ជាតិ
លោកហេង សួរ៖ រោងចក្រជាង៩៥ភាគរយ ដំណើរការធម្មតានៅថ្ងៃនេះ
× ភ្នំពេញ៖ រោងចក្រលើសពី ៩៥ភាគរយ បានបើកដំណើរការធម្មតា នៅថ្ងៃទី១៣ ខែមេសានេះ ខណៈកម្មករក៏បានមកធ្វើការធម្មតាដែរ។ នេះបើតាមលោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបញ្ជាក់ប្រាប់សារព័ត៌មានថ្មីៗ។
លោក ហេង សួរ បានបញ្ជាក់ប្រាប់សារព័ត៌មានថ្មីៗតាមបណ្តាញតេឡេក្រាមដូច្នេះថា៖«ព្រឹកនេះ រោងចក្រទាំងអស់ដែលបានដំណើរការកាលពីថ្ងៃសៅរ៍ បានបើកដំណើរការជាធម្មតា។ បន្ថែមពីនេះ នៅខេត្តស្វាយរៀង រោងចក្រដែលបានឈប់សម្រាក កាលពីថ្ងៃសៅរ៍ ក៏បានបើកដំណើរការវិញនៅថ្ងៃនេះ។ ជារួមគឺរោងចក្រលើស៩៥ភាគរយ បានដំណើរការ រីឯកម្មកររោងចក្រក៏បានមកធ្វើការធម្មតា»។
កន្លងមក អ្នកនាំពាក្យក្រសួងការងាររូបនេះ ក៏ធ្លាប់លើកឡើងដែរថា កម្មកររោងចក្រដែលឈប់សម្រាកអំឡុងចូលឆ្នាំខ្មែរនេះ តម្រូវឲ្យធ្វើចត្តាឡីស័ក១៤ ថ្ងៃមុនចូលធ្វើការវិញ។ ចំណែក កម្មករ ដែលឈប់សម្រាកគ្មានច្បាប់អនុញ្ញាត ក៏តម្រូវឲ្យចត្តាឡីស័ក១៤ថ្ងៃ មុនចូលធ្វើការដែរ ប៉ុន្តែពួកគេមិនទទួលបានប្រាក់ឈ្នួលឡើយ។
រដ្ឋាភិបាល បានផ្អាកពិធីបុណ្យចូលឆ្នាំខ្មែរដើម្បីទប់ស្កាត់ការរាលដាលជំងឺកូវីដ-១៩ ដោយតម្រូវឲ្យមន្ត្រីរាជការ ក្រុមហ៊ុនឯកជន បន្តធ្វើការធម្មតា។ រដ្ឋាភិបាលនឹងសងថ្ងៃឈប់សម្រាក់រយៈពេល៥ថ្ងៃវិញ នៅពេលជំងឺCOVID-19បញ្ចប់។ ជាមួយគ្នានេះដែរ រដ្ឋាភិបាលកីបានចេញប្រកាស ដោយហាមប្រាមការធ្វើដំណើរឆ្លងពីខេត្តមួយ ទៅខេត្តមួយ ចាប់ពីយប់ថ្ងៃទី៩ ដល់យប់ថ្ងៃទី១៦មេសានេះ ដើម្បីទប់ស្កាត់ ការរីករាលដាលជំងឺCOVID-19៕
Tag:
កម្មករ
រោងចក្រ
ចូលឆ្នាំ
© រក្សាសិទ្ធិដោយ thmeythmey.com