COVID-19
អន្តរជាតិ
មីយ៉ាន់ម៉ាពិចារណាកម្ចីបន្ទាន់ពី IMF, World Bank ដើម្បីទប់ស្កាត់ Covid-19 និងស្រោចស្រង់សេដ្ឋកិច្ច
រូបភាព៖ AFP
×![]()
រដ្ឋាភិបាលក្រុងណៃពិដោរ កំពុងពិចារណាលើការធ្វើកម្ចីពីដៃគូហិរញ្ញវត្ថុអន្តរជាតិធំៗ ដើម្បីយកថវិកាទាំងនោះទ្រទ្រង់ចំណាត់ការរបស់រដ្ឋាភិបាលក្នុងការប្រឆាំងនឹងជំងឺផ្លូវដង្ហើមធ្ងន់ធ្ងរ Covid-19 ក៏ដូចជាដើម្បីស្រោចស្រង់សេដ្ឋកិច្ចជាតិ ដែលកំពុងតែធ្លាក់ចុះជាបន្តបន្ទាប់។
តាមរយៈកិច្ចសម្ភាសន៍ជាមួយនឹងសារព័ត៌មាន Bloomberg នាពេលថ្មីៗនេះ មន្ត្រីជាន់ខ្ពស់រដ្ឋាភិបាលមីយ៉ាន់ម៉ា លោក Aung Naing Oo បានឲ្យដឹងថា រដ្ឋាភិបាលមីយ៉ាន់ម៉ា បានមានកិច្ចពិភាក្សាជាមួយនឹងមូលនិធិរូបិយវត្ថុអន្តរជាតិ (IMF) និងធនាគារពិភពលោក (WB) ស្តីពីលទ្ធភាពនៃកម្ចី ដើម្បីយកមកស្តា និងអភិវឌ្ឍន៍ប្រទេស ជាពិសេសនោះលើផលប៉ះពាល់សេដ្ឋកិច្ច ដោយសារតែវីរុស Covid-19។
នាកិច្ចសម្ភាសន៍ដដែលនោះ លោក លើកឡើងថា មីយ៉ាន់ម៉ា អាចនឹងធ្វើកម្ចីមួយបន្ទាន់នាពេលខាងមុខ ប្រសិនបើ មានករណីចាំបាច់ខ្លាំង ដែលនេះ គឺជាផែនការមួយ ដើម្បីកាត់បន្ថយឲ្យនៅតិចបំផុតនៃផលប៉ះពាល់លើសេដ្ឋកិច្ចជាតិ ដោយសារតែវីរុស Covid-19។
កន្លងមក អង្គការ និងស្ថាប័នផ្តល់កម្ចីអន្តរជាតិជាច្រើន បានសន្យាផ្តល់កម្ចីទ្រង់ទ្រាយធំដើម្បីជួយដល់ប្រទេស ដែលរងផលប៉ះពាល់ខ្លាំងដោយសារ ជំងឺផ្លូវដង្ហើមធ្ងន់ធ្ងរ Covid-19។ សម្រាប់ IMF បានប្រកាសពីភាពរួចរាល់ ក្នុងការទម្លាក់លុយរបស់ខ្លួនជាកម្ចី ប្រមាណ ១ ទ្រីលានដុល្លារ ខណៈ ធនាគារពិភពលោក អាចមានលទ្ធភាពបញ្ចេញកញ្ចប់កម្ចីទំហំ ១៦០ ពាន់លានដុល្លារ ក្នុងរយៈពេល១៥ខែ។
តាមរបាយការណ៍របស់ ធនាគារពិភពលោក មានរោងចក្រជាច្រើនហើយនៅមីយ៉ាន់ម៉ា ជាពិសេសលើ វិស័យកាត់ដេរ បានបិទទ្វារ ដែលបានបណ្តាលឲ្យកម្មករត្រូវបាត់បង់ការងារជាបន្តបន្ទាប់។ រីឯកំណើនសេដ្ឋកិច្ចមីយ៉ាន់ម៉ាវិញ បានធ្លាក់ចុះ និងព្យាករថា នៅចន្លោះ ២-៣ ភាគរយក្នុងឆ្នាំនេះ បើប្រៀបធៀបឆ្នាំមុនកំណើនសេដ្ឋកិច្ច កើនឡើងរហូតដល់ ៦.៤ ភាគរយឯណោះ។
គិតចាប់ពីវីរុស Covid-19 បានផ្ទុះឡើង រដ្ឋាភិបាលរបស់លោកស្រី អ៊ុងសាន ស៊ូជី បានប្រកាសកម្មវិធីផ្តល់កម្ចីដើម្បីទ្រទ្រង់ដល់អាជីវកម្មក្នុងប្រទេស ក្នុងទំហំ ៧០ លានដុល្លារ ក៏ប៉ុន្តែកម្មវិធីជំនួយនេះ ត្រូវបានរំពឹងថា នឹងមិនមានចំនួនគ្រប់គ្រាន់ដើម្បីស្តាលើផលប៉ះពាល់នេះបានឡើយ៕
Tag:
មីយ៉ាន់ម៉ា
Covid19
WB
IMF
© រក្សាសិទ្ធិដោយ thmeythmey.com
