កូរ៉េខាងជើង បាញ់មីស៊ីលជាច្រើនគ្រាប់មុនការបោះឆ្នោតសភាកូរ៉េខាងត្បូង

COVID-19

អន្តរជាតិ

នយោបាយអន្តរជាតិ

កូរ៉េខាងជើង បាញ់មីស៊ីលជាច្រើនគ្រាប់មុនការបោះឆ្នោតសភាកូរ៉េខាងត្បូង

14, Apr 2020 , 5:12 pm

រូបភាព

រូបភាព៖ Chung Sung-Jun, Getty Images

ដោយ: ធៀន ភារិន្ទ

កូរ៉េខាងជើង នាថ្ងៃទី១៤ ខែមេសា បានបាញ់មីស៊ីលប្រដេញ ជាច្រើនគ្រាប់សំដៅទៅសមុទ្រខាងកើត ឬសមុទ្រជប៉ុន។ ការបាញ់នេះ គឺធ្វើឡើងនៅចំថ្ងៃបុណ្យខួបអតីតមេដឹកនាំកូរ៉េខាងជើង Kim Il-sung និងកៀកថ្ងៃបោះឆ្នោតសភានៅកូរ៉េខាងត្បូង។

នេះគឺជាលើកទី៥ ហើយរបស់កូរ៉េខាងជើង ដែលបានបាញ់សាកល្បងអាវុធរបស់ខ្លួននៅក្នុងឆ្នាំ ២០២០។ ការបាញ់នេះ ធ្វើឡើងនៅចំខួបអាយុ ១០៨ឆ្នាំ នៃអតីតមេដឹកនាំកូរ៉េខាងជើង គីម អ៊ីលស៊ុង (Kim Il-sung) និងមុនថ្ងៃបោះឆ្នោតសភាកូរ៉េខាងត្បូង ដែលត្រូវរៀបចំឡើងនាថ្ងៃទី១៥ ខែមេសា។

បើតាមការអះអាងរបស់នាយសេនាធិការចម្រុះកូរ៉េខាងត្បូង កូរ៉េខាងជើងបានបាញ់មីស៊ីលពីរប្រភេទសំដៅទៅសមុទ្រជប៉ុន។ ប្រភេទទី១ គឺជាមីស៊ីលប្រឆាំងនឹងនាវាបាញ់ចេញពីដីគោក (surface-to-ship cruise missiles) ដែលត្រូវបានបាញ់នៅក្នុងអំឡុងម៉ោង៧ព្រឹក ពីតំបន់មួយក្បែរក្រុង Munchon ។ មីស៊ីលប្រភេទនេះ ហោះបានចម្ងាយ ១៥០គីឡូម៉ែត្រមុននឹងធ្លាក់ចូលទៅក្នុងសមុទ្រខាងកើត។

ប្រភេទទី២ គឺជាមីស៊ីលបាញ់ពីលើអាកាសទៅដី (air-to-ground missiles) ដែលបាញ់ចេញពីយន្តហោះចម្បាំងSukhoi និងយន្តហោះចម្បាំង MiG។ មីស៊ីលប្រភេទចុងក្រោយនេះ កូរ៉េខាងជើងបានបាញ់ជាច្រើនគ្រាប់ចេញពីក្រុង Wonsan សំដៅទៅសមុត្រខាងកើត។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។

ការបាញ់មីស៊ីលលើកនេះ គឺធ្វើក្រោយកិច្ចប្រជុំសភា និងកិច្ចប្រជុំការិយាល័យនយោបាយនៃគណៈមជ្ឈិមបក្សពលករកូរ៉េខាងជើង តែប៉ុន្មានថ្ងៃប៉ុណ្ណោះ។ ការបាញ់មីស៊ីលប្រដេញចុងក្រោយរបស់កូរ៉េខាងជើង គឺធ្វើឡើងនៅក្នុងឆ្នាំ ២០១៧។ ពេលនោះកូរ៉េខាងជើង បានសាកល្បងមីស៊ីលប្រដេញប្រភេទ Kumsong-3 នៅក្រុងWonsan ៕