ប្រធានាធិបតីឥណ្ឌូណេស៊ី អរគុណប្រជាជន ដែលបានស្នាក់នៅផ្ទះ និងមិនប៉ះពាល់គ្នាដោយផ្ទាល់

COVID-19

អន្តរជាតិ

ប្រធានាធិបតីឥណ្ឌូណេស៊ី អរគុណប្រជាជន ដែលបានស្នាក់នៅផ្ទះ និងមិនប៉ះពាល់គ្នាដោយផ្ទាល់

12, Apr 2020 , 11:29 am

រូបភាព

ដោយ:

ប្រធានាធិបតីធិបតីឥណ្ឌូណេស៊ី លោក ចូកូ វីដូដូ បានចេញសារផ្លូវការមួយ ដើម្បីអរគុណដល់ប្រជាជន ដែលចូលរួមជាមួយនឹងរដ្ឋាភិបាលក្នុងវិធានការ ការពារ និងទប់ស្កាត់ការរីករាលដាលនៃជំងឺផ្លូវដង្ហើមធ្ងន់ធ្ងរ Covid-19 តាមរយៈការមិនមានការជួបជុំ និងមិនដើរហើរផ្តេសផ្តាស។

តាមរយៈគណនី YouTube ផ្លូវការរបស់លេខាធិការដ្ឋានប្រធានាធិបតីឥណ្ឌូណេស៊ី ដែលផ្សាយចេញថ្ងៃទី១០ មេសា លោក ចូកូ វីដូដូ បានថ្លែងយ៉ាងដូច្នេះថា៖« ខ្ញុំ ពិតជាអរគុណដែលអ្នកគ្រប់គ្នាបានស្នាក់នៅផ្ទះ ពីព្រោះការធ្វើបែបនេះ គឺជាផ្នែកមួយក្នុងការកាត់ផ្តាច់នៃការឆ្លងរបស់ Covid-19 ដែលមានន័យថា យើងបានជួយអាយុជីវិតគ្រួសារជាច្រើនផ្សេងទៀតពីវីរុសនេះផងដែរ»។ នេះបើយោងតាម Jakarta Post។

តាមប្រភពព័ត៌មានដដែល លោកប្រធានាធិបតី ក៏បានអំពាវនាវដល់គ្រប់ភាគីពាក់ព័ន្ធក្នុងសង្គមទាំងអស់ចូលរួមជាមួយគ្នាដើម្បីការពារ និងទប់ស្កាត់ការរីករាលដាលនៃជំងឺ ដោយឈរលើស្មារតីរួមគ្នាតែមួយ ។ លោក ជឿជាក់ ថា ឥណ្ឌូណេស៊ី អាចរួចផុតពីវិបត្តិមួយនេះបាន។

ប្រមុខដឹកនាំឥណ្ឌូណេស៊ីរូបនេះ បានស្នើឲ្យប្រជាជនមានការអត់ធ្មត់ និងសុទិដ្ឋិនិយមចំពោះវិធានការ ដោយលោក សង្កត់ធ្ងន់ថា នៅពេលដែលយើងអាចរក្សានូវវិន័យ និងបទបញ្ជាបានតាមរយៈការស្នាក់នៅផ្ទះ និងមិនធ្វើប្រាស្រ័យទាក់ទងដោយផ្ទាល់ នោះ ស្ថានភាពអាចត្រលប់ទៅរកភាពដើមឆាប់រហ័សជាពុំខាន។

មិនខុសពីមេដឹកនាំផ្សេងទៀតដែរ លោកប្រធានាធិបតី ក៏បានអរគុណដល់បុគ្គលិកសុខាភិបាលទាំងអស់ ដែលប្រឹងប្រែងក្នុងការអនុវត្តការងារ ដោយលោក ចាត់ទុក ថា នេះ គឺជាការលះបង់មួយដែលមិនអាចប្រៀបផ្ទឹមបានឡើយ។

គិតត្រឹមថ្ងៃទី១២ មេសា ឥណ្ឌូណេស៊ី បានមានករណីឆ្លងជំងឺផ្លូវដង្ហើម Covid-19 ទូទាំងប្រទេសចំនួន ៣៨៤២ ករណី ដែលក្នុងនោះមានករណីស្លាប់៣២៧ ករណី និងជាសះស្បើយវិញ ២៨៦ករណី៕