COVID-19
អន្តរជាតិ
រដ្ឋាភិបាលឡាវហាមដាច់ខាតការរៀបពិធីជប់លៀងធំ និងពិធីសាសនាពេលចូលឆ្នាំ
× រដ្ឋាភិបាលក្រុងវៀងចន្ទន៍ បានចេញសេចក្តីថ្លែងការណ៍មួយដើម្បីក្រើនរម្លឹកដល់ប្រជាជនស្តីពីការអនុវត្តឲ្យបានខ្ជាប់ខ្ជួននូវបទបញ្ជារបស់រដ្ឋាភិបាលលើវិធានការការពារ និងទប់ស្កាត់ការរីករាលដាលនៃជំងឺផ្លូវដង្ហើម Covid-19។ សេចក្តីថ្លែងការណ៍នេះ គឺជាការពញ្ញាក់ស្មារតីរបស់ប្រជាជនកុំឲ្យភ្លេចខ្លួន ជាពិសេសក្នុងឱកាសនៃការប្រារព្ធពិធីបុណ្យចូលឆ្នាំប្រពៃណី។
តាមរយៈសេចក្តីថ្លែងការណ៍ចេញដោយគណៈកម្មាការប្រយុទ្ធនឹងជំងឺ Covid-19 រដ្ឋាភិបាលឡាវ នៅថ្ងៃទី១១ ខែមេសា បានទទូចឲ្យប្រជាជនទាំងអស់យកចិត្តទុកដាក់ខ្ពស់ក្នុងការអនុវត្តតាមបទបញ្ជារបស់រដ្ឋាភិបាល ខណៈថ្ងៃចូលឆ្នាំប្រពៃណីជាតិ ក៏កំពុងតែចូលមកដល់ផងនោះ។ នេះបើយោងតាមការចុះផ្សាយរបស់សារព័ត៌មានឡាវ Vientiane Times។
តាមសេចក្តីថ្លែងការណ៍ដដែល រដ្ឋាភិបាលឡាវ បានគូសបញ្ជាក់ជាថ្មី ពីបទបញ្ជាដែលតម្រូវឲ្យប្រជាជនមិនត្រូវធ្វើដំណើរកម្សាន្ត, ស្នាក់នៅផ្ទះរៀងៗខ្លួនតាមអ្វីដែលអាចធ្វើទៅបាន, អនុវត្តគោលការណ៍នៅឆ្ងាយពីគ្នានិងមិនប៉ះពាល់គ្នាដោយផ្ទាល់, ជាពិសេសនោះ មិនត្រូវមានដាច់ខាតកម្មវិធីជប់លៀងទ្រង់ទ្រាយធំ និងចូលរួមកម្មវិធីបុណ្យសាសនាផ្សេងៗ ដែលមានប្រជាជនចូលរួមច្រើន។
គិតត្រឹមថ្ងៃ១១ មេសា ឡាវ បានរកឃើញករណីឆ្លងជំងឺផ្លូវដង្ហើម Covid-19 សរុប ១៨ ករណី។ គិតចាប់ពីជំងឺផ្លូវដង្ហើមធ្ងន់ធ្ងរនេះផ្ទុះឡើងមក ឡាវ បានធ្វើតេស្តលើប្រជាជនជាងមួយពាន់នាក់មកហើយ ដែលក្នុងនោះមានលទ្ធផលវិជ្ជមាន ១៨ ករណី។ មិនទាន់មានអ្នកជំងឺណាម្នាក់ បានចាកចេញពីមន្ទីរពេទ្យនៅឡើយនោះទេ។
គួរជម្រាបផងដែរថា ឡាវ បានសម្រេចដាក់ប្រទេសក្នុងភាពរឹតត្បិតចាប់ពីថ្ងៃទី៣០ មីនា មក។ ប្រជាជន ត្រូវបានតម្រូវឲ្យស្នាក់នៅផ្ទះ ខណៈមន្ត្រីរដ្ឋការស៊ីវិល ត្រូវតម្រូវឲ្យធ្វើការពីផ្ទះ លើកលែងតែប៉ូលិស ទាហាន និងមន្ត្រីពាក់ព័ន្ធជំនាញផ្សេងទៀតដែលមានសមត្ថកិច្ចក្នុងការធ្វើការប្រយុទ្ធជាមួយនឹងការរីករាលដាលនៃជំងឺ Covid-19 នោះទេ ដែលត្រូវនៅធ្វើការដូចធម្មតា៕
© រក្សាសិទ្ធិដោយ thmeythmey.com