងដែរ។

ដ្បិតតែរស់នៅក្នុងស្រុកស្រែចម្ការ ដែលមិនមែនជាទីប្រជុំជនក៏ពិតមែន ប៉ុន្តែគ្រួសាររបស់អ្នកស្រី ប៉ូ សុផាត មានការប្រយ័ត្នប្រយែងខ្ពស់ ក្នុងការបង្ការខ្លួនពីកូវីដ១៩ ដោយព្យាយាមមិនចេញក្រៅផ្ទះជួបញាតិក្នុងភូមិទាល់តែសោះ ប្រសិនបើមិនមានការងារចាំបាច់ខ្លាំង។ ការមិនប្រមាថនេះហើយ ដែលនាំឱ្យអ្នកស្រី សុផាត ត្រូវទិញស្បៀងជាច្រើនដូចជាអង្ករ ត្រី សាច់ បន្លែ គ្រឿងទេស និងគ្រឿងសម្រាប់ធ្វើបង្អែមផង យកមកតម្កល់ទុកក្នុងផ្ទះ។

អ្នកស្រី សុផាត ពន្យល់ដូច្នេះ៖«យើងទិញយកមកទុកមក ព្រោះមិនដឹងថាជំងឺនេះវានឹងបាត់ទៅនៅពេលណាទេ មានរបស់នៅក្នុងផ្ទះស្រាប់យើងមិនបារម្ភ។ ការពារវាប្រសើរជាងព្យាបាល។ បន្លែខ្លះយើងអាចកប់ដីទុកបានយូរ ដូចជាល្ពៅ ត្រឡាច ដំឡូងដូង ដំឡូងជ្វា ជាដើម។ បើសិនជាស្ថានការណ៍កាន់តែយ៉ាប់ទៅ ខ្ញុំអាចយកបន្លែទាំងនេះមកស្លបាន។ ខ្ញុំទិញគ្រឿងសម្រាប់ធ្វើបង្អែមមកផង ពេលណាឃ្លាន ខ្ញុំអាចចម្អិនសម្រាប់គ្រួសារខ្ញុំបាន ដូច្នេះខ្ញុំមិនបាច់ចេញក្រៅផ្ទះទេ។ ពេលនេះខ្ញុំចាប់ផ្ដើមដាំបន្លែនៅលើដីទំនេរបន្ថែមទៀត តែវាមិនទាន់ឱ្យផលទេ»។

ស្ត្រីដែលមានផ្ទះពោរពេញទៅដោយដំណាំហូបផ្លែជាច្រើនដូចជា ដូង ស្វាយ ទៀប មៀន ខ្នុរ ចេក ជាដើមនោះ បន្ថែមថា ស្បៀងដែលអ្នកស្រីទិញ មិនមែនសម្រាប់ប្រើប្រាស់ក្នុងរយៈពេលខ្លីឡើយ តែសម្រាប់ផ្គត់ផ្គង់ច្រើនខែទៅមុខទៀត៕