COVID-19
អន្តរជាតិ
កូរ៉េខាងជើង នឹងអនុវត្តវិធានការកាន់តែតឹងរ៉ឹង ដើម្បីប្រយុទ្ធប្រឆាំង COVID-19 មេដឹកនាំគីម ជុងអ៊ុន។ រូបភាព៖ Reuters
× កូរ៉េខាងជើង ត្រៀមអនុវត្តវិធានការតឹងរុឹងជាងមុន ដើម្បីប្រយុទ្ធប្រឆាំងជាមួយជំងឺរលាកសួត ដែលបង្កដោយកូរ៉ូណាវីរុស (COVID-19) និងដើម្បីការពារប្រជាជនពីជំងឺឆ្លងប្រភេទថ្មី។ នេះបើតាមការចុះផ្សាយរបស់ទីភ្នាក់ងារព័ត៌មានកូរ៉េខាងត្បូងKCNA នាថ្ងៃទី១២ ខែមេសា។
គិតមកត្រឹមពេលនេះ កូរ៉េខាងជើង មិនទាន់មានរបាយការណ៍ណាមួយបង្ហាញថាមានCOVID-19 នៅក្នុងទឹកដីកូរ៉េខាងជើងឡើយ។ បើទោះមិនទាន់រកឃើញករណីនៅក្នុងប្រទេសក៏ពិតមែន ប៉ុន្តែកូរ៉េខាងជើងតែងតែប្រុងប្រយ័ត្នជានិច្ចជាមួយជំងឺឆ្លងមួយនេះ។ ក្នុងពេលនេះ មនុស្សច្រើនជាង ៥០០នាក់ត្រូវបាន កូរ៉េខាងជើងដាក់ចត្តាឡីស័ក ដើម្បីទប់ស្កាត់ការរាតត្បាតCOVID-19 នៅក្នុងប្រទេស។
តាមរយៈកិច្ចប្រជុំមួយដែលមានលោកគីម ជុងអ៊ុន មេដឹកនាំកូរ៉េខាងជើងធ្វើជាអធិបតី នាថ្ងៃទី១១ ខែមេសា ការិយាល័យនយោបាយនៃគណៈមជ្ឈិមបក្សពលករកូរ៉េខាងជើង បានអនុម័តសេចក្តីសម្រេចមួយ ដើម្បីចាត់វិធានការយ៉ាងតឹងរុឹងបំផុត ដើម្បីការពារជីវិតរបស់ប្រជាជនកូរ៉េខាងជើង និងសុវត្ថិភាពពីជំងឺឆ្លងសកល។ បើតាមការចុះផ្សាយរបស់ទីភ្នាក់ងារព័ត៌មាន KCNA COVID-19 បានបង្អាក់ដំណើរការសេដ្ឋកិច្ចរបស់កូរ៉េខាងជើងយ៉ាងខ្លាំង។ ជាការឆ្លើយតបកូរ៉េខាងជើង នឹងចាប់បង្ខំឲ្យអនុវត្តវិធានការតឹងរឹងបំផុត ដើម្បីរក្សាស្ថេរភាពនៅក្នុងប្រទេស។
បន្ថែមពីលើនេះ កូរ៉េខាងជើង ក៏ត្រៀមបង្កើតសេវាប្រកាសអាសន្ននៅទូទាំងប្រទេសផងដែរ ដើម្បីប្រឆាំងជំងឺរាតត្បាតនេះ។ បើទោះបីជាកូរ៉េខាងជើង អំពាវនាវឲ្យមានការប្រយុទ្ធប្រឆាំងនឹង COVID-19 ក៏ដោយ ក៏លោក គីម មិនបានពាក់ម៉ាស់ដែរ ខណៈមន្ត្រីមួយចំនួនមានពាក់ម៉ាស់ការពារ។
ក្រៅពីកិច្ចប្រជុំស្តីពីយុទ្ធសាស្ត្រក្នុងការទប់ស្កាត់នឹងជំងឺឆ្លងសកល លោក គីម ក៏បានតែងតាំង លោកស្រី Kim Yo Jong ដែលត្រូវជាប្អូនស្រីរបស់ខ្លួន ជាសមាជិកមិនអចិន្រ្តៃយ៍នៃការិយាល័យនយោបាយនៃបក្សពលករកូរ៉េខាងជើងជាថ្មីផងដែរ៕
Tag:
កូរ៉េខាងជើង
COVID-19
© រក្សាសិទ្ធិដោយ thmeythmey.com