ភ្នំពេញ៖ ការរាតត្បាតជំងឺកូវីដ-១៩ បានធ្វើពលរដ្ឋនៅតាមសហគមន៍រងផលប៉ះពាល់ផ្នែកជីវភាព។ ដើម្បីរួមចំណែកសម្រាលការលំបាករបស់ពលរដ្ឋ មូលនិធិម៉ានី រួមជាមួយយុវជនស្ម័គ្រចិត្តចំនួន១៥ក្រុម កាលពីព្រឹកថ្ងៃអាទិត្យ ទី១២ ខែមេសា បានរៀបចំពិធីចែកអំណោយ ក៏ដូចជាការអប់រំណែនាំបន្ថែមដល់ពលរដ្ឋ និងយុវជន ពីការចូលរួមទប់ស្កាត់ការរាលដាលកូវីដ-១៩។ កម្មវិធីចាប់ផ្តើមចេញពីសង្កាត់ស្ទឹងមានជ័យទី៣ ហើយនឹងបន្តរហូតដល់ទៅ១០៥សង្កាត់នៅទូទាំងរាជធានីភ្នំពេញ។
ក្រោមកិច្ចសហការពីសាលារាជធានីភ្នំពេញ និងពីបណ្តា ស្ថាប័ន សមាគម និងក្រុមយុវជនស្ម័គ្រចិត្ត ព្រមទាំងក្រុមហ៊ុនកូកាកូឡា គម្រោងសប្បុរសធម៌ផ្តួចផ្តើមដោយ មូលនិធិម៉ានី បាននាំយកនូវអំណោយទៅប្រគល់ជូនសង្កាត់ទាំងអស់ក្នុងរាជធានីភ្នំពេញ ដើម្បីបន្តចែកជូនទៅដល់ប្រជាពលរដ្ឋដែលមានជីវភាពខ្វះខាតខ្លាំង នៅក្នុងមូលដ្ឋានជាក់ស្តែងរបស់សង្កាត់នីមួយៗ។
អំណាយចំនួន២៥០កញ្ចប់
កាលពីព្រឹកថ្ងៃអាទិត្យ លោក ហ៊ុន ម៉ានី ប្រធានក្រុមប្រឹក្សាភិបាលមូលនិធិម៉ានី បានចាប់ផ្តើមកម្មវិធីនៅសាលាសង្កាត់ស្ទឹងមានជ័យទី៣ លោក ស សុខា ដឹកនាំកម្មវិធីនៅសង្កាត់ព្រែកឯក ខណៈដែលថ្នាក់ដឹកនាំយុវជនស្ម័គ្រចិត្តនៃគម្រោងសប្បុរសធម៌ដទៃ មានសកម្មភាពសង្កាត់ចំនួន២៣ផ្សេងទៀត។
ពលរដ្ឋដែលខ្វះខាតជាក់ស្តែង ទទួលបានអំណោយមានដូចជាអង្ករ សាប៊ូ ទឹកស៊ីអ៊ីវ និងទឹកភេសជ្ជៈ ក៏ដូចជាផ្ទាំងបដាអប់រំផ្សេងៗ។ គម្រោងសប្បុរសធម៌នេះ មានគោលបំណងនាំយកអំណោយដែលក្រុមការងារមូលនិធិម៉ានី និងក្រុមយុវជនស្ម័គ្រចិត្តមកពី១៥ ក្រុមផ្សេងៗ បានធ្វើការវេចខ្ចប់រួច ទៅប្រគល់ជូនសង្កាត់ទាំង ១០៥ នៅទូទាំងរាជធានីភ្នំពេញ ដើម្បីជាការចូលរួមជាមួយនឹងរាជរដ្ឋាភិបាលកម្ពុជាក្នុងយុទ្ធនាការប្រយុទ្ធ ប្រឆាំងនឹងជំងឺកូវីដ១៩ ក្នុងប្រទេសកម្ពុជា។
