ជាតិ
សង្គមជាតិ
Covid-19៖ការចែកស្បៀងអាហារ និងសម្ភារការពារខ្លួន នៅតែបន្តក្នុងរូបភាពជាក្រុមតូចៗ
×![]()
ដោយ: ថ្មីៗ
ដោយ៖ ស៊ែម ម៉ូនីតា
ភ្នំពេញ៖ វិបត្តិកូវីដ-១៩ បានធ្វើឲ្យចំណូលរបស់ប្រជាពលរដ្ឋ ដែលប្រកបរបរតូចតាច រកមួយថ្ងៃសម្រាប់តែមួយថ្ងៃធ្លាក់ចុះខ្លាំង។ ពួកគាត់ក៏ប្រឈមនឹងការខ្វះខាតស្បៀងផងដែរ។ តែទោះជាយ៉ាងនេះក្តី គេសង្កេតឃើញថា មានសប្បុរសជនមួយចំនួន បានចុះចែកស្បៀងអាហារដល់ពួកគាត់ ហើយសកម្មភាពនេះ នៅតែបន្តរហូតដល់បច្ចុប្បន្ន។ 
តាំងតែអំឡុងថ្ងៃទី២០ មីនាមកម្ល៉េះ លោក ប៊ូ សារឿន ដែលពលរដ្ឋនៅរាជធានីភ្នំពេញ បានចែកអាល់កុល អង្ករ និងត្រីខ ដល់អ្នកដែលខ្វះខាត និងបាត់ចំណូលដោយសារវិបត្តិកូវីដ-១៩។ លោក សារឿន ពន្យល់មូលហេតុដែលលោក នៅបន្តការចែកជូនស្បៀងអាហារដល់អ្នកដែលខ្វះខាតដូច្នេះ៖«ខ្ញុំគិតថាអ្វីៗវាមិនទាន់ធូរស្បើយ ហើយស្របពេលដែលយើងមិនអាចធ្វើដំណើរពីខេត្តមួយទៅខេត្តមួយទៀត ដូច្នេះហើយពួកគាត់នៅតែខ្វះខាត។ នេះជាការបន្ថែមពីអ្វីដែលខ្ញុំធ្លាប់ធ្វើទេ។ ពីមុនខ្ញុំបរិច្ចាគឈាម តែឥឡូវហួសអាយុ ហើយខ្ញុំក៏មានការចែកកង់ដល់សិស្សក្រីក្រនៅតាមបណ្តាខេត្តដែរ។ ពេលគេចូលរៀនវិញ គឺខ្ញុំមានកម្មវិធីចែកកង់ និងសម្ភារសិក្សាទៀត»។
ក្រុមគោលដៅរបស់លោក សារឿន ដើមឡើយត្រឹមតែអ្នករត់ម៉ូតូឌុប និងអ្នកធាក់ស៊ីក្លូប៉ុណ្ណោះ តែដោយសង្កេតឃើញថាពួកគាត់ទទួលបានស្បៀង និងសម្ភារការងារខ្លួននានាពីសប្បុរសជនផ្សេងទៀតច្រើនដែរ លោកប៊ូ សារឿន ក៏បានប្តូរគោលដៅរបស់ខ្លួន ដោយផ្តោតលើអ្នកលក់ដូរតូចតាច ដូចជាអ្នកលក់ចេកអាំង,ពោតអាំង,អ្នកលក់មីឆា,អ្នករើសអេតចាយ,សន្តិសុខ និងអ្នកលក់លៀសហាលវិញ។
បើតាមលោក ប៊ូ សារឿន ចាប់តាំងពីចាប់ផ្តើមការចែកស្បៀងអាហារនេះមក លោកបានចំណាយជាង ១,០០០ពាន់ដុល្លារហើយ ដែលថវិកាទាំងនោះ ជាថវិកាផ្ទាល់ខ្លួនខ្លះ និងថវិកាដែលលោកទទួលបានពីមិត្តភក្តិ និងសប្បុរសជននានាខ្លះ។
មិនខុសពីលោក ប៊ូ សារឿន នោះទេក្រុមរបស់ លោក ទឹម បូរីវ៉ាត់ ដែលមានគ្នា៧នាក់ បានប្រកាសរ៉ៃថវិកា ដើម្បីទិញស្បៀងអាហារ ដល់អ្នករងគ្រោះដោយសារវិបត្តិកូវីដ-១៩ នេះដោយត្រង់ៗតែម្តងនៅតាមបណ្តាញសង្គម និងនៅក្នុងចំណោមមិត្តភក្តិរបស់ខ្លួន។ ចាប់ផ្តើមចែកសកម្មភាពនេះ តាំងតែពីថ្ងៃទី៤ មេសាមក លោក ទឹម បូរីវ៉ាត់ ពន្យល់មូលហេតុថា ការដែលរូបគេ និងក្រុម ប្រមូលលុយគ្នា មកទិញស្បៀងអាហារចែកអ្នកក្រីក្របែបនេះ គឺជាសកម្មភាពរួមចំណែកជួយដល់សង្គម ហើយវាក៏ជាការសន្សំបុណ្យកុសលដែរ។
