ប្រធានាធិបតីអាមេរិក លោក ដូណាល់ ត្រាំ បានប្រកាសផ្អាកការផ្តល់ថវិកាទៅអង្គការសុខភាពពិភពលោក (WHO) ដោយលើកឡើងថាអង្គការនេះបានលាក់បាំងស្ថានភាពធ្ងន់ធ្ងរនៃជំងឺរាតត្បាត មុននឹងបណ្តាលឲ្យសាយភាយជុំវិញពិភពលោក។
ក្នុងសន្និសីទព័ត៌មានមួយ នៅថ្ងៃទី១៥ ខែមេសា លោកប្រធានាធិបតីត្រាំ បានណែនាំឲ្យមន្ត្រីរដ្ឋការរបស់លោកផ្អាកការផ្តល់វិភាគទាន ខណៈការពិនិត្យលើសកម្មភាពរបស់អង្គការសុខភាពពិភពលោកនឹងត្រូវធ្វើឡើង ដើម្បីវាយតម្លៃពីការគ្រប់គ្រងមិនត្រឹមត្រូវ និងលាក់បាំងពីការសាយភាយនៃវីរុស។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
សហរដ្ឋអាមេរិក ជាប្រទេសដែលផ្តល់វិភាគទានទៅកាន់អង្គការសុខភាពពិភពលោកច្រើនជាងគេបង្អស់។ នៅឆ្នាំ២០១៩ សហរដ្ឋអាមេរិកបានផ្តល់វិភាគទានច្រើនជាង ៤០០លានដុល្លារ ដែលប្រហែល១៥%នៃកញ្ចប់ថវិកាទាំងមូលរបស់អង្គការនេះ។
លោក ដូណាល់ ត្រាំ សង្កត់ធ្ងន់ថា អង្គការសុខភាពពិភពលោក មិនបង្ហាញពីតម្លាភាពទៅលើការសាយភាយនៃជំងឺ ហើយនឹងពិភាក្សាអំពីអ្វីដែលនឹងត្រូវធ្វើជាមួយទឹកប្រាក់ដែលបានបរិច្ចាគទៅកាន់អង្គការសុខភាពពិភពលោក។ ត្រង់ចំណុចនេះ លោកត្រាំ បន្ថែមទៀតថា៖«ជាមួយនឹងការផ្ទុះនូវជំងឺ COVID-19 យើងមានការព្រួយបារម្ភអំពីការប្រើប្រាស់ឲ្យបានត្រឹមត្រូវតាមតែអាចធ្វើទៅបាននូវសប្បុរសភាពរបស់អាមេរិក»។
ការវាយប្រហាររបស់ ប្រធានាធិបតី ត្រាំ ទៅលើអង្គការសុខភាពពិភពលោក បង្ហាញពីជំនឿរបស់លោកដែលអង្គការនេះកាន់ជើងចិន និងរួមដៃជាមួយចិនក្នុងការលាក់បាំងព័ត៍មានអំពីគ្រោះមហន្តរាយសុខភាពមួយនេះ។
លោកត្រាំបន្តទៀតថា ការវាយប្រហាររបស់អង្គការសុខភាពពិភពលោកលើការរឹតត្បិតក្នុងការធ្វើដំណើរ គឺជាការទុកនយោបាយជាធំ ដោយពុំខ្វល់ពីការសង្គ្រោះជីវិតឡើយ ។ ទាំងអស់នេះហើយធ្វើឲ្យខាតបង់ពេលវេលាដ៏សំខាន់ក្នុងការរៀបចំ និងពន្យារការសម្រេចចិត្តក្នុងការផ្អាកការធ្វើដំណើរជាសកល ។
ការសម្រេចចិត្តផ្អាកផ្តល់វិភាគទាន ទៅកាន់អង្គការសុខភាពពិភពលោក ទទួលបានថ្កោលទោសមួយរំពេច។ លោកវេជ្ជបណ្ឌិត Patrice Harris ប្រធានសមាគមគ្រូពេទ្យអាមេរិកបាននិយាយថា៖« នេះជាជំហានគ្រោះថ្នាក់ទៅកាន់ទិសដៅខុស ដែលមិនធ្វើឲ្យការយកឈ្នះជំងឺCOVID-19 មានភាពងាយស្រួលឡើយ»។
គិតត្រឹមថ្ងៃទី១៤ មេសា អាមេរិកមានអ្នកឆ្លងចំនួន ៦សែននាក់ និងស្លាប់ចំនួន ២៥,៧០០នាក់។ អង្គការសុខភាពពិភពលោក ដែលជាភ្នាក់ងាររបស់អង្គការសហប្រជាជាតិ ត្រូវការត្រូវការធនធានជាងពេលណាៗទាំងអស់ក្នុងការប្រយុទ្ធប្រឆាំងនឹងជំងឺរាតត្បាតសកលCOVID-19 ដោយបានអំពាវនាវស្វែងរកទឹកប្រាក់ច្រើនជាង ១ពាន់លានដុល្លារ។
ក្នុងកញ្ចប់ថវិកាឆ្នាំ២០១៨-២០១៩ អាមេរិកតម្រូវឲ្យចូលរួមបរិច្ចាគ២៣៧លានដុល្លារ ដែលជាការកំណត់របស់សភាអាមេរិក និងប្រមាណ៦៥៦ដុល្លារដែលជាការបរិច្ចាគស្ម័គ្រចិត្តទៅកាន់កម្មវិធីផ្សេងៗ។ ខណៈចិនបរិច្ចាគត្រឹមតែ៧៦លានដុល្លា និងចូលរួមក្នុងការបរិច្ចាកស្ម័គ្រចិត្តត្រឹម១០លានដុល្លារ៕