លោក ហ៊ុន ម៉ានី ដែលជាតំណាងរាស្ត្រផងដែរនោះ បានប្រាប់លើកឡើងប្រាប់អ្នកសារព័ត៌មានថា៖ «ក្នុងគ្រាដែលសង្គមកំពុងជួបទុក្ខលំបាក យើងសង្ឃឹមថាការផ្ដល់អំណោយជាកញ្ចប់តូចៗនេះ ក៏អាចចូលរួមចំណែកជាមួយរដ្ឋាភិបាលដើម្បីទប់ស្កាត់ និងឆ្លងផុតនូវទុកលំបាកនេះទាំងអស់គ្នា»។
លោកក៏បានបន្ថែមថា រដ្ឋាភិបាលមិនអាចចេះតែរឹតត្បិតពលរដ្ឋនោះទេ ប៉ុន្តែពលរដ្ឋផ្ទាល់ត្រូវយល់ឲ្យច្បាស់ពីបញ្ហាដែលកំពុងកើតមាន បើទោះបីជាបច្ចុប្បន្នមិនទាន់ឈានដល់ដំណាក់កាលមួយដែលធ្ងន់ធ្ងរក៏ដោយ។ យុវជន ក៏ដូចជាពលរដ្ឋកម្ពុជាទាំងអស់ចាំបាច់ណាស់ក្នុងកាលៈទេសៈនេះដើម្បីទប់ស្កាត់ ក៏ដូចជាប្រឆាំងនឹងជំងឺកូវីដ-១៩នេះ។
បើតាម លោក គីម ពីស្សី មន្ត្រីរដ្ឋបាលនៃមជ្ឈមណ្ឌលអភិវឌ្ឍកម្ពុជា ក្នុងកាលៈទេសៈនេះ មិនមែនតែកម្ពុជាទេដែលរងឥទ្ធិពលពីការរាលដាលនៃជំងឺកូវីដ-១៩ ពលរដ្ឋទាំងអស់គប្បីចូលរួមទប់ស្កាត់លើបញ្ហានេះ។ ពលរដ្ឋមានតួនាទីផ្សព្វផ្សាយពីការរាលដាលនៃជំងឺ ពិសេសចូលរួមបង្ការនៃឆ្លងដោយត្រូវរក្សាអនាម័យ និងស្ដាប់ការណែនាំពីក្រសួងសុខាភិបាល និងរដ្ឋាភិបាលផងដែរ។
លោក គីម ពីស្សី
យុវជនវ័យ២៤ឆ្នាំរូបនេះ ក៏មានការបារម្ភចំពោះជំងឺកូវីដ-១៩នេះដែរ ប៉ុន្តែលោកក៏បានអះអាងថាខ្លួនបានរក្សានូវអនាម័យបានយ៉ាងល្អ ដូចជាពាក់ម៉ាស មានភ្ជាប់មកជាមួយនូវជែលលាងសម្អាតដៃតាមខ្លួន និងបានរក្សាគម្លាតពីអ្នកដទៃទៀតផង។
កញ្ញា គីន សំណាង ប្រធានក្រុមយើងខ្មែរក៏បានលើកឡើងផងដែរថា៖ «បច្ចុប្បន្នកម្ពុជាកំពុងជួបនូវបញ្ហានៃការរាលដាលជំងឺកូវីដ-១៩ ហើយអំពើសប្បុរសធម៌ក្នុងពេលលំបាកនេះវាពិតជាល្អខ្លាំងណាស់។ ក្នុងការចូលរួមចំណែកជួយនេះមិនសម្រាប់តែអង្គការមូល ឬរដ្ឋាភិបាលនោះទេ យុវជន និងពលរដ្ឋទាំងអស់ក៏ត្រូវចូលរួមប្រឆាំងនឹងបញ្ហានេះដែរ»៕
កញ្ញា គីន សំណាង