ជាតិ
សង្គមជាតិ
ចូលឆ្នាំ២ថ្ងៃ សាលាឆទាននាសង្កាត់បឹងសាឡាង មានបរិស័ទប្រមាណ១០០នាក់ ពុទ្ធបរិស័ទដែលបានយកចង្ហាន់មកប្រគេនព្រះសង្ឃនៅក្នុងសាលាឆទានបឹងសាឡាង នៅថ្ងៃទី២នៃបុណ្យចូលឆ្នាំខ្មែរ
× ភ្នំពេញ៖ នៅសាលាឆទានសង្កាត់បឹងសាឡាង ខណ្ឌទួលគោក មានបរិស័ទតិចតួចប៉ុណ្ណោះដែលបានយកចង្ហាន់មកប្រគេនព្រះសង្ឃ នៅថ្ងៃបុណ្យចូលឆ្នាំខ្មែរទី២នេះ ដែលជាថ្ងៃវារវ័នប័ត។ ព្រះអង្គ ដាវ សាមពេជ្រ គង់នៅសាលាឆទានសង្កាត់បឹងសាឡាង មានសង្ឃដីកាប្រាប់សារព័ត៌មានថ្មីៗដូច្នេះ។
បន្តទស្សនាបទសម្ភាសរវាងអ្នកសារព័ត៌មានថ្មីៗ និងព្រះអង្គ ដាវ សាមពេជ្រ ដែលគង់នៅសាលាឆទាន ពុទ្ធបរិស័ទដូចតទៅ៖
ព្រះអង្គ ដាវ សាមពេជ្រ មានសង្ឃដីកាបន្តថា រយៈពេល២ថ្ងៃមកនេះ មានពុទ្ធបរិស័ទប្រមាណ១០០នាក់ បានអញ្ជើញមក ហើយពួកគាត់មិនបាននៅយូរដូចមុននោះទេ បើទោះជាគណៈកម្មការបានរៀបចំអាល់កុល ម៉ាស៊ីនវាស់កម្តៅ និងណែនាំពីវិធីការពារជំងឺកូវីដ-១៩ដល់ពុទ្ធបរិស័ទក៏ដោយ។ ព្រះអង្គមានសង្ឃដីថាដូច្នេះថា៖«មុនកើតរោគមានព្រះសកមកពេញតែម្តង ឥឡូវអត់សូវមាន។ ពុទ្ធបិរស័ទមកតែ១០នាទី ទៅផ្ទះវិញអស់ហើយ អត់មាននៅអង្គុយជុំគ្នាដូចពីមុនទេ»។
លោក យាយ យែម ណង ដែលជាពលរដ្ឋរស់នៅម្តុំសាលាឆទាននេះ បានយកចង្ហាន់មកប្រគេនព្រះសង្ឃ និងបង្សុកូលសម្រាប់ឧទ្ទិសដល់សាច់ញាតិដែលបានចែកឋានទៅនៅថ្ងៃទី២នេះ។ ឧបាសិការូបនេះ ក៏គ្រោងទៅវត្តផ្សេងៗទៀត នៅរាជធានីភ្នំពេញនេះដែរ ក្នុងអំឡុងចូលឆ្នាំនេះ។ លោកយាយ ណង ថាមិនសូវបារម្ភខ្លាំងចំពោះការឆ្លងកូវីដ-១៩ ពេលមកធ្វើបុណ្យតាមវត្តឡើយ ព្រោះរូបគាត់មានម៉ាស់ មានទឹកអាល់កុលដាក់តាមខ្លួនជានិច្ច។ លោកយាយ មានប្រសាសន៍ដូច្នេះថា៖«ជាធម្មតាយើងភ័យដែរ ប៉ុន្តែយើងកុំមានការតក់ស្លុតពេក យើងត្រូវមានសា្មរតីរឹងបន្តិច យើងមានម៉ាស់ មានទឹកអាល់កុលជូតដៃ ជូតជើង»។
អ្នករស់នៅក្បែរសាលាឆទានសាលាឆទានសង្កាត់បឹងសាឡាង ម្នាក់ទៀត គឺអ្នកស្រី ឃុត រឿន ក៏បានយកចង្ហាន់មក ដើម្បីឧទ្ទិសដល់ញាតិសន្តានដែលបានចែកឋានទៅដែរ។ អ្នកស្រី ឃុត រឿន ថានឹងបន្តធ្វើចង្ហាន់មកសាលាឆទាននេះ រហូតដល់ចប់បុណ្យចូលឆ្នាំខ្មែរទៀតផង។ អ្នកស្រី ឃុត រឿន បញ្ជាក់បន្ត៖«ពេលយើងមក យើងការពារអ៊ីចឹងទៅណា។ យើងមានការប្រុងប្រយ័ត្នការពារ ពេលយើងរាប់បាត្រអីរួចទៅ គឺយើងទៅផ្ទះវិញរៀងៗខ្លួនទៅ»៕
Tag:
ថ្ងៃចូលឆ្នាំខ្មែរ
សាលាឆទាន
បរិស័ទ
© រក្សាសិទ្ធិដោយ thmeythmey.com