COVID-19៖ ហ្វីលីពីន មានករណីឆ្លងច្រើនជាងគេនៅអាស៊ានដែលឡើងជិតដល់៥ពាន់នាក់

COVID-19

អន្តរជាតិ

COVID-19៖ ហ្វីលីពីន មានករណីឆ្លងច្រើនជាងគេនៅអាស៊ានដែលឡើងជិតដល់៥ពាន់នាក់

14, Apr 2020 , 10:12 am

រូបភាព

ដោយ: ថ្មីៗ

ហ្វីលីពីន បានក្លាយជាប្រទេសមានករណីឆ្លងជំងឺរលាកសួតបង្កដោយកូរ៉ូណាវីរុសប្រភេទថ្មី (COVID-19) ច្រើនជាងគេ ដោយនាំមុខម៉ាឡេស៊ីវិញ។ គិតត្រឹមថ្ងៃទី១៣ ខែមេសា ហ្វីលីពីនមានករណីឆ្លងចំនួន៤៩៣២នាក់ ឯម៉ាឡេស៊ីវិញមានជិត៤៩០០នាក់។ ប្រទេសសមាជិកអាស៊ានផ្សេងទៀត ក៏មានករណីឆ្លងកើនឡើងដែរ ខណៈកម្ពុជាមិនមានករណីឆ្លងថ្មីនៅថ្ងៃដូចគ្នានេះ។

នៅថ្ងៃទី១៣ ខែមេសា ហ្វីលីពីន បានរាយការណ៍ពីករណីឆ្លងថ្មី COVID-19 ចំនួន២៨៤នាក់ ដែលនាំឲ្យតួលេខសរុបនៃប្រទេសនេះឡើងដល់៤៩៣២នាក់។ តួលេខនេះ ធ្វើឲ្យហ្វីលីពីន ក្លាយជាប្រទេសមានករណីឆ្លងច្រើនជាងគេនៅតំបន់អាស៊ីអាគ្នេយ៍ ហើយតួលេខស្លាប់មាន៣១៥នាក់

ម៉ាឡេស៊ី ដែលធ្លាប់ឈរលើតារាងនោះ ធ្លាក់មកលេខពីរវិញ។ នៅថ្ងៃទី១៣នេះដែរ ម៉ាឡេស៊ីមានករណីឆ្លងចំនួន១៣៤នាក់។ តួលេខសរុប គឺ៤៨១៧នាក់ ហើយស្លាប់៧៧នាក់។ ករណីឆ្លងប្រចាំថ្ងៃនៅម៉ាឡេស៊ី បានថយចុះគួរឲ្យកត់សម្គាល់បន្ទាប់ពីអាជ្ញាធរចេញបម្រាមបិទប្រទេសតាំងពីខែមីនាមក។

សម្រាប់សមាជិកអាស៊ានផ្សេងទៀតវិញ ឥណ្ឌូណេស៊ីមានករណីឆ្លង៤៥៥៧នាក់ ស្លាប់៣៩៩នាក់, សិង្ហបុរីឆ្លង២៩១៨នាក់ ស្លាប់៩នាក់, ថៃឆ្លង២៥៧៩នាក់ ស្លាប់៤០នាក់, វៀតណាមឆ្លង២៦៥នាក់, ព្រុយណេឆ្លង១៣៦នាក់ ស្លាប់ម្នាក់, កម្ពុជាឆ្លង១២២នាក់, មីយ៉ាន់ម៉ាឆ្លង៦២នាក់ ស្លាប់៤ និងឡាវឆ្លង១៩នាក់។ នេះបើតាមតួលេខផ្សាយដោយវេបសាយ Worldometer ដែលប្រមូលតួលេខអ្នកឆ្លងទូទាំងពិភពលោក។

នៅថ្ងៃទី១៤ ខែមេសា មេដឹកនាំទាំង១០ កំពុងជជែកគ្នាពីវិធានការដើម្បីទប់ស្កាត់ការរាលដាល COVID-19 ក្នុងតំបន់់ និងផលប៉ះពាល់ដែលបង្កដោយជំងឺមួយនេះ៕