ពីនេះ ពីនោះ
សង្គ្រាមប្រឆាំងកូវីដ៖ រដ្ឋាភិបាលពិតជាបានបង្ហាញភាពខ្វល់ខ្វាយពីជីវិតពលរដ្ឋ
× ធ្លាប់តែផឹកកាហ្វេជជែកគ្នាទល់មុខ តែពេលនេះ សុធីរ និងសំណាងជជែកតាមតេឡេក្រាមរឿងកូវីដ-១៩ នៅស្រុកខ្មែរ។ ក្រោយពីនិយាយដល់ទិដ្ឋភាពទាំងមូល ក្លើទាំងពីរក៏មានចិត្តអាណិតរដ្ឋាភិបាល ហើយក៏មិនចង់បន្ទោសប្រជាជនដែរ។
សំណាង៖ អញឃើញយុទ្ធនាការប្រឆាំង អាក្វីដស្អីគេហ្នឹង ដូចជាស្រួចស្រាល់ល្អមែនទែន អាធីអ្ហា។ នៅតាមផ្លូវ ផ្ទាំងប៉ាណូធំៗ ដែលគេធ្លាប់តែដាក់ផ្សាយពាណិជ្ជកម្មផលិតផល ត្រូវបានជំនួសដោយផ្ទាំងអប់រំប្រាប់ពលរដ្ឋឱ្យលាងដៃ ប្រឆាំងអាក្វីដ។ ផ្ទាំងប៉ាណូ LED ដែលផ្សាយស្ប៉តផលិតផល ក៏ក្លាយជាស្ប៉តវីដេអូខ្លី ភឺ្លចិញ្ចាចចិញ្ចែងពេញផ្លូវ។ ផ្ទាំងបដាជាច្រើនដែលមានសារប្រឆាំងកូវីដ ត្រូវបានបិទតាមជញ្ជាំងសាលារៀន តាមទីសាធារណៈ។ នេះអញមិនទាន់និយាយពីហ្វេសប៊ុក ក្រុមឆាតនានាដែលមាន រូបភាពប្រាប់ឱ្យនៅផ្ទះ ពាក់ម៉ាស់ ដែលគេចែកផ្សាយបន្តគ្នាយ៉ាងទូលំទូលាយផង។
សុធីរ៖ អានេះគេហៅថា ប្រើកម្លាំងរួម ប្រើធនធានសរុប។ រដ្ឋាភិបាលបានធ្វើល្អណាស់លើកនេះ។ អញពេញចិត្ត។ ទាំងវិធានការ និងទាំងសកម្មភាព ស្រុះគ្នាដូចស្រមោច តាំងពីលើដល់ក្រោម។ ប្រជាជាតិខ្មែរទាំងមូលបានរួមគ្នា។ វិស័យឯកជនបរិច្ចាគ ផ្តល់វិភាគទាន ជាថវិកា ជនសម្ភារ ជាអង្ករ ទៅរដ្ឋាភិបាលផង និងបានធ្វើរៀងៗខ្លួនជាលក្ខណៈឯកជនដាច់ដោយឡែកផង។ រដ្ឋាភិបាលប្រជុំ ពិភាក្សាបម្រុងថវិកា ស្បៀង និងសម្ភារប្រើប្រាស់ប្រឆាំងការឆ្លងដោយយថាហេតុជំងឺកូវីដនេះ។ ជារួម លើកនេះ អញឃើញរដ្ឋាភិបាលមានសកម្មភាពរស់រវើក ខ្វាយខ្វល់ និងគិតគូរពីប្រជាជនមុតមាំណាស់។
សំណាង៖ បើតាមអញស្មាន រដ្ឋាភិបាលនៅបារម្ភក៏មិនតិចដែរហ្នុង។ មិនដឹងថ្ងៃមុខយ៉ាងម៉េច? អញថា ធ្វើសង្គ្រាមជាមួយមនុស្ស ដូចជានៅស្រួលជាងនេះ ព្រោះសត្រូវជាមនុស្ស យើងមើលឃើញ។ តែនេះមេរោគ វើយ! មិនដឹងវានៅកន្លែងណា មកដល់ពេលណា? អញបាញ់អាល់កុលលាងដៃឡើងជ្រួញស្បែកអស់ហើយ។
សុធីរ៖ អើ ឥឡូវនេះ ក្រៅពីទូរសព្ទ គឺត្រូវមានម៉ាស់ និងទឹកលាងដៃតាមជាមួយរហូត គ្រប់តែគ្នាហ្នឹង។ ប៉ុណ្ណឹងហើយ នៅមានអ្នកមិនស្តាប់ទៀត។ រកតែខឹង ខឹងមិនកើត។ ធ្វើម៉េចពួកគេមិនយល់។ អញចង់តែស្រែកសួរពួកគាត់ អារឿងទៅស្រុកហ្នឹងទេអ្ហា។ សួរថា «មិនបានជួបជុំ និងលែងបានជួបជុំ» រើសយកមួយណា?
© រក្សាសិទ្ធិដោយ thmeythmey.com