មានវ័យ២៧ឆ្នាំ បូរីវ៉ាត់ បន្តបានប្រាប់សារព័ត៌មានថ្មីៗតាមទូរសព្ទថា មកទល់ពេលនេះ ក្រុមរបស់ខ្លួនបានចែកស្បៀងដល់អ្នកខ្វះខាតនៅរាជធានីភ្នំពេញ ប្រមាណ២០០កញ្ចប់ហើយ ដែលកញ្ចប់នីមួយៗមានអង្គរ, មី,ត្រីខ,ម៉ាស់,សាប៊ូ, ទឹកត្រី និងទឹកស៊ីអីវ និងប្រាក់២ម៉ឺនរៀល។ បើតាម លោក ទឹម បូរីវ៉ាត់ ក្រុមគោលដៅរបស់គេ ក៏ជាអ្នកប្រកបរបរតូចតាចដែរ ដូចជាចាស់ៗតាមផ្លូវ,អ្នករត់ម៉ូតូឌុប,អ្នកធាក់ស៊ីក្លូ, និងអ្នកលក់លៀសហាលជាដើម។ បូរីវ៉ាត់ ក៏អះអាងដែរថា ក្រុមខ្លួននៅតែបន្តសកម្មភាពមនុស្សធម៌នេះទៀត ខណៈក្រុមរបស់គេនៅតែទទួលបានថវិកា ពីសប្បុរសជនជាហូរហែនោះ។
វិបត្តិកូវីដ-១៩នៅកម្ពុជា បានធ្វើឲ្យ លោក រ័ត្ន គុលិកា ផ្តួចផ្តើមសកម្មភាពចែកសម្ភារប្រើប្រាស់ និងថវិកា ដល់អ្នកដែលខ្វះខាតជាលើកដំបូង។ លោក រ័ត្ន គុលិកា ប្រាប់សារព័ត៌មានថ្មីៗថា លោកចាប់ផ្តើមសកម្មភាពនេះ នៅថ្ងៃទី២ មេសា ក្រោមរូបភាពប្រកាសរ៉ៃថវិកាតាមបណ្តាញសង្គម។ លោក រ័ត្ន គុលិកា ពន្យល់ថា៖«ខ្ញុំមើលឃើញស្ថានភាពជាក់ស្ដែងថា ចាំបាច់ត្រូវតែរួមគ្នា ក្នុងការប្រឆាំងនិងកូវីដ-១៩នេះហើយ ក៏ត្រូវជួយដល់អ្នកដែលគាត់ខ្វះខាតថវិកា និងចំនេះដឹងដើម្បីទប់ទល់និងជំងឺនេះផងដែរ»។
បើតាមលោក រ័ត្ន គុលិកា ថវិការួមចំណែកផ្ទាល់ខ្លួន និងថវិកាដែលទទួលបានពីសប្បុរសជន ត្រូវបានបែងជែកជា២ចំណែក។ ចំណែកមួយសម្រាប់ចូលរួមជាមួយរាជរដ្ឋាភិបាល និងមួយចំណែកទៀតយកទៅទិញសម្ភារផ្សេងៗ រួមមានអាល់កុល ម៉ាស់ ចែកដល់អ្នកខ្វះខាតជាក់ស្តែង។
គួរកត់សម្គាល់ថា ក្រៅតែពីការចែកស្បៀងអាហារ ម៉ាស់ និងអាល់កុល អ្នកផ្តួចផ្តើមសកម្មភាពមនុស្សធម៌ទាំងនេះ ក៏អះអាងដែរថា បានចូលរួមអប់រំ ពីវិធីបង្ការការឆ្លងជំងឺកូវីដ-១៩ ដល់ប្រជាពលរដ្ឋដែលពួកគេបានជួបដែរ។
គិតត្រឹមថ្ងៃទី១៣ ខែមេសា កម្ពុជាមានអ្នកឆ្លងកូវីដ-១៩ចំនួន១២២នាក់ ក្នុងនោះអ្នកជាសះស្បើយសរុប មានចំនួន ៧៧នាក់៕
Tag:
ចែកស្បៀង
ប៊ូ សារឿន
រ័ត្ន គុលិកា
ទឹម បូរីវ៉ាត់
Covid-19
© រក្សាសិទ្ធិដោយ thmeythmey.com
