បទ គោព័ទ្ធស្នឹង ដោយ ប៉ាកកាខ្មៅ
កុរកោសបោសបាចគ្រោះកាចទៅ ទៅមុខជូតនៅនាំជ័យជោគ
ជោគមានតេជឈ្នះអស់រោគ
រោគមានក្នុងលោកសូមសូន្យសាប។
សាបរលាបទៅកូវីដរោគ រោគដែលនាំលោកធ្លាក់ដុនដាប
ដាបដល់ដួលដេកហារមាត់ស្ងាប ស្ងាបស្ងប់ថប់ក្រាបក្រិសក្រៀមក្រិន។
ក្រិនមិនលូតលាស់សេដ្ឋកិច្ច កិច្ចការច្រើនតិចស្ទើរហោចហិន
ហិនហៃហាក់ម៉ដ្តដូចគេកិន កិនគាបខ្មែរចិនថៃអាគាំង។
គាំងកឿងកល់កៀបរាបរុះរោយ រោយធ្លាក់ថ្លោះធ្លោយព្រោះរោគឃាំង
ឃាំងផ្លូវទឹកគោកដាច់ស្តុកឃ្លាំង ឃ្លាំងរោងចក្រគាំងការងារស្ទះ។
ស្ទះទាំងដំណើរអភិវឌ្ឍ វឌ្ឍនភាពរដ្ឋស្ទុះលែងលះ
លះលង់ចំណាយចាយដូចជះ ជះចាយខ្លះស្ទះចំណូលផុត។
ផុតកុរដាច់រោគជូតនាំលាភ លាភរួមរោគរាបក្រាបស្រកស្រុត
ស្រុតរោគលោកស្រាន្តបានចៀសផុត ផុតភ័យតក់ស្លុតពីកូវីដ៕