COVID-19
កីឡាអន្តរជាតិ
អន្តរជាតិ
COVID-19៖ ដូច Liverpool ដែរ Spurs ឈប់កាត់លុយបុគ្គលិកវិញ ក្រោយរងការរិះគន់
×![]()
ដោយ: ទេព ពិទូរ្យ
Tottenham Hotspur បានផ្លាស់ប្តូរការសម្រេចចិត្តរបស់ខ្លួនវិញដោយមិនកាត់ប្រាក់ឈ្នួលរបស់បុគ្គលិកឡើយនាអំឡុងពេលលីគផ្អាកបណ្តោះអាសន្ន ដោយសារវិបត្តិ COVID-19 បន្ទាប់ពីរងការរិះគន់ពីសំណាក់អ្នកគាំទ្ររបស់ពួកគេ។
Spurs កាលពីថ្ងៃទី៣១ ខែមីនា ធ្លាប់បានប្រកាសកាត់ប្រាក់ឈ្នួលចំនួន២០ភាគរយ លើបុគ្គលិក៥៥០នាក់ ក្នុងខែមេសា និងឧសភា។ ប្រធានក្លិបរហស្សនាមមាន់ខ្នាយមាស លោក Daniel Levy អះអាងថា ការធ្វើរបៀបនេះ គឺដើម្បីការពារការងាររបស់បុគ្គលិក ព្រមទាំងគ្រោងបញ្ឈប់បុគ្គលិកបណ្តោះអាសន្នផងតាមគោលការណ៍របស់រដ្ឋាភិបាលអង់គ្លេស ស្របពេលក្លិបគ្មានចំណូល។
យ៉ាងណាក៏ដោយ ក្រោយមានការរិះគន់ខ្លាំងៗពីសំណាក់អ្នកគាំទ្រផងនោះ Spurs នៅថ្ងៃទី១៣ ខែមេសា បានផ្លាស់ប្តូរគំនិតខាងលើនេះវិញ ដោយសម្រេចផ្តល់ប្រាក់ឈ្នួលដល់បុគ្គលិកពេញ ១០០ភាគរយក្នុងខែមេសា និងខែឧសភាដូចធម្មតាទោះគ្មានការប្រកួតក្តី។
បើតាមសេចក្តីប្រកាសរបស់ក្រុមមានមូលដ្ឋានក្នុងក្រុងឡុងដ៍នេះ មានតែសមាជិកក្រុមប្រឹក្សាភិបាលក្លិបប៉ុណ្ណោះទេដែលនឹងត្រូវកាត់បន្ថយប្រាក់ខែ។ នេះរាប់បញ្ចូលទាំងលោក Levy ដែលទទួលបានថ្លៃពលកម្មជិត៩លានដុល្លារអាមេរិកកាលពីឆ្នាំ២០១៩។
លោក Levy បានបង្ហាញការសោកស្តាយចំពោះការសម្រេចលើកដំបូង ដោយលើកហេតុផលថាក្លិបអន្ទះសារ និងព្រួយបារម្ភពីវិបត្តិ COVID-19 ខ្លាំងពេក។ ប៉ុន្តែក្រោយបើកកិច្ចប្រជុំរូចហើយនោះ ក្លិបបានសម្រេចមិនកាត់ប្រាក់ឈ្នួលបុគ្គលិក ហើយព្រមទាំងសុំទោសអ្នកគាំទ្រខ្លួនទៀតផង។
ក្រុមដែលដឹកនាំដោយអ្នកចាត់ការទូទៅលោក Jose Mourinho នេះ ជាក្លិបទីពីរនៅលីគកំពូលអង់គ្លេសហើយបន្ទាប់ពី Liverpool ដែលផ្លាស់ប្តូរគំនិតចង់កាត់ប្រាក់ឈ្នួលបុគ្គលិកអំឡុងវិបត្តិ COVID-19។ ដោយឡែក Newcaslte United, Bournemouth និង Norwich City ដែលបានប្រកាសកាត់ប្រាក់ឈ្នួលបុគ្គលិក២០ភាគរយក្រោមហេតុផលការពារអនាគតក្លិប នៅតែរក្សាជំហរនេះដដែល។
ចំពោះ Manchester United និង Manchester City សុទ្ធតែបានចេញមុខបញ្ជាក់ច្បាស់ថា ក្លិបនឹងមិនកាត់ប្រាក់ឈ្នួលបុគ្លលិកខ្លួនមួយកាក់មួយសេនឡើយ បើទោះគ្មានការប្រកួតដែលនៅសេសសល់រដូវកាលនេះក៏ដោយ។
គិតត្រឹមថ្ងៃទី១៤ ខែមេសានេះ អ្នកឆ្លង COVID-19 នៅចក្រភពអង់គ្លេសមានចំនួនជិត៩ម៉ឺននាក់ ក្នុងនោះស្លាប់ជាងមួយម៉ឺននាក់៕
Tag:
COVID-19
Tottenham Hotspur
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
