COVID-19
អន្តរជាតិ
ប្រភពរូប៖ កាសែតបាងកកប៉ុស្តិ៍
×![]()
អាជ្ញាធរសុខាភិបាលថៃ បានធ្វើតេស្តមនុស្សជាង១០ម៉ឺននាក់រកមើលCOVID-19 ចាប់ពីខែកុម្ភៈ រហូតដល់ថ្ងៃទី១០ ខែមេសា ហើយនឹងបន្តធ្វើតេស្តបន្ថែមទៀត។ គិតមកត្រឹមថ្ងៃ១៥ ខែមេសា មនុស្សជាង២៦០០នាក់ហើយក្នុងប្រទេសថៃ បានរកឃើញថាឆ្លងជំងឺនេះ។ 
អ្នកនាំពាក្យមជ្ឈមណ្ឌលគ្រប់គ្រងស្ថានភាពCOVID-19ថៃ លោក Taweesilp Visanuyothin បានបញ្ជាក់កាលពីថ្ងៃទី ១៤ ខែមេសា ថា ក្រសួងសុខាភិបាលបានបញ្ចប់ការធ្វើតេស្តលើមនុស្ស១០០ ៤៩៨នាក់ហើយ ក៏ប៉ុន្តែការធ្វើតេស្តជាបន្តបន្ទាប់ថែមទៀត នឹងត្រូវប្រព្រឹត្តទៅក្នុងគោលដៅទប់ស្កាត់ការរីករាលដាលនៃ COVID-19 ។
លោកវេជ្ជបណ្ឌិត Taweesilp ទទូចឲ្យពលរដ្ឋអនុវត្តចំណាត់ការបង្ការទុកជាមុន ព្រោះថាវាចំណាយលុយច្រើនសន្ធឹកសន្ធាប់ក្នុងការព្យាបាលអ្នកជំងឺCOVID-19 ដែលរងគ្រោះធ្ងន់ធ្ងរ។ នេះតាមការចុះផ្សាយកាសែត បាងកកប៉ុស្តិ៍ ។
ត្រង់ចំណុចនេះ លោក សង្កត់ធ្ងន់ថា ក្រសួងប៉ាន់ស្មានថា លុយប្រមាណ១លានបាត ឬ៣ម៉ឺនដុល្លារ កំពុងចាយវាយលើការព្យាបាលអ្នកជំងឺនីមួយៗដែលរងគ្រោះខ្លាំងដោយសារវីរុសកាចសាហាវនេះ។ បើតាមលោកវេជ្ជបណ្ឌិតរូបនេះ បច្ចុប្បន្ន ថៃមានអ្នកជំងឺប្រភេទនេះសរុប ៤៨នាក់ ហើយ៣៧នាក់ កំពុងសម្រាកព្យាបាលនៅមន្ទីរពេទ្យរដ្ឋ និង១១នៅមន្ទីរពេទ្យឯកជន។
ម្យ៉ាងវិញទៀត លោក Taweesilp ស្នើឲ្យពលរដ្ឋថៃកុំចេញដើរហើរខាងក្រៅអំឡុងពេលសង្ក្រាន្ត ដែលរដ្ឋាភិបាលបានប្រកាសលែងជាថ្ងៃឈប់សម្រាកសម្រាប់ឆ្នាំ២០២០នេះ។ ទោះជាបែបនេះក្តី កាលពីថ្ងៃយប់ថ្ងៃចន្ទ ១៣ ខែមេសា និងព្រឹកថ្ងៃអង្គារ មនុស្ស៨០៦នាក់ត្រូវបានរកឃើញថាបំពានបម្រាមគោចរ ហើយក្នុងចំណោមនោះ មនុស្ស១៥៥នាក់បានទៅចូលរួមពិធីជប់លៀង។
គិតត្រឹមថ្ងៃ១៥ ខែមេសា ប្រទេសថៃ បានរាយការណ៍ករណីឆ្លងCOVID-19 សរុប ២៦៤៣នាក់ ក្នុងនោះ៣០ករណីថ្មី។ អ្នកស្លាប់សរុបឡើងដល់៤៣នាក់ ក្រោយរកឃើញថ្មី ២នាក់បន្ថែម។ ក្នុងចំណោមអ្នកឆ្លងទាំងជាង២៦០០នាក់ អ្នកជំងឺជិត១៥០០នាក់បានជាសះស្បើយ ហើយអនុញ្ញាតឲ្យចាកចេញពីពេទ្យ។ ក្រុមអ្នកជំងឺមួយភាគធំនៅថៃ គឺមានអាយុចន្លោះពី៣០-៣៩ឆ្នាំ៕
Tag:
ថៃ
COVID-19
© រក្សាសិទ្ធិដោយ thmeythmey.com
