COVID-19
អន្តរជាតិ
អ្នកជំនាញជំងឺឆ្លងអាមេរិក៖ អាមេរិក អាចបើកសកម្មភាពសេដ្ឋកិច្ចឡើងវិញនៅខែក្រោយ លោក Anthony Fauci ប្រធានវិទ្យាស្ថានជាតិ នៃជំងឺរមាស់ និងជំងឺឆ្លង
× លោក Anthony Fauci អ្នកជំនាញរោគឆ្លងរបស់អាមេរិក នាថ្ងៃទី១២ ខែមេសា បានលើកឡើងថា អាមេរិកអាចបើកសកម្មភាពសេដ្ឋកិច្ចរបស់ខ្លួននាខែក្រោយ។ ការលើកឡើងបែបនេះ ធ្វើឡើងខណៈពេលអាមេរិកកំពុងមានអ្នកផ្ទុកជំងឺរលាកសួត ដែលបង្កដោយកូរ៉ូណាវីរុស (COVID-19) ក្នុងអត្រាដ៏ខ្ពស់ជាងគេនៅលើពិភពលោក ប៉ុន្តែរំពឹងឡើងដល់ចំណុចឆាប់ៗនេះ។
នាពេលកន្លងមក ប្រធានាធិបតីអាមេរិក ដូណាល់ ត្រាំ ធ្លាប់បង្ហើបពីការចង់បើកចំហសេដ្ឋកិច្ចរបស់អាមេរិករួចហើយនៅចំពិធីបុណ្យ Easter ដែលចំថ្ងៃទី១២ ខែមេសា។ ប៉ុន្តែនៅក្នុងថ្ងៃបុណ្យនេះ គ្មានប្រជាជនអាមេរិកណាម្នាក់ចង់ចេញពីផ្ទះឡើយ ចំណែកការប្រារព្ធពិធីបុណ្យទៀតសោត គឺធ្វើឡើងតាមអនឡាញតែប៉ុណ្ណោះ ដើម្បីកាត់បន្ថយករណីឆ្លង COVID-19។
ពាក់ព័ន្ធបញ្ហាបើកសកម្មភាពសេដ្ឋកិច្ចអាមេរិកឡើងវិញក្នុងអំឡុងពេលផ្ទុះCOVID-19 នេះ លោក Anthony Fauci ប្រធានវិទ្យាស្ថានជាតិ នៃជំងឺរមាស់ និងជំងឺឆ្លង បានប្រាប់ទូរទស្សន៍ CNN ថា អាមេរិកអាចបើកសកម្មភាពសេដ្ឋកិច្ចរបស់ខ្លួនមួយផ្នែក នាខែឧសភា។ នេះគឺជាការរំពឹងទុករបស់អ្នកជំនាញ ខណៈពេលអាមេរិក កំពុងមានចំនួនអ្នកផ្ទុក COVID-19 ច្រើនជាងគេ។
ក្នុងកិច្ចសម្ភាសខាងលើ លោក Fauci បង្ហាញសង្ឃឹមថា៖ «នៅដំណាច់ខែឧសភា អាមេរិកអាចឈានដល់ដំណាក់កាលដែលអាចលើកជាសំណួរថា តើមានធាតុផ្សំអ្វី ដែលអាចដកការរឹតត្បិតប្រកបដោយសុវត្ថិភាព និងមិនប៉ះពាល់ដល់ប្រជាជន? ប្រសិនជាមាន អាមេរិក នឹងដកវាភ្លាម ប៉ុន្តែបើអត់ទេ អាមេរិក នៅតែបន្តរឹតត្បិតទៅទៀត។»
លោក Fauci ជឿថា តំបន់នីមួយៗ គួរតែត្រៀមខ្លួនឲ្យបានរួចរាល់លើការបើកសកម្មភាពសេដ្ឋកិច្ចឡើងវិញ ជាជាងពឹងផ្អែកតែលើរដ្ឋាភិបាលសហព័ន្ធ។ ត្រង់ចំណុចនេះ អាមេរិកគឺខុសពីបណ្តាប្រទេសអឺរ៉ុបមួយចំនួននៅត្រង់ថា ពេលអាមេរិកបិទតំបន់ គឺផ្អែកលើរដ្ឋាភិបាលសហព័ន្ធ ចំណែកនៅអឺរ៉ុប ពេលតំបន់ណាមួយកំពុងតែរងគ្រោះខ្លាំងដោយសារCOVID-19 គឺផ្អែកទៅលើការសម្រេចចិត្តរបស់រដ្ឋាភិបាលថ្នាក់តំបន់ ដែលអាចមានសិទ្ធិបិទតំបន់យូរ ឬឆាប់។
ដោយឡែក តាមរយៈបណ្តាញសង្គម Twitter នាថ្ងៃទី១២ ខែមេសា លោក ត្រាំបានសរសេរយ៉ាងដូច្នេះថា៖ « យើងនឹងឈ្នះ និងកំពុងតែឈ្នះ សត្រូវដែលមើលមិនឃើញនេះ (COVID-19)»។
គិតមកត្រឹមរសៀលថ្ងៃទី១៣ ខែមេសា អាមេរិកមាន COVID-19 សរុបជាង ៥៦ម៉ឺនករណី អ្នកស្លាប់មានជាង ២ម៉ឺនករណី និងអ្នកជាសះស្បើយមានចំនួនជាង ៣ម៉ឺនករណី៕
© រក្សាសិទ្ធិដោយ thmeythmey.com